Song of Solomon 8

Maori (Paipera Tapu 2012)

← Chapter 7 Jump to:

1Auē me i rite koe ki tōku tungāne i ngote nei i ngā ū o tōku whaea! Ka kite ahau i a koe i waho, ka kihia koe e ahau, āe, e kore tētahi e whakahāwea ki ahau.

2Ka aratakina koe e ahau, ka kawea ki te whare o tōku whaea, ko ia anō hei whakaako i ahau. Ka whakainumia koe e ahau ki te wāina whakaranu, ki te wai o tāku pamekaranete.

3Ko tōna mauī ki raro i tōku mātenga, ko tōna matau ki te awhi i ahau!

4He kī atu tēnei nāku ki a koutou, e ngā tamāhine o Hiruhārama, kaua e whakaohokia, kaua e whakaarahia tāku e aroha nei, kia pai rā anō ia!

5Ko wai tēnei e haere mai nei i te koraha e taupuhipuhi nei ki tāna i aroha ai? Nāku koe i whakaara ake i raro i te āporo; ko te wāhi tēnā i puta mai ai koe i roto i tōu whaea; i puta mai anō koe i reira i roto i te wahine i whānau ai koe.

6Waiho ahau hei hīri ki tōu ngākau, hei hīri ki tōu ringa; rite tahi hoki ki tō te mate te kaha o te aroha; nanakia tonu te hae, ānō ko te urupā, ko ōna hiko, he hiko ahi, he mura pū nā Ihowā.

7Nui te wai, e kore te aroha e taea te tinei, e kore anō e ngaro i ngā awa. Ahakoa i hoatu e te tangata ngā rawa katoa o tōna whare mō te aroha, ka whakahāweatia rawatia.

8He teina nohinohi tō mātou, kāhore hoki ōna ū. Me pēhea mātou ki tō mātou teina i te rā e kōrerotia ai ia?

9Ki te mea he taiepa ia, ka hangā e tātou he pourewa ki runga ki a ia, he mea hiriwa. Ki te mea he tatau ia, ka whakakōpakina ia e tātou ki ngā papa hīta.

10He taiepa ahau, ko ōku ū, ānō ko ōna pourewa; nō reira, ki tāna titiro mai, i rite ahau ki tētahi kua kite i te āta noho.

11He māra wāina tā Horomona i Paara-Hamono, tukua atu ana e ia te māra ki ngā kaitiaki; kotahi mano ngā hiriwa hei kawenga mai mā tēnei, mā tēnei hei utu mō ōna hua.

12Ko tāku māra, ko tāku ake, kei tōku aroaro; māu, e Horomona, te kotahi mano, ā, mā ngā kaitiaki o ōna hua e rua rau.

13E koe e noho nei i ngā kāri, e whakarongo ana ngā hoa ki tōu reo; meinga kia rongo ahau.

14Kia hohoro, e tāku e aroha nei, kia rite koe ki te anaterope, ki te kūao hāta rānei i runga i ngā maunga kīnaki kakara!

← Chapter 7 Jump to: