Zephaniah 3

Maori (Paipera Tapu 2012)

← Chapter 2 Jump to:

1Auē te mate mō tēnei e whakakeke nei, kua poke nei, mō te pā tūkino!

2Kīhai ia i whakarongo ki te reo, kīhai i pai ki te ako. Kīhai i whakawhirinaki ki a Ihowā, kīhai i whakatata ki tōna Atua.

3He raiona e hāmama ana ōna rangatira i roto i a ia, he wuruhi i te ahiahi ōna kaiwhakarite, kāhore ā rātou toenga mō te ata.

4Ko ōna poropiti, he wairangi, he hunga tinihanga; kua whakapokea te wāhi tapu e ōna tohunga, kua tūkinotia e rātou te ture.

5He tika a Ihowā i roto i a ia; kāhore āna mahi hē. I tēnei ata, i tēnei ata, e puta ana tāna whakawākanga ki te mārama, e kore tāna e ngaro atu; nā, ko te kaimahi i te hē, e kore ia e mōhio ki te whakamā.

6“Kua oti ngā iwi te hātepe atu e ahau; tū kau ana ō rātou taumaihi. Kua ururua i ahau ō rātou ara, kāhore e haerea; kua ngaro ō rātou pā, kāhore he tangata, kāhore he kainoho.

7I kī ahau, ‘He pono ka wehi koe i ahau, ka pai ki te ako; pēnei kīhai i hātepea atu tōna nohoanga, kīhai i pērā me āku whiunga katoa i a ia.’ Heoi, moata tonu tō rātou maranga, he iho ā rātou mahi katoa.”

8“Mō reira tatari mai ki ahau,” e ai tā Ihowā, “ki te rā e whakatika ai ahau ki te taonga parakete. Ko tāku tikanga hoki tēnei, kia huihuia mai ngā tauiwi, kia tāwhiua mai ngā kīngitanga, kia ringihia ki runga ki a rātou tōku riri, tōku āritarita katoa, mura tonu; ka pau hoki te whenua katoa i te ahi, arā i tōku hae.

9“Ka puta kē hoki i ahau i reira he reo tino tika mō ngā iwi, e karanga ai rātou katoa ki te ingoa o Ihowā, e kotahi tonu ai te whakaaro e mahi ai ki a ia.

10Ka kawea mai he whakahere ki ahau e te hunga e īnoi ana ki ahau, arā e te tamāhine a āku whati, i tērā taha o ngā awa o Etiopia.

11“I taua rā e kore koe e whakamā ki tētahi o āu mahi, o ōu hē ki ahau; nō te mea ka tangohia atu e ahau i roto i a koe te hunga e whakamanamana ana, e whakapehapeha ana, e kore anō koe e whakakake ā muri ake nei, i runga i tōku maunga tapu.

12Ka whakatoea anō e ahau ētahi i roto i a koe, he ware, he rawakore, ā, ka whakawhirinaki rātou ki te ingoa o Ihowā.

13E kore ngā toenga o Īharaira e mahi hē, e kōrero teka rānei; e kore anō e kitea he arero teka i roto ō rātou māngai. Ka kai hoki rātou, ka takoto, tē ai he kaiwhakawehi.”

14Waiata, e te tamāhine a Hiona; hāmama, e Īharaira! Whakapaua te ngākau ki te koa, ki te whakamanamana, e te tamāhine a Hiruhārama.

15Kua kore i a Ihowā ngā whakawā mōu, kua peia e ia tōu hoariri. Kei roto i a koe te kīngi o Īharaira, arā a Ihowā; e kore koe e kite i te kino ā muri ake nei.

16Ko te kōrero tēnei ki Hiruhārama i taua rā: Kaua e wehi; e Hiona, kei ruha ōu ringa.

17Kei roto a Ihowā, tōu Atua, i a koe, ā, he nui ia, māna e whakaora; ka koa ia, ka hari ki a koe; ka āta noho ia i runga i tōna aroha, ka whakamanamana ia, ka waiata ki a koe.

18“Ka whakaminea e ahau te hunga e pōuri ana ki te huihuinga nui, ērā i roto i a koe, ērā e mau nā tōna ingoa kino ki a rātou.

19Nanā, i taua wā, ka mahi ahau ki te hunga katoa e whakatupu kino ana i a koe. Ka whakaora i te wahine e totitoti ana; ka kohikohi i te mea i peia atu, ā, hei whakamoemititanga rātou, hei ingoa i ngā whenua katoa i whakamā ai rātou.

20I taua wā ka kawea mai koutou e ahau, ā, i taua wā ka whakaminea mai koutou e ahau; ā, hei ingoa koutou, hei whakamoemititanga i roto i ngā iwi katoa o te whenua, ina whakahokia koutou e ahau i te whakarau me te titiro anō koutou,” e ai tā Ihowā.

← Chapter 2 Jump to: