Hosea 12

Macedonian 2006 D - (Свето Писмо: Стандардна Библија 2006 (со Девтероканонски Книги))

← Chapter 11 Jump to: Chapter 13 →

1Ефрем пасе ветар и трча кон источниот ветар, по цел ден си ги намножува лагите и насилствата, склучува сојуз со Ашур, а во Египет праќа масло.

2Но и со Јуда Господ ќе има суд – Тој ќе го казни и Јаков за постапките негови, и Ќе му плати според делата негови.

3Уште во утробата мајчина тој го потиснуваше брата си, а кога порасна, тој се бореше и со Бога.

4Тој се бореше против ангел – и го победи; заплака и Го замоли; во Ветил Тој нѐ најде и таму зборуваше со нас.

5А Господ е Бог над силите; Јахве е името Негово.

6Врати се и ти кон својот Бог; биди милостив и справедлив, и секогаш надевај се на твојот Бог.

7Хананецот има неверни мерила во раката своја и сака да онеправдува.

8И Ефрем вели: „Сепак се збогатив, насобрав многу имот, макар што во сите мои работи не можат да најдат ништо незаконско, што би било грев.“

9Јас сум твојот Господ Бог уште од земјата египетска: пак ќе те населам да седиш во сеници како во деновите на празникот.

10Јас им зборував на пророците и ги умножував виденијата, а и преку пророците ќе донесам уништување.

11Во Галаад има беззаконија, тие ќе бидат уништени. Во Гилгал колат за жртви телци, а жртвениците им стојат како купишта камења на меѓите од нивните ниви.

12Избега Јаков во Арам и Израил служеше за жена, а за жена и овци пасеше.

13Преку пророк го изведе Господ Израил од Египет и преку пророк Тој го пазеше.

14Ефрем многу Го разгневи Господа, па затоа Господ ќе ја остави крвта негова на него, и ќе му плати за неговите навреди.

← Chapter 11 Jump to: Chapter 13 →