Zechariah 2

Macedonian 2006 D - (Свето Писмо: Стандардна Библија 2006 (со Девтероканонски Книги))

← Chapter 1 Jump to: Chapter 3 →

1И пак ги подигнав очите и видов: и, ете, еден маж, кој во раката имаше мерно јаже.

2Го прашав: „Каде одиш?“ Тој ми рече: „Одам да го измерам Ерусалим, за да видам колкава му е ширината и колкава му е должината.“

3Тогаш ангелот, што зборуваше со мене, истапи напред, а друг ангел му дојде во пресрет,

4и тој му рече на оној: „Побрзај и кажи му на оној млад човек: ‚Ерусалим ќе се насели како село без ѕидини поради многуте луѓе и добиток во него.

5И Јас ќе му бидам огнен ѕид, околу него, вели Господ, и слава во него.‘“

6„Еј, еј! Бегајте од северната земја, вели Господ, зашто Јас ве растргнав по сите четири ветра небески“, вели Господ.

7Спасувај се Сионе, ти што живееш кај ќерката Вавилонска.

8Зашто така вели Господ Седржителот, Кој ме прати за слава кај народите, што ве пљачкосуваа: „Зашто кој чепка во вас, чепка во зеницата на окото Мое.

9И, ете, Јас ќе ја кренам раката Своја против нив, и тие ќе станат плен на робовите свои.“ Тогаш ќе познаете дека Господ Саваот ме пратил.

10„Ликувај и весели се, ќерко Сионова, зашто ете, Јас ќе дојдам и ќе живеам во тебе“, вели Господ.

11И ќе се приберат многу народи кај Господ во оној ден и ќе станат Негов народ. И Тој ќе се насели кај тебе, и тогаш ќе разбереш дека Господ Саваот ме пратил кај тебе.

12Тогаш Господ ќе ја завладее Јудеја, Својот дел на светата земја, и пак ќе го избере Ерусалим.

13Нека замолкнат сите луѓе пред лицето на Господ, зашто Тој стана од Своето свето живеалиште.

← Chapter 1 Jump to: Chapter 3 →