1 John 1

Mossi MPBU (WẼNNAAM SEBRE 2014)

Jump to: Chapter 2 →

1Tõnd gʋlsda yãmb sẽn kẽed ne vɩɩm koɛɛga wɛɛngẽ, koɛɛg ning sẽn dag n be hal sɩngr wẽndẽ wã, tɩ tõnd wʋm a kibarã, tɩ d mens nin yãnd-a wã, tɩ tõnd ges-a wã, la d sɩɩs-a ne d nusã,

2b puk-a lame tɩ tõnd yã. Yaa rẽ yĩngã, tɩ tõnd kõt yãmb koe-kãng kaseto, la d togsd yãmb vɩɩm sẽn kõn sa wã koɛɛg sẽn dag n be tõnd Ba nengẽ, tɩ b vẽneg-a ne tõndã.

3Bũmb ning tõnd sẽn yã la d wʋmã, tõnd togsd-a-la yãmb me, tɩ yãmb me tõe n paam lagem-n-taar ne tõndo. La tõnd lagem-n-taarã bee ne d ba wã, la ne b Bi-ribl a Zeezi Kirisi.

4Tõnd gʋlsda bõn-kãngã tɩ tõnd sũ-noogã na pid zãnga.

5Ad koɛɛg ningã tõnd sẽn wʋm a Zeezi Kiris nengẽ n togsd yãmbã: Wẽnnaam yaa vẽenem, la lik baa bilf ka be bãmb pʋgẽ ye.

6Tõnd sã n yetẽ tɩ d tara lagem-n-taar ne bãmb n yaool n kẽnd lik pʋgẽ, tõnd yagda zĩrẽ la d ka maand sɩd ye.

7La tõnd sã n kẽnd vẽenemẽ wa bãmb mengã sẽn be vẽenemẽ wã, tõnd tara lagem-n-taar ne taaba, la bãmb Bi-ribl a Zeezi zɩɩmã pekda tõnd yel-wẽnã fãa n yiisi.

8Tõnd sã n yetẽ tɩ d ka tar yel-wẽnde, tõnd belgda d mense, la sɩd ka be tõnd pʋgẽ ye.

9Tõnd sã n vẽneg n togs Wẽnnaam d yel-wẽnã, bãmb yaa sɩd soaba la tɩrga tɩ kõ tõnd sugr d yel-wẽnã yĩnga, la b pek tõnd n yiis d tʋʋm-wẽnsã fãa.

10Tõnd sã n yeel tɩ d ka maan yel-wẽnde, tõnd geta Wẽnnaam wa zĩrẽ yagda, la bãmb goamã ka be tõnd pʋgẽ ye.

Jump to: Chapter 2 →