2 Peter 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1Zĩrẽ-bãngdb n dag n zĩnd Wẽnnaam nebã sʋka. Woto me, zĩrẽ karen-saam-dãmb n be yãmb sʋkã. B na n maana sɩlem n wa ne zãmsg sẽn menesd nebã, la b na n kɩɩsa Zu-soab ning sẽn fãag-a bãmbã, la b na n taka sãoong tao‑tao n wa b mens zutu.

2Neb wʋsg na n pʋga bãmb b tʋʋm-beedã pʋgẽ, la sɩd sorã na n paama tʋʋsgo, bãmb tʋʋm-beedã yĩnga.

3Bãmb rat-wʋsgã yĩnga, b na n belga yãmb ne sɩlem goam n fã yãmba. La bãmb sɩbgrã sɩnga hal daar zãr n watẽ, la bãmb sãoongã ka na n vaal ye.

4Bala, Wẽnnaam ka bas tɩ malegs nins sẽn maan-b yel-wẽnã põs ye B rig-b lame n lobe, n kẽes-b bog-zulung sẽn yaa lik bida pʋgẽ, n balg-b be n gũud bʋʋdã kaoob daare.

5Wẽnnaam ka bas pĩnd dũniyã t'a põs ye. Yaa neb a nii bal la bãmb põsg-yã: Ya a Nowe n dag n yaa tɩrlmã koe-moaanda. La Wẽnnaam kɩtame tɩ sa-kãseng wa ni wẽn-kɩɩsdbã dũni zugu.

6Wẽnnaam sɩbga tẽms nins sẽn boond tɩ Sodom la Gomoorã, n kɩt tɩ b lebg tompeglem, tɩ yɩ mamsg wẽn-kɩɩsdb nins sẽn na n pʋgl n wa wã yĩnga.

7La Wẽnnaam fãaga nin-tɩrg a Lote. Yẽnda sũur da sãama hal wʋsgo, nin-wẽns kãensã tʋʋm-dẽgdã sẽn ya wʋsgã yĩnga.

8Bala, nin-tɩr-kãng sẽn da be bãmb sʋk n yãt tʋʋm-dẽgd nins b sẽn maandã, la a wʋmdẽ wã, a sũurã ra sãamda daar fãa, t'a namsd wʋsg a tɩrlmã pʋgẽ.

9Rẽ wã, Zu-soabã mii b sẽn na n maan to-to n fãag neb nins sẽn sakd bãmbã makr wakate, la b sẽn na n maan to-to n bĩng tʋʋm-wẽns maandbã n sɩbg-b bʋʋdã kaoob daare.

10Sẽn pʋs n yɩɩd fãa, yaa neb nins sẽn be tʋʋm-dẽgd maaneg ratem pʋgã, n baood n maan yĩngã tʋlsem, la b kɩɩsd Wẽnnaam noorã. Zĩrẽ karen-saam-dãmbã yaa sek-m-mens-rãmba, la tɩta-nebã, b ka yɛɛsd tɩ paoog yĩngr rãmb ziirã ye. B tʋʋd-b lame.

11Baa malegs nins sẽn tar pãng ne pãn-tõog n yɩɩd bãmbã yaool n ka gomd yĩngr pãens rãmbã wẽng Zu-soabã taoor ye.

12Nin-wẽn-kãensã wẽnda rũms sẽn sakd b mens ratem, tɩ b belmã yõod yaa yõk n kʋ balã. Bãmb paoogda bũmb nins b sẽn ka mi. Bãmb mens tʋʋm dẽgdã n na n sãam-ba.

13Bãmb tʋʋm wẽnsã yĩnga, b na n deega tʋʋm wẽns yaoodo. Bãmb getame tɩ tʋm wẽngã ratem tʋʋm ne wĩntoog yaa sũ-noog bũmbu. Bãmb yaa wẽns la rẽgdo, la b sẽn naagd yãmb n dɩtẽ wã wakate, b maanda sũ-noog ne b zãmbã.

14Bãmb nina geta pʋg-yoaadba, la b zɩ n maan yel-wẽn n tɩg ye. B belgda neb nins yam sẽn yuusdã n tõogdẽ, b sũyã pida ne maan sɩlem n kãag n kõ b mense. Wẽnnaam kãab-wẽng bee bãmb zutu.

15Bãmb bʋdg n basa so-tɩrgã, n menem n tũ a Bewoor biig a Balaam sore. Yẽnda sakame n na n maan wẽng n deeg yaoodo,

16la a paama lengre, a kɩɩsgã yĩnga. Bõang sẽn ka gomd goma wa ninsaala n gɩdg Wẽnnaam no-rɛɛs‑kãng yalem-tʋʋmã.

17Nin-kãens wẽnda buls sẽn ka tar koom ye, la wa sawat sobg sẽn dɩkda. B zĩig na n yɩɩ lik sẽn yaa bida pʋgẽ.

18Ne bãmb wuk-m-meng goamã sẽn yaa vɩɩdã, b rɩkda b yĩngã ratem sẽn yaa tʋʋm-dẽgdã n belgd neb nins sẽn nan lak b mens ne neb nins sẽn vɩ-b wẽng maaneg pʋgẽ wã.

19Bãmb kãabda nebã lohorem, tɩ bãmb mensã yaool n ya tʋʋm-dẽgd yembse, bala, ned kam fãa yaa bũmb ning sẽn tõog yẽnda wã yamba.

20Sɩd me, nebã sã n bãng tõnd Zu-soab la d fãagd a Zeezi Kirisã, n yi n bas dũni wã dẽgdã, n leb n kẽ a pʋgẽ t'a tõog bãmba, bãmb yaoolem toogã wẽng na n yɩɩga pipi rẽndã.

21Bala, bãmb sã n dag n ka bãngẽ tɩrlmã sor n são bãmb sẽn bãng-a, n yaool n wẽnemd n bas tõ-sõng ning b sẽn dag n kõ bãmbã.

22Bũmb ning sẽn paam bãmbã yaa wa yel-bũnd ning sẽn yaa sɩdã sẽn yeelã: Baagã lebg n tɩ rɩɩ a sẽn dag n wʋbã, la kurku-yãangã b sẽn nan pekã leb n tɩ bilma begdã.

← Chapter 1 Jump to: Chapter 3 →