2 Thessalonians 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1M ba-biisi, sã n yaa ne tõnd Zu-soab a Zeezi Kiris waoongã yelle, la tõnd sẽn na n tigs taab bãmb nengẽ wã yelle, tõnd kota yãmb

2tɩ y ra sak tɩ y yam yuus tao-tao, wall tɩ rabeem yõk yãmba, neb sẽn yet tɩ Zu-soabã waoong zoe n loogame wã yĩng ye. Bala, neb tõe n gomame n yeel tɩ yaa bãngr goamã, wall b gome, wall b yeel tɩ tõnd n gʋls n yeel a woto.

3Bɩ ned da tõog n belg yãmb ne manesem buud baa a yembr ye. Bala, yaa tɩlɛ tɩ leb-poorẽ deng n zĩndi, tɩ wẽn-kɩɩsdã yiki. Yẽnda yaa soab ning b sẽn na n sãame,

4bɛ sẽn zẽkd a meng n yɩɩgd bũmb ning fãa b sẽn boond tɩ Wẽnnaam, la bũmb nins fãa neb sẽn pʋʋsda, hal n pʋs n kẽng n tɩ zĩnd Wẽnnaam doogẽ wã, n kɩt tɩ b bool-a tɩ wẽnnaam.

5Yãmb ka tẽr tɩ mam goma ne yãmb a yell wakat ning m sẽn dag n ket n be ne yãmbã sɩda?

6Moasã, yãmb mii bũmb ning sẽn gɩdg-a t'a ka tõe n yik hal tɩ ta a wakatã.

7Bala, yel-wẽnã yel-soalem zoe n tʋmdame, la yaa tɩlɛ tɩ ned ning sẽn gɩdg-a wã deng n looge.

8Yaa wakat-kãng la wẽn-kɩɩsdã na n yiki, la Zu-soabã [a Zeezi] na n sãam-a-la ne b noor pemsem, la bãmb waoongã ziir na n beds-a lame.

9Wẽn-kɩɩsdã waoong na n yɩɩ ne a Sʋtãan pãnga, ne zĩrẽ bõn-bãn la bãna, la bõn-yɛɛsds buud toay-toaya,

10la ne ka-tɩrlem belgrã fãa, neb nins sẽn na n sãamã yĩnga, bala, b ka reeg sɩdã nonglem n na paam fãagr ye.

11Woto yĩnga, Wẽnnaam tʋma meneng sɩɩg b nengẽ, tɩ b na tẽ zĩrẽ,

12tɩ neb nins sẽn ka tẽ-b sɩdã, la sẽn nong ka tɩrlmã bʋʋd na kao.

13D ba-biis Zu-soabã sẽn nong wʋsgo, sã n yaa ne tõndo, tõnd tog n pʋʋsda Wẽnnaam bark wakat fãa yãmb yĩnga, bala, Wẽnnaam tũusa yãmb hal sɩngr wẽndẽ tɩ y na paam fãagre, la yaa Sɩɩgã sẽn na welg yãmb toor Wẽnnaam yĩnga, la yãmb sẽn na n tẽ sɩdã yĩng la y na n paam-a.

14Yaa tɩ yãmb na paam fãagr yĩng la b tall koe-noogã tõnd sẽn moona n bool yãmba, tɩ y tõe n paam pʋɩɩr ne tõnd Zu-soab a Zeezi Kiris ziirã.

15Woto yĩnga, m ba-biisi, yals-y kãenkãe la y tall koees nins tõnd sẽn kõ yãmbã, sã n yaa ne noore, wall ne sebre.

16Bɩ tõnd Zu-soab a Zeezi Kiris mengã, la tõnd ba a Wẽnnaam sẽn nong tõndo, n bels tõnd ne belsg sẽn kõn sa, bãmb nimbãan-zoeerã yĩnga, la b kõ tõnd saag-sõngã

17bels yãmb sũyã, la b kɩt tɩ y pɛlg yɩ kãenkãe ne tʋʋm-sõng fãa, la ne gom-sõng fãa.

← Chapter 1 Jump to: Chapter 3 →