Hebrews 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Yaa woto yĩng la tõnd yõsgd Kiris goamã zãms-naana wã, n baood tɩ yɩ sõama zãnga, n ka leb n be yẽbg-paalg sẽn yaa: Tek yam n bas tʋʋm nins sẽn ya kũumã,

2tɩ tẽ Wẽnnaam, zãmsg lisg wɛɛngẽ, nus tikri, la kũum vʋʋgre la sɩbgr sẽn ka sɛta yell ye.

3Bũmb ning tõnd sẽn na n maan la woto, wẽnd sã n sake.

4Sã n yaa ne neb nins sẽn zoe n paam vẽnegre, n lemb kũun ning sẽn yit yĩngrã, n paam pʋɩɩr ne Sɩɩg-sõngo,

5n lemb Wẽnnaam gom-noogã la pãng ning sẽn na n zĩnd nindaar beoogã,

6n yaool n lʋɩ wã, ned ka tõe tɩ b leb n kos sugr yɛs ye. Bãmb lebd n kaada Wẽnnaam Bi-riblã, n paoogd bãmb nebã taoore.

7Sɩd me, pʋʋg sã n paam sa-koom wakat fãa n womd biis neb nins sẽn koaad-a wã yĩnga, pʋʋgã me paamda pʋɩɩr ne Wẽnnaam barkã.

8La sã n yaa gõos ne mo-gõos n yit be bala, b yetame t'a ka sõama ye, n dat n kãab-a wẽnga, la a wat n baasa ne bugum yõogre.

9Baa ne tõnd sẽn gomd a woto wã, m ba-bi-nongdse, tõnd mii d sũurẽ tɩ yãmb sẽn yaa woto wã yaa sõama n yɩɩd a woto, la rẽ tõe n waa ne fãagre.

10Bala, Wẽnnaam ka ka-tɩrlem soaba, n na n yĩm yãmb tʋʋm sõamyã, wall nonglem ning yãmb sẽn wilg Wẽnnaam yʋʋrã yĩnga, ne tʋʋm nins yãmb sẽn maan nin-sõamyã wã yĩng n ket n maandẽ wã ye.

11La tõnd datame tɩ yãmb ned kam fãa kell n wɩng hal tɩ ta wakat saabo, tɩ y tõe n paam saag-sõng meng-menga,

12tɩ y ra wa yɩ kʋɩɩmb ye, la bɩ y maan togs-n-taar ne neb nins sẽn maand tẽeb la sũ-mare, n deegd pʋɩɩr ning Wẽnnaam sẽn kãabã.

13Sɩd me, Wẽnnaam sẽn wa n na n maan kãabg ne a Abrahaamã, bãmb wẽena ne b menga, ned a to sẽn ka be n yɩɩd bãmbã yĩnga, la b wẽena ne b meng

14n yeele: Hakɩɩka, mam na n kɩtame tɩ bark sek-fo, la m na n kɩtame tɩ f yagensã fɩɩg n lebg wʋsgo.

15Yɩɩ woto t'a Abrahaam gũ ne sũ-mare, hal n wa paam bũmb ning Wẽnnaam sẽn kãab-a wã.

16Bala, ninsaalb wẽenda ne bũmb sẽn yɩɩd-ba, la wẽeneg sã n pʋgl gomde, b no‑koɛɛmã fãa sɛtame.

17Woto me, Wẽnnaam sẽn dat n wilg neb nins sẽn na n deeg-b bãmb paoongã tɩ yam ning bãmb sẽn yãkã ka na n viigã, b wẽename.

18Yɩɩ a woto tɩ ne bũmb a yiibã sẽn ka na n viigã, la Wẽnnaam sẽn ka tõe n yag zĩrẽ b pʋgẽ wã, bɩ tõnd paam raood paoosg wʋsgo. Bala, zĩig a yembr tãa tõnd sẽn tõog n kẽ n paam põsã, yaa d sẽn gãd saag-sõng ning Wẽnnaam sẽn da kõt tõndã.

19Saag-sõng‑kãng yaa wa baar sẽn vigl kãenkãe la sẽn tar pãng tõnd sɩɩgã yĩnga. A kẽeme hal n loog fu-lilldgã,

20zĩig ning a Zeezi sẽn deng tõnd taoor n kẽ, n lebg maan-kʋʋd kãsem wa a Melkisedɛk wakat sẽn ka sɛtã yĩnga.

← Chapter 5 Jump to: Chapter 7 →