James 5

Mossi MPBU (WẼNNAAM SEBRE 2014)

← Chapter 4 Jump to:

1Moasã, mam gomda ne yãmba, arzegsã rãmba! Wɩsg-y y meng n yãbe, tood nins sẽn na n wa yãmb zutã yĩnga!

2Yãmb arzɛkã põogame. Zũnzũy rɩɩ yãmb futã.

3Tẽngempiisim n dɩ yãmb sãnemã ne y wanzuri wã, la b tẽngempiismã na n yɩɩ kaset sẽn kaood yãmb bʋʋdo, n sãam yãmb yĩngã wa bugum. Yãmb tigsa paoong moasã wakat sẽn yaa yaoolmã n bĩngi.

4Ade, tẽn-tʋmdb nins sẽn tigs yãmb koodã tɩ yãmb yaool n ka yao-bã kelemdame. Tigsdbã kelems zẽk n taa pãn-kẽemd soabã tʋbẽ.

5Yãmb vɩɩmda rɩ-n-tɩk pʋgẽ, la teed sẽn nags sʋka. Yãmb wuba y mens sãoong daarã yĩnga.

6Yãmb kaoo nin-tɩrg bʋʋd n kʋ-a, la yẽnda ka kɩɩs yãmb ye.

7Woto yĩnga, m ba-biisi, maan-y sũ-mar hal tɩ ta Zu-soabã waoongo. Ad ka-koaad gũuda a pʋtã bi-sõamyã n pid ne sũ-mar a yĩnga, hal t'a paam sigr saaga la bõn-bɩʋʋng saaga.

8Bɩ yãmb me maan sũ-mare, n keng y raoodo, bala, Zu-soabã waoong kolgame.

9M ba-biisi, da yẽgm-y ne taaba, tɩ Zu-soabã ra wa kao yãmb bʋʋd ye. Ad bʋ-kaoodã yɛsa dignoorẽ wã.

10M ba-biisi, dɩk-y Wẽnnaam no-rɛɛsdbã sẽn gom Zu-soabã yʋʋrã yĩngã mamsgo la b sũ-marã tɩ yɩ mamsg yãmb yĩnga.

11Gese, tõnd yetame tɩ neb nins sẽn yals-b kãenkãe wã yaa sũ-noog rãmba. Yãmb wʋmame tɩ b gom a Zoob sũ-marã yelle, la yãmb yãnda baoosg ning Zu-soabã sẽn kõ-a wã. Bala, Zu-soabã pida ne nonglem la nimbãan-zoeere.

12M ba-biisi, sẽn yɩɩd fãa, bɩ y da wẽen ne arzãna, wall ne tẽngã, wall ne wẽeneg buud a to ye. La bɩ yãmb n-yẽe yɩ n-yẽe, tɩ yãmb ayo yɩ ayo tɩ bʋʋd da wa n lʋɩ y zut ye.

13Ned bee yãmb sʋk n namsdẽ? Bɩ a pʋʋse. Ned n tar sũ-noogo? Bɩ a yɩɩl Wẽnnaam yɩɩla.

14Ned n be yãmb sʋkã n ka keeme? Bɩ a bool Wẽnnaam nin-tũusdsã kãsem-dãmbã, la bɩ bãmb tik-a ne kaam ne Zu-soabã yʋʋre, n pʋʋs a yĩnga.

15Tẽeb pʋʋsg na n fãaga bãadã, la Zu-soabã na n yik-a lame, la a sã n da maana yel-wẽna, a na paam sugri.

16Woto yĩngã, vẽneg-y n togs-y taab y yel-wẽna, la y pʋʋs taab yĩnga, tɩ y tõe n paam maagre. Nin-tɩrg pʋʋsgo, a sẽn pʋʋs ne a sũur fãa tara tõogr wʋsgo.

17A Eli dag n yaa ninsaal wa tõndo. A pʋʋsa ne pẽdgre, tɩ saag kõn ni ye, la saag ka tok tẽng yʋʋm a tãab la kiis a yoob ye.

18La a leb n pʋʋsame, la saag yii yĩngr n ni, la tẽng bõn-koaadl woma biisi.

19M ba-biisi, yãmb ned a yembr sã n menem n zãag ne sɩdã, tɩ ned a to leb n tall-a t'a wa a pʋgẽ,

20bɩ y bãng tɩ ned ning sẽn leb n tall-a yel-wẽn-maandã t'a bas meneng sorã n lebg n wa wã, a fãaga ned yõore, la a sõng-a t'a paam yel-wẽn wʋsg sugri.

← Chapter 4 Jump to: