Joel 1

Mossi MPBU (WẼNNAAM SEBRE 2014)

Jump to: Chapter 2 →

1Woto yaa Sẽn-Ka-Saab koɛɛg b sẽn kõ a Petuwɛll biig a Zowɛlle.

2Kãsem-dãmbã, kelg-y-yã! Tẽngã nebã fãa, yok-y y tʋb n kelge! Rẽ yĩnga, bũmb a woto zoe n zĩnda yãmb zamaanẽ, bɩ yaa y yaab-rãmbã zamaanẽ la a zĩnd yã?

3Rɩk-y-yã-a n togs y kambã, tɩ bãmb me wa rɩk-a n togs b kambã, tɩ b kambã me wa rɩk-a n togs zamaan ning sẽn watã!

4Bõn-koaadl nins zũnzũyã sẽn bas n ka rɩ wã, sʋ-kitrzĩgnis n dɩ-ba, sʋ-kitrzĩgnisã sẽn bas b rãmb n ka rɩ wã, nesneed n dɩ-ba, nesneedã sẽn bas bũmb ningã, kalwaar n dɩ-a.

5Sẽn yũ-b rãam n tuumdẽ wã, nek-y-yã, yãb-y-yã! Yãmb a rã-yũudbã fãa, wiis-y-yã, yãmb sẽn ka na n leb n paam vĩy biis koom n yũ wã yĩnga!

6Bala, bu-zẽng n wa n yãmb m tẽngã. A tara pãnga, tɩ b ka tõe n sõd-a n sɛ ye. A tara yẽn wa gɩgemd yẽna, t'a yeerã keglem yaa wa gɩgem-yãang yeere.

7A sãama mam reezẽ tɩɩsã, la a sãam m kankamsã zãnga. A fʋka reezẽ tɩɩsã pagd n bas-b pɛɛlg faddd...

8Yãb n wiis wa pʋg-paal sẽn sẽgen bot n yãbd a pʋg-sademdẽ sɩda!

9Bõn-koaadl kũuni, ne bõn-yũudl kũun ka leb n wat Sẽn-Ka-Saab roogẽ wã ye. Maan-kʋʋdbã sẽn tʋmd Sẽn-Ka-Saab yĩngã bee sũ-sãang pʋga.

10Pʋtã fãa sãamame, tẽn-gãongã bee sũ-sãang pʋga. Bala, b sãama koodã, reezẽ rãam ka leb n beẽ ye, kaam ka leb n beẽ ye.

11Ka-koaadba, maan-y sũ-sãanga, sẽn send-b reezẽ tɩɩse, wiis-y-yã, bala, bɩle wã ne orzã sãamame, pʋtã bõn-koaadl sãama zãnga.

12Reezẽ tɩɩsã kʋɩɩme, tɩ kankamsã wãke. Gernaad tɩɩsã, ne komsã la pom tɩɩsã, ne pʋtã pʋs tɩɩs fãa kʋɩɩme, ninsaalbã kɩdeng sɛɛme.

13Maan-kʋʋdba, sẽgn-y bot n yãb n wiisi! Tẽn-kug zĩisẽ tʋmtʋmdba, kelm-y-yã! Yãmb dãmb sẽn tʋmd mam Wẽnnaamã yĩngã, wa-y-yã, yeelg-y bot yʋngã tõre! Bala, b ka leb n wat ne bõn-koaadl kũuni, ne bõn-yũudl kũun tõnd Wẽnnaamã roogẽ ye.

14Yãk-y daar no-loeer yĩnga, moon-y tigin-kãseng daare, tigm-y kãsem-dãmbã, ne tẽngã nebã fãa, tigm-y-b Sẽn-Ka-Saab sẽn yaa yãmb Wẽnnaamã roogẽ, la y kelem n bool Sẽn-Ka-Saabo!

15Kayto, ad yaa toog daare! Bala, Sẽn-Ka-Saab daarã kolgdame. Daarã wata wa sãoong sẽn yit Pãng-Soab nengẽ.

16Tõnd dɩɩbã sɛ d nifẽ, sũ-noogã ne kɩdengã sɛɛ tõnd Wẽnnaamã roog pʋgẽ!

17Bõn-buudã pa b bogdẽ n ka yi ye. Bao wã yaa vɩɩdo, tɩ koodã bĩngr zĩis sãam zãnga, bõn-koaadlã sẽn kʋɩ wã yĩnga.

18Rũmsã yãbdame, tɩ niigã zoet n ka mi b sẽn kẽedẽ ye. Bala, b ka leb n tar yamd ye. Baa rũm-bãoonegã namsdame.

19Sẽn-Ka-Saabo, yaa yãmb la m boonda! Bala, bugmã rɩɩ we-raoogã yamd zãnga, tɩ bug-witmã rɩ pʋtã pʋsẽ tɩɩsã fãa.

20Hal baa weoogã rũms sesd n baooda yãmba, bala, kʋɩlsã koom kʋɩɩme, la bugmã rɩɩ we-raoogã yamd zãnga.

Jump to: Chapter 2 →