Jonah 4

Mossi MPBU (WẼNNAAM SEBRE 2014)

← Chapter 3 Jump to:

1Sẽn-Ka-Saab sẽn maan bũmb ningã ka tol n yɩ a Zonaas noog ye. Dẽ kɩtame t'a Zonaas sũurã yiki.

2La a Zonaas pʋʋsa Sẽn-Ka-Saab n yeel yaa: «Sẽn-Ka-Saabo, ka woto la m sẽn da pĩnd n yeel mam sẽn wa n ket n be m tẽngẽ wã sɩda? Yaa rẽ yĩng la m sẽn da zoet n na n kẽng Tarsɩɩsã. Bala, mam miime tɩ yãmb yaa Wẽnnaam, y yaa sugr kõata, la nimbãan-zoɛta, la yãmb sũurã ka yikd tao-tao ye. Y tara nonglem wʋsgo, la yãmb basda sɩbgr ning y sẽn dag n tog n sɩbgã tɩ vaale.

3La sẽn lebg woto wã, Sẽn-Ka-Saabo, bɩ y reeg m vɩɩmã. Bala mam sẽn kiid n são m sẽn vɩ.»

4La Sẽn-Ka-Saab leoka a Zonaas yaa: «Fo tagsdame tɩ fo tara bʋʋm la f sẽn yikd f sũurã woto wã bɩ?»

5Dẽ, a Zonaas yii Niniiv tẽngã pʋga, n kẽng tẽngã yaang n tɩ zĩndi. La a tii sẽok beenẽ n kẽ a maasmẽ n zĩ n gũud bũmb ning sẽn na n paam Niniiv tẽngã.

6La Wẽnnaam Sẽn-Ka-Saab kɩtame tɩ tɩɩg yi tẽn-gãongã zug t'a maasmã bui a Zonaase, t'a sũ-pa-noaangã tõe n sɛ. La a Zonaas sũurã yɩɩ noog wʋsg tɩɩgã yĩnga.

7La a vẽkembeoog yi-beoog pĩnda, Wẽnnaam kɩtame tɩ zũnzũur wa kẽ tɩɩgã n dɩ-a t'a zelge.

8La sõ-bɩɩmd wakate, Wẽnnaam kɩtame tɩ sob-tʋʋlg yi yaang sẽnẽ n wa, la wĩntoogã pãba a Zonaas zugã t'a pãngã sɛ t'a lʋɩ. Dẽ, yẽnda yeelame yaa: «Mam sẽn kiid n são m sẽn vɩ.»

9La Wẽnnaam soka a Zonaas yaa: «Dẽ yĩnga, fo sẽn puug f sũur tɩɩgã kũum yĩngã, fo tara bʋʋm sɩda?» La a Zonaas leoka Wẽnnaam n yeel yaa: «M sũurã sẽn puug tɩ m dat n ki wã, m tara bʋʋm.»

10La Sẽn-Ka-Saab yeela a Zonaas yaa: «Fo yãbda tɩɩgã nimbãanega, la yaool n ka foom n kɩt t'a yi, la ka foom n kɩt t'a bɩ me ye. Tɩɩgã yii yʋn-yɛnga, n lebg n ki yʋn-yɛnga.

11Niniiv yaa tẽn-kãsenga. Neb sẽn vɩ-a pʋgẽ sõor yɩɩda neb tus koabg la pisi, tɩ rũms wʋsg-wʋsg me be beenẽ. La tẽngã nebã ka tol n mi sẽn yaa sõamã ne wẽng n bak ye. Rẽ wã, mam na n yɩ a wãn n ka zoe tẽn-kãngã nimbãanega.»

← Chapter 3 Jump to: