Nahum 1

Mossi MPBU (WẼNNAAM SEBRE 2014)

Jump to: Chapter 2 →

1Seb-kãngã yaa sɩbgr koɛɛg sẽn kẽed ne Niniiv tẽngã wɛɛngẽ. Yaa Sẽn-Ka-Saab n vẽneg Ɛlkoos tẽng rao a Nahum koe-kãngã.

2Sẽn-Ka-Saab yaa Wẽnnaam sẽn ka rat tɩ b rɩk bãmb waoogrã n kõ Wẽnnaam a to ye. Sẽn-Ka-Saab rokda b sũuri, bãmb sũ-puug-kãsengã pʋga. Bãmb dokda b sũur ne kɩɩsdbã. Bãmb ka basd b bɛɛbã taal ye.

3Sẽn-Ka-Saab yaa sũ-mar soaba. Bãmb pãngã yaa kãsenga. Bãmb ka basd koangd n ka sɩbg-a ye. Bãmb sã n kẽnda, sob-kãseng n yikdi.

4Sẽn-Ka-Saab sã n tãs ko-kãsengã, a kʋɩtame Bãmb kɩtdame tɩ kʋɩlsã fãa kʋɩtẽ, tɩ Basan yam-maasã kʋɩtẽ, tɩ Karmell tãngã lʋgrẽ yamdã zelgdẽ, tɩ Libã tɩ-puudã kʋɩtẽ.

5Sẽn-Ka-Saab kẽnda tãmsã zut tɩ b miimdẽ, tɩ kunkubã sirgdẽ. Bãmb tabda tẽn-gãongã t'a wʋgemdedẽ, dũniyã gill fãa ne a nebã rigda bãmb taoore.

6Sẽn-Ka-Saab sũurã sã n puugi, ãnda n tõe n põse? Ãnda n tõe n põs bãmb sũ-puugrã? Bãmb sũ-puugrã rɩta wa bugum, tɩ baa pĩig kugã pusd bãmb taoore

7Sẽn-Ka-Saab yaa sõngo, bãmb yaa zĩ-lilldg yel-pakr wakate. Bãmb geta sẽn solgd-b bãmb nengẽ wã yelle.

8La wa koom sẽn kãagd bũmb fãa to-to n loogdẽ wã, Sẽn-Ka-Saab na n menesa b bɛɛbã zãnga. Bãmb na n dig-b lame n tɩ kʋ-b zãng fasɩ.

9Saag-wẽn-bʋs la yãmb saagd ne Sẽn-Ka-Saabo? Bãmb na n menesa b bɛɛbã yel-pakrã ka na n yɩ naoor a yiib ye.

10Baa bɛɛbã sã n kal taab wa gõose, la ba b sã n yũu rãam tɩ b nens yilimdẽ, bugum n na n dɩ-b zãng wa mo-koeemse.

11Niniiv tẽnga, ned ning sẽn saagd n dat n zab ne Sẽn-Ka-Saabã yii fo pʋgẽ. Ned ning sẽn da saagd n dat n wa ne sãoongã yii fo pʋgẽ.

12Ad Sẽn-Ka-Saab sẽn yet Zʋʋda nebã: Baa yãmb bɛɛbã fãa sã n naag taaba, baa b waooglmã ne b pãngã sẽn zem to-to, b na n menemame tɩ bũmb ka kell ye. Mam sẽn bas tɩ b namsd yãmb woto wã, Yaa sẽn na yɩl n da leb n nams yãmb ye.

13Moasã, mam na n kaoo yãmb yubl balgrã, la m kao y bãensã.

14Niniiv tẽnga, ad Sẽn-Ka-Saab sẽn yet fo wɛɛngẽ: «Fo yʋʋrã na n menema zãnga. Mam na n sãama f raad wẽn-naandsã, ne f kut wẽn-naandsã sẽn be f pʋʋsg roogẽ wã. Mam na n segla f yaoogo, bala, fo ka tar yõod baa bilf ye.»

Jump to: Chapter 2 →