Titus 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1La foom, zãms nebã bũmb nins sẽn zems ne tẽebã yẽbg sõngã.

2Zãms nin-kẽembã tɩ b yɩ yõk-m-mens-rãmba, la b yɩ neb sẽn tar waoogre, la b yɩ mi-m-mens-rãmba, la b yɩ sõama tẽebã pʋga la nonglem pʋga, la b yɩ sũ-maasem-dãmba.

3Wilg pʋg-yãansã me tɩ b tog n paama yel-manesem sẽn yaa sõama, tɩ b ka tog n yɩ nin-sãbsdba, wall rã-yũudb ye. Bãmb tog n kõo

4sagl sõamyã, sẽn na yɩl n zãms pʋg-bi wã tɩ b

5nong b sɩdba ne b kambã, la b yɩ mi-m-nems rãmba, la neb sẽn ka maand rẽgd ye, la b ges b zags yell neere, la b yɩ pʋg-sõamyã, sẽn sakd b sɩdba tɩ Wẽnnaam koɛɛgã ra paam tʋʋsg ye.

6Sagl kom-bɩɩsã tɩ b yɩ mi-m-nems-rãmb bũmba fãa pʋgẽ.

7La fo mengã yɩ mamsg ne tʋʋm-sõamyã maanego, la f zãms nebã ne koɛɛg sẽn yaa sɩda la sẽn zems reegre.

8La f gom gom-tɩrs b sẽn kõn tõog n dõd-f ye, tɩ yãnd na yõk nin-kɩɩsdbã, la tɩ b kõn paam bõn-wẽng tõnd zug n gom ye.

9Sagl yembsã tɩ b sak b zu-soben-dãmba bũmb fãa pʋgẽ, n maan sẽn noom-ba, la b ra yɩ kɩɩsdb ye,

10la b ra zuk bũmb ye, la b maan pʋ-peelem sõama wakat fãa, t'a tõe n kɩt tɩ Wẽnnaam sẽn yaa tõnd fãagdã koɛɛgã paam waoogr bũmb fãa pʋgẽ.

11Wẽnnaam puka b barkã, bark ning sẽn wat ne fãagr ninsaalbã fãa yĩngã.

12A zãmsda tõnd tɩ d bas wẽn-kɩɩsgo la dũniyã ratem wẽnsã la d vɩɩmd zamaan‑kãnga pʋgẽ ne gũus-m-menga la tɩrlem la d sak Wẽnnaam,

13n gũud tõnd Wẽnnaam sẽn yaa kãseng la fãagdã, a Zeezi Kiris pukrã sẽn wat ne sũ-noogã ziirã.

14A Zeezi Kiris kõo b meng tõnd yĩnga, tɩ fãag tõnd ne yel-wẽn fãa n kɩt tɩ tõnd lebg bãmb neb b sẽn yɩlge, la sẽn wɩngd ne tʋʋm-sõamyã maanego.

15Fo sẽn tog n maan la a woto, sagl nebã la f leng-b ne noore. Da sak tɩ ned paoog-f ye.

← Chapter 1 Jump to: Chapter 3 →