1 Timothy 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Dẽ, mam saglg yaa tɩ y reng n kos Wẽnnaam, n pʋʋse, n yõk sɛɛga, la y pʋʋs Wẽnnaam bark neba fãa yĩnga:

2rĩm-dãmb yĩnga, neb nins fãa sẽn so naamã yĩnga, tɩ tõnd tõe n vɩ ne laafɩ la bãane, ne Wẽnnaam sakre, la ne waoogre.

3Yaa woto n be neer Wẽnnaam nifẽ, la a noom bãmb sẽn ya tõnd fãagdã.

4Bãmb daab yaa tɩ neba fãa paam fãagre, la b tõog n bãng sɩdã.

5Bala, Wẽnnaam a yen tãa bal n be, sɛ-yõakd a yen tãa bal n be Wẽnnaam ne nebã sʋka: yaa dao sẽn boond t'a Zezi Kirist,

6soab ning sẽn kõ a meng tɩ ra neba fãa wã. Yõwã yaa kaset sẽn kɩs a wakate.

7Wẽnnaam yãka maam tɩ m moon kaset kãnga, la m yɩ tẽn-tʋmda -- mam yeta sɩda, mam ka yagd ye --, la m zãms bu-zẽmsã ne tẽebo la ne sɩda.

8Dẽ, mam datame tɩ nebã zẽk nus sẽn ya yɩlma, n pʋʋs Wẽnnaam zĩig fãa, tɩ sũ-kiiri la nokoɛɛm kaẽ ye.

9Sã n yaa ne pagbã, b tog n yera fut sẽn ya sõama n zems gesgo, la ne sik-m-menga. Bɩ b nagmã ra yɩ zutã pãnengo, wall sãnem, wall kĩndi, wall fut ligd sẽn ya toog yeelgrẽ ye.

10Ayo! B tog n nagsa b mens ne tʋʋm sõamy maanego, wa sẽn zems pagb sẽn sakd Wẽnnaam sẽn tog n maane.

11Pagbã tog n deega zãmsg sĩndim la sakr meng-meng pʋgẽ.

12Mam ka kõt pag noor t'a zãms neba, wall a soog rao ye. A tog paa sĩndim pʋgẽ.

13Bala, Wẽnnaam deng n naana a Adam pipi, n yaool n naan a Ɛɛve.

14La sẽn paase, ka a Adam la waafã belg n tõog ye. Yaa pagã n sak belgrã, n kɩɩs Wẽnnaam noor n beeg bãmba.

15Baoosgo, a na n paama fãagre, a sẽn lebg ma wã yĩnga, a sã n modg ne tẽebo, la nonglem, la welg toor Wẽnnaam yĩnga, la gũus-m-menga.

← Chapter 1 Jump to: Chapter 3 →