2 Corinthians 13

Mossi Moore (KÃAB-PAALGÃ KOE-NOOGO)

← Chapter 12 Jump to:

1Mam wata yãmb nengẽ naoor a tãab-n-soaba. Yɛla fãa na n paama manegre, ne neb a yiib bɩ a tãab kaseto.

2Mam sẽn dag n zĩnd yãmb nengẽ naoor a yiib-n-soabã, mam dag n zoee n togsa yãmb bõn-kãngã, la dũnna, mam sẽn ka be yãmb nengẽ wã, mam leb n deng n togsd-a-la neb nins sẽn maan yel-wẽna wakat sẽn loogã, la neb a taabã fãa. Mam sã n lebg n wa yãmb nengẽ, m ka na n bas ned baa yembr ye.

3Bala, yãmb baooda bãnd sẽn wilgd tɩ Kirist tũnugda maam n gomda. Bãmb yaool n ka pãn-komsem soab yãmb yĩng ye, la b yaa pãn-kãseng soab yãmb sʋka.

4Bala, b kaa a Zezi da-pɩk zug b pãn-komsem yĩnga, la bãmb vɩɩ ne Wẽnnaam pãnga. Tõnd me yaa pãn-komsem dãmb a Zezi tũudmã pʋgẽ, la tõnd vɩɩ ne bãmba n tʋmd yãmb yĩnga, ne Wẽnnaam pãnga.

5Fees-y y mens y toore, n ges yãmb sã n bee tẽebã pʋgẽ. Mak-y y mens y toor n gese. Yãmb ka mi t'a Zezi Kirist bee yãmb pʋsẽ laa? Sã n ka rẽ, dall makrã kɩtdame tɩ yãmb ka paamd tõogr ye.

6La mam tẽedame tɩ yãmb miime tɩ makrã ka kɩtd tɩ tõnd ka tõogdẽ ye.

7Baoosgo, tõnd pʋʋsda Wẽnnaam yãmb yĩng tɩ y kõn maan bũmb baa yen sẽn ya wẽng ye. Ka tɩ wilg tɩ tõnd tõogda makr pʋgẽ ye, la yaa tɩ yãmb na maan sẽn ya neere, baa sã n wẽnda wa tõnd ka paamd tõogr makr pʋgẽ.

8Bala, tõnd ka tar pãng n na n zab ne sɩd ye, tõnd sẽn tar pãng ningã yaa sẽn na n sõng sɩdã.

9Tõnd sẽn wat n maan sũ-noog d pãn-komsmã wakatã tɩ yãmb tara pãnga, la tõnd sẽn kot bũmb ninga d pʋʋsg pʋgẽ, yaa tɩ yãmb na zems zãnga.

10Yaa rẽ yĩng tɩ mam gʋlsd yãmb bõn-kãense, wakat ning mam sẽn ka be yãmb nengẽ wã, tɩ mam sã n wa n wa yãmb nengẽ, mam kõn yɩ nin-toaag ne yãmba, ne noor ning Zu-soabã sẽn kõ maam yãmb sõngr yĩnga, la ka y sãoong yĩngã ye.

11La sẽn keta, m ba-biisi, paam-y sũ-noogo, modg-y n zems-y zãnga. Sagl-y taaba, paam-y yam a yembre, zĩnd-y ne taab ne bãane. La Wẽnnaam sẽn ya nonglem la laafɩ soabã na pa ne yãmba.

12Pʋʋs-y taab ne mokr sẽn ya sõama. Wẽnnaam nebã fãa pʋʋsda yãmba.

13Bɩ Zu-soab a Zezi barkã la Wẽnnaam nonglemã, la Sɩɩg-sõng lagem-n-taar zĩnd ne yãmb fãa.

← Chapter 12 Jump to: