2 John 1

Mossi Moore (KÃAB-PAALGÃ KOE-NOOGO)

Jump to:

1Kãsma n tʋmd seb-kãnga pag a Kirya sẽn ya Wẽnnaam nin-tũusdgã ne a kambã mam sẽn nong sɩd pʋgẽ wã. La ka maam m ye n nong-b ye, neb nins fãa sẽn bãng sɩdã me nong-b lame,

2sɩdã sẽn be tõnd pʋgẽ, la sẽn na n pa ne tõnd wakat sẽn kõn sa wã yĩnga.

3Barka, la nimbãan-zoeere, la laafɩ sẽn yit tõnd ba a Wẽnnaam nengẽ, la bãmb Bi-ribl a Zezi Kirist nengẽ na n paa ne tõndo, sɩdã ne nonglema pʋgẽ.

4Mam paama sũ-noog wʋsgo, mam sẽn mik tɩ fo kamb kẽer n kẽnd sɩdã pʋgẽ, wa sẽn zems tõog ning d ba wã sẽn kõ tõndã.

5Moasã, Kirya, bũmb ninga mam sẽn gʋlsd foomã ka tõ-paalg ye, yaa tõog ning tõnd sẽn dag n paam hal sɩngrẽ wã, mam kota foom tɩ d nong taabã.

6La nonglem yaa tɩ kẽn wa sẽn zems Wẽnnaam tõodã. Yaa tõ-kãng pʋgẽ la yãmb tog n kẽne, wa yãmb sẽn zãms hal sɩngrẽ wã.

7Bala, bɛlgdb wʋsg n kẽ dũniyã pʋgẽ n ka kɩt kaset t'a Zezi waa ne yĩng ye. Ad yaa yẽ soab la bɛlgdã la Kirist kɩɩsdã.

8Gũus-y y mens n da wa menes tõnd tʋʋmdã biis ye, la tɩ y na reeg keoor sẽn ya kãsenga.

9Ned ning fãa sẽn loogd rẽnda, n ka paad Kirist zãmsgã pʋgẽ ka tar Wẽnnaam ye, la ned ning sẽn paad zãmsgã pʋgẽ tara ba wã la Bi-riblã.

10Ned sã n wa yãmb nengẽ tɩ ka ne zãms-kãnga, bɩ y ra reeg-a y yiri, la y pʋs n da pʋʋs-a tɩ wẽnd na kaoos-a ye.

11Bala, ned ninga sẽn pʋʋs-a tɩ wẽnd na kaoos-a naagda yẽnda a tʋʋm-wẽnsã pʋgẽ.

12Baa ne mam sẽn tar bũmb wʋsg sẽn na gʋls yãmbã, mam ka tʋlg n na n gʋls-b ne seb-vãoogo la ne gʋls-koom ye. Mam maanda tẽeb tɩ m na n waa yãmb nengẽ, n gom ne yãmb neng ne nenga, tɩ tõnd sũ-noogã na pid zãnga.

13Fo ba-bi-poakã sẽn ya Wẽnnaam nin-tũusdgã kambã pʋʋsda foom.

Jump to: