2 Peter 3

Mossi Moore (KÃAB-PAALGÃ KOE-NOOGO)

← Chapter 2 Jump to:

1Mam zo-nongdse, ade, zoe n yaa sebr a yiib-n-soab mam sẽn gʋlsd yãmba. Sɛb a yiibã fãa pʋse, mam tẽegda yãmba, sẽn na n yɩl tɩ yãmb yamã puk vẽenega,

2tɩ yãmb tõog n tẽeg Wẽnnaam no-rɛɛs sõmyã sẽn dag n deng n togsã, la tõnd Zu-soab la d Fãagdã tõogã yãmb tẽn-tʋmdbã sẽn zãms yãmbã.

3Sẽn deng bũmb fãa, bãng-y tɩ yaoolem wakate, neb sẽn laad neb n na n zĩndi. B na n yaala yãmba, b na n yɩɩ neb sẽn sakd b mens yĩngã ratem.

4La b na n yeelame yaa: "Bãmb sẽn da kãab tɩ b na n lebg n waame wã, b bɛɛ?"

5Sɩd me, yaa ne yamleoog la b yĩm tɩ wakat sẽn looge, saasẽ la tẽng zĩndame. Wẽnnaam gomame tɩ tẽng puk koomã sʋka, la yɩɩ koomã la Wẽnnaam kɩt tɩ lebg tẽnga.

6La b yĩmame tɩ tẽngã Wẽnnaam sẽn naan a woto wã, yaa ko-kãsengã n leb n dɩ-a t'a sãame.

7La ne gom-kãng bala, saasẽ la rũnna dũni wã bĩnga bugum yĩnga. B bĩng-b-la b sẽn na n kao nin-wẽnsã bʋʋd n kɩt tɩ b sãamã daar yĩnga.

8Mam zo-nongdse, bũmb a yen n be yãmb sẽn ka tog n yĩm ye, yaa tɩ ne Zu-soabã, daar a yen yaa wa yʋʋm tusri, la yʋʋm tusr yaa wa daar a yen.

9Wẽnnaam ka basd tɩ bãmb sẽn kãabã kaoos n pids wa neb kẽer sẽn tagsdã ye. La yaa tɩ bãmb maanda sũ-mar ne yãmba, b sẽn ka rat tɩ ned baa a yen sãama yĩnga. Bãmb ratem yaa tɩ yãmb fãa tek yam n kos sugri.

10Zu-soabã daar na n waa wa wagdre. Badaare, saasẽ na n looga ne bʋr-kãsenga. Bugma sẽn kok teed ninsã na n yẽnegame, la dũni wã ne bũmb nins sẽn be a pʋgẽ wã na n dɩɩ bugum.

11Rẽ wã yĩnga, bõn-kãensã fãa sẽn na n wa n yẽnegã yĩnga, ges-y tɩ yãmb yel-manesmã ne y Wẽnnaamã tũub yɩ sõama!

12Gũu-y-yã, la y modg n kɩt tɩ Wẽnnaam daarã wa tao-tao. Yaa daar ning saasẽ sẽn kok bugmã sẽn na n yẽneg tɩ teedã fãa sẽn kok bugum na n yẽnegã.

13La tõnd gũuda Wẽnnaam sẽn pʋlem saasẽ paalg la dũni paalgã, tɩ tɩrlem na n zĩnd a pʋgã.

14Mam zo-nongdse, gũudum kãngã pʋgẽ, modg-y tɩ bãmb na mik tɩ yãmb ka tar rẽgdo, la tɩ y ka tar bũmb sẽn ka zemse, la tɩ y bee laafɩ pʋga.

15Bãng-y tɩ tõnd Zu-soabã sẽn maand sũ-marã, yaa tɩ yãmb na paam fãagre, wa tõnd ba-bi-nongr a Poll sẽn gʋls me n wilg yãmb wa sẽn zems yam ning Wẽnnaam sẽn kõ yẽnda wã.

16A Poll maanda a woto a sɛbã fãa pʋse, sɛbã a sẽn gʋls n gomd bõn-kãens yelle, la sẽn tar koees b wʋmb sẽn ya toogo, tɩ neb nins sẽn ka mi wã, la sẽn nan ka kɩ-b yẽgã toeemd b võor wa b sẽn toeemd gʋls-sõmyã fãa võor tɩ gõdg n sãamd-bã.

17Woto yĩnga, m ba-bi-nongdse, yãmb sẽn pĩnd n paam tɩ b keoog yãmbã, maan-y gũusgu, tɩ neb nins toog sẽn ka be ne Wẽnnaam sakrã bʋdgrã da wa tus yãmb tɩ y ka leb n yas kãenkãe yɛs ye.

18Bɩ yãmb bɩ tõnd Zu-soaba la d Fãagd a Zezi Kirist barkã pʋgẽ, la y bãngd-b yellã n paasdẽ. Bãmb n so ziir sẽn sɩng ne moasã hal tɩ ta wakat sẽn kõn sa.

← Chapter 2 Jump to: