2 Thessalonians 3

Mossi Moore (KÃAB-PAALGÃ KOE-NOOGO)

← Chapter 2 Jump to:

1La koɛɛg sẽn keta, d kota yãmb tɩ y pʋʋs tõnd yĩnga, tɩ Zu-soabã goamã tõe n kell n saage, la a paam waoogr wa a sẽn tar yãmb nengẽ wã,

2la tɩ Zu-soaba na yols tõnd ne neb nins sẽn ka yam la sẽn ya wẽnsã. Bala, ka b fãa n tar tẽeb ye.

3La Zu-soabã yaa sɩd soaba, la b na n kɩtame tɩ yãmb yals kãenkãe, la b gũ yãmb tɩ wẽng soabã da tõog-y ye.

4Tõnd pʋs peela ne yãmb Zu-soabã pʋgẽ, tɩ yãmb maanda bũmb nins tõnd sẽn yet yãmbã, la tɩ y na n kell n maaname.

5Bɩ Wẽnnaam tɛ yãmb sũyã n tees Zu-soabã nonglmã la Kirist sũ-marã.

6D ba-biisi, tõnd yeta yãmb ne tõnd Zu-soab a Zezi Kirist yʋʋr tɩ y zãag y mens ne ba-biig ning fãa sẽn ya kʋɩɩma, la sẽn ka tũud minind nins tõnd sẽn wilg yãmbã ye.

7Yãmb mens mii y sẽn tog n maan togs-n-taar ne tõnd to-to, bala, tõnd ka yɩ kʋɩɩmb yãmb sʋk ye.

8Tõnd ka rɩ ned baa a yembr rɩɩb zaalem ye, la tõnd modga d mens n tʋm wĩndg ne yʋngo, tɩ d da wa n yɩ zɩɩb yãmb ned baa a yembr yĩng ye.

9Ka tɩ tõnd dag n ka tar noor tɩ zĩnd tɩ yãmb ges tõnd yell ye, la yaa tɩ tõnd mensã da rat n kõo yãmb mamsg sẽn na tũ.

10Bala, tõnd sẽn dag n be ne yãmbã, tõnd dag n yeela yãmb a woto: Ned sã n ka rat n tʋm bɩ a ra rɩ me ye.

11Tõnd yaool n wʋmame tɩ yãmb neb kẽer yaa kʋɩɩmba. B sẽn dag n tog n tʋmã, yaa neb a taab yɛl n pak-ba.

12Tõnd kota nin-kãense, n sagend bãmb ne Zu-soab a Zezi Kirist yʋʋr tɩ b maag b mens n tʋm n paam b toorẽ dɩɩb n dɩ.

13La ne yãmba, m ba-biisi, bɩ y da yɛ ne tʋʋm-sõamyã maaneg ye.

14Ned sã n ka sak bũmb ning tõnd sẽn yet seb-kãngã pʋgẽ wã, bãng-y-yã a soaba, la y ra paam lagem-n-taar baa bilf ne-a ye, tɩ yãnd yõk-a.

15Da ges-y-yã-a wa y bɛ ye, keoog-y-yã-a wa y ba-biiga.

16Bɩ Zu-soabã sẽn kõt laafɩ wã meng kõ yãmb vɩ-bãane wakat fãa, bũmb fãa pʋgẽ. Bɩ Zu-soabã zĩnd ne yãmb fãa!

17Yaa maam a Poll nug n gʋls pʋʋsmã. Maam n tik m nug sɛba fãa pʋse. Mam gʋlsem la woto.

18Bɩ tõnd Zu-soab a Zezi barkã zĩnd ne yãmb fãa.

← Chapter 2 Jump to: