Ephesians 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Yãmba, yãmb dag n yaa kũum y beegrã ne y yel-wẽnã yĩnga.

2Pĩnda, yãmb dag n kẽnda yel-wẽn kãens pʋgẽ wa sẽn zems dũni-kãngã sẽn kẽnd to-to wã, n sakd yĩngr pãng naabã, sɩɩg ning sẽn tʋmd wẽn-kɩɩsdbã pʋgẽ mosã wã.

3Tõnd fãa me rag n bee bãmb sʋka, la tõnd dag n vɩɩ wa sẽn zems tõnd yĩngã datem wẽnsã. Tõnd dag n tʋmda wa tõnd yĩngã sẽn date, la sẽn zems tõnd tagsdo, la tõnd dag n yaa neb sẽn na n paam Wẽnnaam sɩbgr wa neb a taabã.

4La Wẽnnaam sẽn tar nimbãan-zoeer wʋsgã, la bãmb sẽn nong tõnd ne nonglem kãsengã yĩnga,

5baa tõnd sẽn dag n ya kũum d beegrã yĩngã, Wẽnnaam kõo tõnd vɩɩm Kirist pʋgẽ. Yaa Wẽnnaam barkã yĩng la yãmb paam fãagre.

6Wẽnnaam naaga tõnd ne Kiristã n vʋʋge, n kɩt tɩ tõnd naag ne bãmb n zĩnd arzãn pʋga, Kirist maasem yĩnga,

7tɩ wakat sẽn wate, bɩ bãmb tõe n wilg tõnd bãmb bark kãsengã, b sẽn kõ tõnd sõmblem Kirist maasem yĩngã.

8Sɩd me, yaa Wẽnnaam barkã yĩng la yãmb paam fãagr tẽeb yĩnga. Yãmb sẽn paam fãagrã, ka ne y mens pãng ye, yaa Wẽnnaam kũuni.

9Ka ne tʋʋm ye, tɩ ned baa a yen da wa pẽg a meng ye.

10Bala, tõnd yaa Wẽnnaam bõn-naandse. B naana tõnd Kiristã maasem yĩnga, tɩ tõnd na maan tʋʋm sõama nins bãmb sẽn dag n pĩnd n segl tɩ tõnd wa maanã.

11Dẽ wã, tẽeg-y tɩ wakat sẽn looge, yãmb dag n yaa bu-zẽms yĩng wɛɛngẽ, tɩ neb nins sẽn yet tɩ b yaa zũnsi, tɩ yaool n ya bãong ninsaal nus sẽn kẽesã rãmb n dag n boond yãmb a bu-zẽmsã tɩ moose.

12Wakat kãng tɩ yãmb dag n zãra ne Kiristã, la yãmb da ka tar noor tɩ lagem ne Israyɛl nebã ye. Sẽn paase, yãmb dag n zãra ne lagem-n-taar ning Wẽnnaam sẽn dag n kãabã, la y dag n ka tar tẽeb pidsg gũudum ye. Y dag n vɩɩ dũni pʋgẽ n ka tar Wẽnnaam ye.

13La moasã, Kirist pʋgẽ, yãmb sẽn dag n zãr wakat sẽn loogã, Kirist zɩɩmã maasem yĩnga, yãmb pẽnegame.

14Bala, yaa Kirist n ya tõnd laafɩ. Bãmb n kɩt tɩ sẽn ya-a Zuif la sẽn ka-a Zuif lebg buud a yembre, n wã welgr lalgã sẽn ya beemã sẽn dag n be sʋkã.

15Kirist yiisa a Moyiis tõodã ne a noyã la a minindã, n na n kɩt tɩ buud a yiibã naag taab bãmb pʋgẽ n yɩ bu-paalg a yembre, n kɩt tɩ laafɩ zĩndi,

16la b yiis yell ning sẽn dag n be buud a yiibã ne Wẽnnaam sʋkã, n kɩt tɩ b lebg yĩng a yembre, la b kɩt tɩ beemã sa, da-pɩkã maasem yĩnga.

17Kirist waa n moona yãmb dãmb sẽn da zãrã laafɩ koe-noogã, la b moona neb nins sẽn da pẽ wã me.

18Bala, Kirist maasem yĩnga, tõnd ned kam fãa tara noor tɩ wa d ba wã nengẽ, Sɩɩg-sõng a yembr pʋgẽ.

19Dẽ wã yĩnga, yãmb ka leb n ya sãamba, wall nin-loogds ye. Yãmb yaa buud a ye ne Wẽnnaam nebã, n ya Wẽnnaam zakã neba.

20B mee yãmb yẽbgr ning tẽn-tʋmdbã ne Wẽnnaam no-rɛɛsdbã sẽn yẽbgã zugu, la yaa Kirist mengã n ya roogã pãng kugri.

21Kirist maasem yĩnga, roogã gill fãa naagda taab n yikdẽ, n lebgd ro-sõng Zu-soabã pʋgẽ.

22Yãmb sẽn be Kirist pʋgẽ wã, yãmb me naaga meebã pʋgẽ n lebg Wẽnnaam Sɩɩgã roogo.

← Chapter 1 Jump to: Chapter 3 →