John 13

Mossi Moore (KÃAB-PAALGÃ KOE-NOOGO)

← Chapter 12 Jump to: Chapter 14 →

1Sẽn deng zʋʋg-n-basã kibsã, a Zezi sẽn mi tɩ bãmb wakat taame tɩ yi dũni kãngã n kẽng b ba nengẽ wã, bãmb nonga b nebã sẽn dag n be dũni pʋgẽ tɩ bãmb nongẽ wã, hal ne nonglem tɛkẽ.

2Rɩɩbã wakate, rẽ tɩ Sʋtãanã dag n ninga a Sɩmo biig a Zudas sũurẽ t'a zãmb a Zezi n yõk n kõ.

3A Zezi sẽn mi tɩ b ba wã ninga bũmb fãa bãmb nugẽ, la b mi tɩ bãmb yii Wẽnnaam nengẽ n wa, la tɩ b le lebda beene wã,

4b yik n basa rɩɩbã, n yees b futã, la b rɩk peend n sẽbg b sɛɛga.

5Rẽ poore, b pʋdga koom laagẽ, n sɩng n waasd b karen-biisã nao la b yẽesd-b ne peendã sẽn sẽbg bãmb sɛɛgã.

6Bãmb taa a Sɩmo Pɩyɛɛr, la a yeela bãmb yaa: Zu-soaba, yãmb n na n waas mam nao wã?

7A Zezi leoka yẽnda n yeele: Fo ka wʋmd mam sẽn maandã võor moasã ye, la sã n yɩ bilfu, f na yaool n wʋme.

8A Pɩyɛɛr yeela a Zezi yaa: Ayo! Yãmb kõn waas mam nao abada! A Zezi leoka yẽnda n yeele: Mam sã n ka waas foom, fo kõn le paam baa fɩ mam nengẽ ye.

9A Sɩmo Pɩyɛɛr yeela bãmb yaa: Ka mam nao wã bal la y na n waas ye, yaa ne m nusã la m zugã me.

10A Zezi yeela a Pɩyɛɛr yaa: Sẽn so-a koom ka le baood soobo, sã n ka nao wã waoosg bal ye. Bala, a yĩngã tõr yaa yolgemde. Yãmb yaa yoalgema, la ka yãmb fãa ye.

11Sɩd me, bãmb dag n mii ned ning sẽn na n zãmb-a bãmbã. Dẽnda n kɩt tɩ bãmb yeel tɩ ka karen-biisã fãa n ya yoalgem ye.

12A Zezi sẽn waas b karen-biisã nao n sa, la b lebs n yeelg b futã, b leb n zĩnda rɩɩbẽ wã n yeel b karen-biisã yaa: Yãmb wʋma mam sẽn maan yãmbã võore?

13Yãmb boonda maam tɩ karen-saamba la Zu-soaba, la yãmb sẽn yetã zemsame, bala, mam sɩd yaa a boto.

14Dẽ, mam sẽn ya Zu-soab la Karen-saambã sa n waasa yãmb nao wã, yãmb me tog n waasa taab nao wã.

15Bala, yaa mamsg la mam kõ yãmba, tɩ yãmb me na maan wa mam sẽn maan yãmbã.

16Mam yeta yãmb sɩd-sɩd tɩ tʋmtʋmd ka yɩɩd a zu-soab ye, la tẽn-tʋmd me ka yɩɩd sẽn tʋm-a yẽ wã ye.

17Yãmb sã n mi rẽnda, yãmb yaa sũ-noog rãmba, yãmb sã n maand a woto.

18Ka yãmb fãa yell la mam sẽn gomdã ye. Mam mii neb nins mam sẽn tũusã. La yaa tɩlɛ tɩ bũmb ning sẽn gʋls Wẽnnaam gʋls-sõamyã pʋgẽ wã pidsi. B yeela be tɩ: "Ned ning sẽn wãbd-a bur ne maamã wẽneg n zabda ne maam."

19Mam pĩnd n togsa yãmb moasã, sẽn deng a pidsgu, t'a sã n wa n pidsi, bɩ yãmb tẽ tɩ mam yaa m sẽn ya.

20Mam yeta yãmb sɩd-sɩd tɩ ned sã n deeg mam sẽn tʋm a soaba, a reega maam, la sẽn deeg-a maam deega sẽn tʋm-a maamã.

21A Zezi sẽn gom woto n sa, sũ-sãoong yõka bãmba, la b yeelame yaa: Sɩd-sɩda, mam yeta yãmb tɩ yãmb ned a yembr n na n yõk maam n kõ.

22Bãmb karen-biisã dag n geta taab n sokd a Zezi sẽn gomd ned ningã yelle.

23A Zezi karen-biig a yembre, soab ning bãmb sẽn dag n nongã dag n kɩɩ kãntɩɩg rɩɩbã zĩigẽ n yegl a Zezi.

24A Sɩmo Pɩyɛɛr kamsa yẽnda n yeel-a t'a sok a Zezi tɩ yaa ãnna yell la bãmb sẽn gomdã.

25Karen-bi-kãng kɩlla a Zezi yãoogẽ n yeel-b yaa: Zu-soaba, yaa ãnna?

26A Zezi leoka yẽnda n yeele: Yaa ned ning mam sẽn na n suk bur-gɩrg n kõ-a wã. Bãmb suka bur-gɩrgã n kõ Iskaryo Sɩmo biig a Zudas.

27A Zudas sẽn deeg burã bal la Sʋtãanã sẽn kẽ yẽnda. A Zezi yeel-a lame: Fo sẽn na n maan bũmb ningã, maan-a tao-tao.

28La neb nins sẽn dag n zĩ be n dɩtẽ wa, baa a yen ka wʋm a Zezi sẽn yeel a Zudas woto wã võor ye.

29Sɩd me, sẽn dag n ya a Zudas n zãad bãmb ligdã, kẽer tagsame t'a Zezi yet-a lame t'a ra bũmb nins bãmb sẽn tog n paam kibsã yĩnga, wall t'a kõ naong rãmbã bũmbu.

30A Zudas deega bur-gɩrgã n kell n yik n yi. Dag n yaa yʋngo.

31A Zudas sẽn yi, a Zezi yeelame yaa: Ninsaal bi-riblã paama waoogr moasã, la Wẽnnaam paama waoogr bãmb pʋgẽ.

32Wẽnnaam sã n paam waoogr bãmb pʋgẽ, Wẽnnaam me na n waooga bãmb b mengã pʋgẽ, la keta bilf bal tɩ b waoog-ba.

33M kom-bõonego, mam sẽn ket n be ne yãmbã, yaa wakat bilf bal yĩnga. Yãmb na n baoo maam, la a wa mam sẽn dag n yeel Zuif-rãmbã tɩ bãmb ka na n tõog n wa mam sẽn dabdẽ wã, mam yeta yãmb woto me moasã.

34Mam kõta yãmb tõ-paalga: Nong-y taaba. Nong-y taab me wa mam sẽn nong yãmbã.

35Yãmb sã n tall nonglem taab yĩnga, nebã fãa na bãng tɩ yãmb yaa mam karen-biisi.

36A Sɩmo Pɩyɛɛr yeela bãmb yaa: Zu-soaba, yãmb dabda yɛ? A Zezi leokame n yeele: Fo ka tõe n pʋgl maam n kẽng m sẽn dabdẽ wã moasã ye, la kaoosg pʋgẽ, fo na pʋgl n wa.

37A Pɩyɛɛr yeela bãmb yaa: Zu-soaba, bõe yĩng tɩ mam ka tõe n pʋgl yãmb moasã? Mam na n saka kũum yãmb yĩnga.

38A Zezi leokame n yeele: Fo na n saka kũum mam yĩnga. Sɩd-sɩdã, mam yeta foom tɩ no-raoog kõn kelem tɩ fo ka kɩɩs naoor a tãab tɩ f ka mi maam ye.

← Chapter 12 Jump to: Chapter 14 →