Jude 1

Mossi Moore (KÃAB-PAALGÃ KOE-NOOGO)

Jump to:

1Maam a Zuud sẽn ya a Zezi Kirist tʋmtʋmda la a Zak ba-biigã n tʋmd seb-kãngã neb nins Wẽnnaam sẽn boole, tɩ tõnd nong-b ba a Wẽnnaam pʋgẽ tɩ Wẽnnaam bĩng-b a Zezi Kirist yĩngã.

2Bɩ Wẽnnaam nimbãan-zoeere la b laafɩ la b nonglem zĩnd ne yãmb wʋsg n paase.

3Mam zo-nongse, mam sẽn dag n tʋlg ne m sũur fãa n na n gʋls yãmb sẽn kẽed ne fãagr ning tõnd fãa sẽn tarã wɛɛngẽ wã mam mikame tɩ yaa tɩlɛ ne maam tɩ m gʋlse, n sagl yãmb tɩ y zab tẽebã zabre, tẽeb ning b sẽn dag n kõ Wẽnnaam nebã vugr bal wakat fãa yĩngã.

4Bala, raop kẽer n soos n kẽ yãmb sʋka. Bãmb yaa wẽn-kɩɩsdb sẽn tekd tõnd Wẽnnaamã bark koɛɛgã n maand raglem la b kɩɩsd a Zezi Kirist sẽn ya tõnd karen-saamb la d Zu-soab sẽn ka to wã. La b gʋlsa sɩbgr ning b sẽn na n paamã hal daar zãra.

5Yãmb sẽn bãng bõn-kãensã fãa vugr bal wakat fãa yĩngã, mam dat n tẽega yãmb tɩ Zu-soabã sẽn fãag Israyɛl kambã n yiis Ezipt tẽngã n sa wã, b yaool n kɩtame tɩ neb nins sẽn ka tẽ-bã sãame.

6La malegs nins sẽn ka pa zĩig ninga sẽn zems ne bãmbã, la b sẽn yi n bas b mens zĩigã, Wẽnnaam balg-b-la bãens n bĩng-b lik bida pʋgẽ wakat sẽn kõn sa yĩngã, n gũudẽ tɩ ra-kãsengã sẽn ya bʋʋdã kaoob daarã ta.

7Woto me, Sodom la Gomoor la tẽns nins sẽn pẽ bãmbã sẽn maan yoob a woto n bao gãag buud sẽn ka segdã, b sɩbga bãmb ne bugum sẽn ka kiida tɩ b yɩ mamsg neb a taab yĩnga.

8Baa ne rẽ, nin-kãensa me, rẽgemda b yĩnsã b magbã pʋgẽ, n paoogd noor ning Zu-soaba sẽn tar ne bãmbã la b tʋʋd yĩngr pãens rãmbã.

9La baa malɛk-rãmba naab a Misɛl sẽn dag n kɩɩsd bɛlgdã sẽn yetã n wẽed nokoeemd ne-a a Moyiis kũuma poorẽ wã, a ka saag n gom n paoog-a ye. A yeelame yaa: Bɩ Zu-soaba sɩbg-fo.

10La nin-kãensã yẽ, b gomdame n tʋʋd bũmb ning sẽn ka mi wã, la bũmb nins b yamã sẽn kɩtd tɩ b miẽ wã bala, wa rũmsã sẽn ka tar tagsgã sẽn maandã, bõn-kãng sãamda bãmb bala.

11Bãmb na paam toogo, tɩ bõe, b tũu a Kaẽ sorã, bãmb kẽesa b mens a Balaam tudgrã pʋgẽ, yaood yĩnga. La bãmb sẽn kɩɩs wala a Koore wã, b sãamame.

12Bãmb n wat ne yɛl yãmb ba-biir nonglem dɩɩbã wakatã, n kɩdemd be n ka zoet yãnde, n dɩt n digda. B yaa wa sawat sẽn ka koom tɩ sobg rɩkd-ba, n ya wa tɩɩs sʋʋgr wakat tɩɩs sẽn ka tar biisi, tɩɩs sẽn kʋɩ n leb n kʋɩ, n vigs n gãe.

13B yaa wa ko-kãseng ko-pɛm sẽn yikd ne pãnga, n yiisd b yãnd puudu, b yaa wa ãd-saadse, tɩ Wẽnnaam bĩng-b lik bida pʋgẽ, wakat sẽn kõn sa yĩnga.

14A Henok sẽn ya yãmb yaab a yopoe soab sẽn sɩng ne a Adama, togsa bãngr goam bãmb yĩng me n yeel yaa: Ad Zu-soaba waa ne b nin-sõamy kʋʋng-kʋʋngo,

15n na n bʋ neba fãa bʋʋdo, la b kɩt tɩ tʋʋm-wẽns maandbã yals n logs tʋʋm-wẽns nins fãa b sẽn maanã yelle, la gom-wẽns nins yel-wẽn maandb sẽn ya wẽn-kɩɩsdbã sẽn gom bãmba.

16Bãmb yaa neb sẽn nong yẽgõngo, sũ-pa-noom-dãmb sẽn tũud b yĩnsa ratem tɩ b noyã gomd wilg-m-meng goama, n belsd nebã n dat n paam bũmbu.

17La yãmba m zo-nongdse, tẽeg-y bũmb nins tõnd Zu-soab a Zezi Kirist tẽn-tʋmdbã sẽn da pĩnd n yeel yãmb tɩ na n waame wã yelle.

18B ra yeta yãmb yaa: Wakat sɛɛb wakate, nin-yaandb n na n zĩndi, n kẽnd wa Wẽnnaam ka ye, n tũud b yĩnsã ratem.

19Ad yaa, bãmb n wat ne welgre, n ya neb sẽn vɩ yĩngã yĩnga, tɩ Wẽnnaam Sɩɩg ka b pʋgẽ ye.

20La yãmba, m Zo-nongdse, bɩ y kẽng taoor ne tẽ-sõngã y sẽn tarã. Pʋʋs-y ne Sɩɩg-sõng pãnga,

21la y kel n yals Wẽnnaam nonglmã pʋgẽ la y gũud tõnd Zu-soab a Zezi Kirist nimbãan-zoeerã sẽn na n kɩt tɩ d paam vɩɩm sẽn kõn sa wã.

22Zoe-y neb kẽer nimbãanega, neb nins yam sẽn yuusdã.

23Zɛɛg-y-b n fãag-b n yiis bugmẽ wã. Zoe-y neb a taabã nimbãanega, nimbãaneg sẽn naag ne rabeem, n kisg hal baa fuug ning b yĩnsã ratem sẽn dẽgmã.

24Bɩ soab ning sẽn tõe n gũ yãmb tɩ y ka lʋɩ, la la b kɩt tɩ y puk bãmb ziirã taoor ne kɩdeng tɩ rõadg kaẽ wã,

25Wẽnnaam b yen tãa sẽn ya soab ning sẽn fãag-a tõndo, d Zu-soab a Zezi Kirist maasem yĩngã, soog ziiri, la naam, la pãnga la noore, sẽn sɩng ne wakat sẽn dag n ka be, la moasã, la zamaan fãa sẽn wata. Ãmina.

Jump to: