Philemon 1

Mossi Moore (KÃAB-PAALGÃ KOE-NOOGO)

Jump to:

1Maam a Poll sẽn ya bi-bɛɛg Kirist Zezi yĩnga ne d ba-biig a Tɩmote n tʋmd seb-kãngã tõnd zo-nongr la

2d tʋmd-n-taag a Fɩlmo nengẽ, ne d ba-bi-poak a Apiya la tõnd soda-taag a Arsɩp ne a Zezi tẽedba sẽn tigimd fo zakẽ wã.

3Bɩ tõnd ba a Wẽnnaam la Zu-soab a Zezi Kirist sik b bark la b laafɩ yãmb zutu.

4Mam pʋʋsda m Wẽnnaama bark daar fãa n tẽegd

5fo yell m pʋʋsgã pʋga. Tɩ bõe, mam wʋmda b sẽn gomd fo sẽn tar nonglem ning Wẽnnaam neba fãa yĩngã la fo sẽn tẽed Zu-soab a Zezi wã.

6Mam kota Wẽnnaam tɩ fo sẽn lagem tõnd n tar tẽeb ningã na kɩt tɩ neba bãng bõn-sõama nins fãa sẽn maand tõnd sʋk Kirist Zezi yĩnga.

7Ba-biiga, mam paama sũ-no-kãsenga ne belsgo, fo nonglmã yĩnga, tɩ bõe, fo yĩnga, Wẽnnaam nebã sũy paama belsgo.

8Yaa woto yĩnga, baa mam sẽn tar lohorem wʋsg Kirist pʋgẽ tɩ gʋls n wilg foom f sẽn tog n maana,

9mam nong n yõka foo sɛɛg ne nonglem n yɩɩda. Yaa maam a Poll, nin-kẽem a Polle, la sẽn paas moasã, mam bee bi-bees roog Kirist Zezi yĩnga.

10Mam kota foom m biig a Onezɩm yĩnga mam sẽn dog m balgr pʋgẽ wã.

11Pĩnda, yẽ ra ka tar yõod ne foom ye, la moasã yẽnda na n talla yõod ne foo wala a sẽn tar yõod ne maama.

12Mam lebs n tʋmd-a-la fo nengẽ, yẽ wẽnda wa mam meng bala.

13Mam da nongẽ lame n kɩt t'a pa ne maam, n deeg fo zĩigẽ n sõng maam, mam sẽn be bi-bees roog moasã koe-noogã yĩnga.

14La mam da ka rat n maan baa fʋɩ tɩ ka tũ ne fo noor ye. Tɩ fo yel-sõmda ra yɩ ne modgr ye, la a na n yɩɩ ne yamleoogo.

15Tõe t'a Onezɩm sẽn loog n bas foom wakat bilf yĩnga yaa sẽn na n yɩl tɩ f leb n deeg-a wakat fãa yĩnga.

16La ka tɩ reeg-a wala yamb ye, la yaa reegr sẽn ya neer n yɩɩd yamba, reeg yẽnda wa ba-bi-nongre. Yẽ yaa mam ba-bi-nongre, la a leb n yaa fo ba-bi-nongr n yɩɩda. Sã n ya yĩnga pʋga wala sã n ya Zu-soaba tũudum pʋga.

17Dẽ wã, fo sã n get maam wa f zoa, bɩ f reeg a Onezɩm wa fo sẽn deegd mam mengã.

18La yẽ sã n da beega foo wala a sã n tara fo samde, bɩ f geelg yõwã wa mam dẽnda.

19Mam a Poll n gʋlsd gom-kãnga ne mam menga nug tɩ m na n yao-f lame. La mam ka na n yeel foo tɩ fo tara samde, la fo menga yaa maam n so ye.

20N-ye, m ba-biiga bɩ f maan yel-sõm-kãnga Zu-soaba yĩng n kõ maam, bels mam sũur Kirist tũudmã pʋgẽ.

21Yaa mam sẽn mi tɩ fo na n sakame wã yĩng la mam sẽn gʋlsd fooma, n miẽ tɩ f na n sak n maaname tɩ yɩɩd mam sẽn kot-fã.

22La f kell n segl gãag zĩig mam yĩnga, bala yãmb pʋʋsgã yĩnga mam tara tẽeb tɩ b na n basa maam n kõ yãmba.

23A Epafras sẽn be bi-bees roog pʋg ne maam Kirist Zezi yĩnga pʋʋsda foo,

24la a Mark ne a Aristark la a Demas la a Luk sẽn ya mam tʋmd-n-taasã me pʋʋsda foom.

25Bɩ tõnd Zu-soab a Zezi Kirist barkã soog yãmb sũyã.

Jump to: