Philippians 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Dẽ yĩnga, sã n yaa tɩ tũ Kirist wata ne belsgo, sã n yaa tɩ Kirist nonglem yãmb yĩngã paasda yãmb raoodo, sã n yaa tɩ yãmb tara lagem-n-taar ne Sɩɩg-sõngo, la sã n yaa tɩ yãb-taab ne nimbãan-zoeer beeme,

2bɩ y paam nonglem a yembre, la yam a yembre, la datem a yembre, tɩ mam sũurã yɩ noog zãnga.

3Da maan-y bũmb baa fɩ ne geesem-geesem wall ne wuk-m-meng ye, la bɩ ned kam fãa paam sik-m-meng yam n tags tɩ neb a taaba yɩɩda yẽnda.

4Bɩ yãmb ned kam fãa ra ges a meng sõngr yell bal ye, la bɩ a ges neb a taaba sõngr yell me.

5Paam-y yam ning a Zezi Kirist sẽn da tarã.

6Bãmb sẽn da tar Wẽnnaam yalẽ wã, b ka tags tɩ bãmb sẽn zem ne Wẽnnaamã,

7yaa bũmb b sẽn tog n gãd kãenkãe ye. La a Zezi basa b naam n lebg wa yãmba, n dɩk yĩng wa ninsaalb wẽneg n wa wala ninsaala.

8A Zezi sika b menga, halɩ n sak kũum, n ki da-pɩkã zugu.

9Yaa woto yĩng me n kɩt tɩ Wẽnnaam zẽk bãmb ne waoogr sẽn ya kãsenga, n kõ-b yʋʋr sẽn yɩɩd yʋyã fãa,

10tɩ ne a Zezi yʋʋre, rũma fãa sẽn be saasẽ saasẽ, la sẽn be tẽngã zugu, la sẽn be kɩɩm-kulgã na n yĩgimdame,

11la tɩ zɛlmã fãa na n kɩsa kaset t'a Zezi Kirist yaa fãagda, tɩ yɩ tõnd ba a Wẽnnaam waoogr yĩnga.

12Woto, m zo-nongdse, wa yãmb sẽn sak wakat fãa wã, bɩ y tʋm fãagrã tʋʋm ne rabeem la rigbu, la ka mam sẽn da be yãmb sʋkã bal ye, la bɩ y tʋm moasã mam sẽn ka be yãmb sʋkã n yɩɩda.

13Tɩ bõe, yaa Wẽnnaam n maand b tʋʋmd yãmb pʋsẽ, la b kõt yãmb ratmã, la pãng tɩ maan wa sẽn zems bãmb daabã.

14Maan-y bũmba fãa tɩ yẽgõng ne no-koɛɛm kaẽ ye.

15Tɩ yãmb na yɩ neb sẽn ka tar yelle, la sẽn ya yɩlma. Tɩ yãmb na yɩ Wẽnnaam kamb sẽn ka tar dõdb ye, zamaan kãnga nebã sẽn sãam la sẽn ya wẽnsã sʋka, yãmb yãgda bãmb sʋk wa vẽenem dũniyã pʋga,

16n zãad vɩɩm koɛɛgã bãmb yĩnga. Dẽ, Kirist waoongã daare, mam tõe n maana sũ-noogo, mam zoeesã ne m maoorã sẽn ka yɩ zaalmã yĩnga.

17La baa b sã n dɩk maam n bas wa b sẽn basd koom maoong zĩigẽ, n paas maam ne maoong ning la kũun nins yãmb sẽn kõt Wẽnnaam y sẽn tẽed bãmbã yĩnga, mam maanda sũ-noog ne bõn-kãnga, la m naagda yãmb fãa n kɩdemdẽ.

18Bɩ yãmb me maan sũ-noog a woto n naag maam n kɩdme.

19Mam tẽedame tɩ ne Zu-soaba a Zezi sõngre, sã n yɩ bilfu, mam na n tʋma a Tɩmote yãmb nengẽ n bãng yãmb kibare tɩ bõn-kãng tõe n kõ maam daoodo.

20Bala, mam ka tar ned sẽn tar yam a yembr ne maam n na sɩd ges yãmb yellã neer ye.

21Sɩd me, b fãa geta b mens yɛlã yelle, n ka baood a Zezi Kirist rẽndã ye.

22Yãmb miime t'a Tɩmote wilga a zemsgo, n zĩnd mam sɛɛgẽ wa biig sẽn be ne a ba, n naag maam koe-noogã tʋʋmd pʋgẽ.

23Dẽ, mam tagsdame tɩ mam sã wa bãng m yellã sẽn na n yɩ to-to, m na n tʋm-a-la yãmb nengẽ.

24La mam tar tẽeb ne Zu-soabã tɩ sã n yɩ bilfu, mam meng na n waa n gesa yãmba.

25Mam tagsame tɩ yaa neer tɩ m lebg n tʋm a Epafordit sẽn ya mam tʋmd-n-taagã la m soda-taagã t'a wa yãmb nengẽ. Yãmb dag n toola yẽ sõngr t'a wa n kõ maam.

26Yẽ rag n data ne a sũur fãa n yã yãmb fãa, la a sũurã sãama wʋsgo yãmb sẽn wʋm a pa-keema yĩnga.

27A Epafordit sɩd lʋɩɩ bãag n da kolg kũum fãa-fãa, la Wẽnnaam zoee yẽ nimbãanega, la ka yẽ bal nimbãaneg ye, la yaa mam me nimbãanega, sẽn na n yɩlẽ tɩ mam da paam sũ-sãoong n paas ye.

28Rẽ wã, mam tʋmda yẽnda ne yãgb wʋsg yãmb nengẽ, tɩ yãmb sã n yãnd-a bɩ y leb n paam sũ-noogo, tɩ mam menga sũ-sãoongã na booge.

29Woto yĩnga, bɩ y reeg-a ne sũ-no-kãseng wa y ba-biig Zu-soaba pʋga, la y waoog neb nins sẽn ya a woto wã.

30Tɩ bõe, yaa Kirist tʋʋmdã yĩng la a sẽn da na n ki wã. Yẽ gẽnega a yõor n sõng maam ne sõngr ning yãmb sẽn da tog n sõng maam n ka tõogã.

← Chapter 1 Jump to: Chapter 3 →