1 Corinthians 15

mewari

1हो विस्वासी भायाँ में थाँने ज्यो हव हमच्यार हुणायो हो वींकी आद अवाड़ूँ हूँ अन थाँ वींने मान्यो भी हो अन अबाणू तईं वींने मान भी रिया हो।

2अन अणीऊँस थाँ बंचाया जावो हो, पण थाँने अणा बचना ने हूँस्यारी का हाते पकड़न राकणा हे अन यद्याँ थाँ अस्यान ने करो तो थाँको विस्वास करणो बेकार वे जाई।

3अन ज्या बात मने हाराऊँ पेल्याँ पतो चाली ही वाँ बात में थाँने हुणा दिदी हे, जस्यान सास्तर में लिक्यो हे के, मसी आपणाँ पापाँ का वाते मरिया हा।

4अन वींने कबर में मेल दिदो पण सास्तर में लिक्यो तको हे के, वो तीजे दन पाछो जीवतो वेग्यो।

5अन वो केफा ने दिक्यो अन वींके केड़े वीं बाराई खन्दाया तका चेला ने दिक्यो।

6अन वाँने दिकबा का केड़े वीं पानस्येऊँ हेला विस्वासी भायाँ ने जद्याँ वीं एक हाते हा, वाँने दिक्यो अन वणा मेंऊँ नरई तो अबाणू तईं जीवता हे, पण कुई तो सांत वेग्या।

7अन वीं याकूब ने दिक्या अन वणा हाराई खन्दाया तका चेला ने भी दिक्या।

8अन अणा हाराई केड़े ईसू मने भी दिकई दिदा। जद्याँ के, मूँ तो अजीब तरियाऊँ खन्दायो तको चेलो बण्यो हूँ।

9अन मूँ हाराई खन्दाया तका चेला मेंऊँ फोरो हूँ अन मूँ चेलो केवाबाँ के जोगो भी ने हूँ काँके मूँ परमेसर की मण्डली का मनकाँ ने हताया करतो हो।

10अन आज मूँ ज्यो कई भी हूँ परमेसर की दयाऊँ हूँ अन वींकी दया मारा वाते बेकार ने गी। काँके में दूजाऊँ हेली मेनत किदी हे, पण परमेसर की दया मारा पे हे जणीऊँ मूँ अस्यान कर सक्यो हूँ।

11अन यद्याँ में थाँने हव हमच्यार हुणायो हो कन पलई वणा थाँने हुणायो हो माँ एकीस हव हमच्यार हुणाबा हा अन थाँ ईंपे विस्वास किदो हो।

12जद्याँ के थाँने एकीस हमच्यार हुणायो हो के, मसी ने मरिया तका मेंऊँ जीवतो किदो ग्यो हो तो थाँका मेंऊँ कुई कस्यान के सके हे के, मरिया केड़े पाछो जीवतो ने व्यो जा सके हे?

13अन यद्याँ मरिया केड़े पाछो जीवतो ने वे सके तो मसी भी पाच्छा ने जीवता किदा ग्या हे।

14अन यद्याँ मसी ने जीवतो ने किदो ग्यो हे तो माँको परच्यार करणो भी बेकार हे अन थाँको विस्वास करणो भी बेकार हे।

15अन माँ भी परमेसर का हामे जूटा गवा बणा हा, काँके माँ परमेसर का बारा में थाँने आ गवई दिदी हे के, वणा मसी ने मरिया तका मेंऊँ पाच्छा जीवता किदो।

16अन यद्याँ मरिया तका जीवता ने किदा जाता तो, मसी ने भी जीवतो ने किदो जातो।

17अन यद्याँ मसी ने पाच्छा जीवता ने किदा ग्या हे तो थाँको विस्वास करणो बेकार हे अन थाँ भी अबाणू तईं पाप में फस्या तका हो।

18अन मसी में विस्वास करता तका ज्यो भी सांत वेग्या, वीं फोगट में नास वेग्या हे।

19अन यद्याँ आपाँ ईं दनियाँ की चिजाँ पाबा का वाते मसीऊँ आस लगा मेली हे तो आपाँ हाराई मनकाँऊँ अभागा मनक हा।

20पण हाँच ओ हे के, मसी ईसू ने मरिया तका मेंऊँ जीवता किदा ग्या हे अन वीं जीं मरग्या हे, वाँ हाराई मेंऊँ जीवतो वेबावाळो पेलो हे।

21काँके जद्याँ के एक मनकऊँ मोत अई हे तो एक मनक ऊँइस मरिया तकाऊँ पाछो जीवतो वेणो भी आयो हे।

22अन जस्यान आदम का करम की वजेऊँ हाराई का वाते मोत अई हे, तो वस्यानीस मसी की वजेऊँ हाराई ने पाच्छा जीवता किदा जाई।

23पण आपाँ हाराई भी एक का केड़े एक जिवाया जावाँ। हाराऊँ पेल्या मसी ने जिवायो ग्यो अन वाँका केड़े वाँका दूजी दाण आबा की टेम पे वाँने ज्यो मसी का मनक हे वाँने जीवाई।

24ईंका केड़े अणी दनियाँ को अंत वेई, मसी हाराई राज करबावाळा राजा ने अन अदिकारियाँ ने अन हारी सगत्याँ ने नास करन आपणो राज परमेसर बापू का हाताँ में हूँप देई।

25पण जद्याँ तईं परमेसर मसी का दसमणा ने वाँका पगाँ का रेटे ने कर दे, तद्याँ तईं वाँको राज करणो ते हे।

26अन आकरी दसमण मोत को नास करियो जाई।

27काँके परमेसर हाराई ने मसी का पगाँ का रेटे कर मेल्या हे अन सास्तर में भी लिक्यो तको हे के, हारोई वाँका बंस में करियो ग्यो हे, परमेसर हारोई वींके पगाँ का रेटे कर दिदो हे, पण परमेसर वणा “हाराई” में ने हे।

28अन परमेसर हारोई मसी का बंस में कर दिदो हे तो खुद पूत भी परमेसर का बंस में वे जाई, अटा तईं के हारोई परमेसर का बंस में कर दिदो ग्यो हे, जिंपे परमेसर राज करे हे।

29अन यद्याँ मरिया तका पाच्छा जीवता ने वेवे, तो वीं मनक कई करी ज्याँने मरिया तका का वाते बतिस्मो दिदो ग्यो हो? अन वीं मरिया तका पाच्छा जीवताई ने वेई तो काँ मनक वाँका वाते बतिस्मो लेवे हे?

30यद्याँ मरिया तका पाच्छा जीवता ने वेवे तो माँ काँ यो खतरो मोल लेरिया हा?

31हो विस्वासी भायाँ मूँ थाँका पे मेपणो करूँ हूँ, काँके आपाँ ईसू मसी पे विस्वास करन एक गट-जोड़ में हा, ईं वाते मूँ कूँ हूँ के, मूँ हमेस्यान मोत को खतरो मोल लूँ हूँ।

32जद्याँ इपिसुस नगर में मनक जंगली जनावराँ का जस्यान मारे हाते लड़्या तो मने कई मल्यो? अन यद्याँ मरिया तका पाच्छा जीवता ने वेवे, “तो आवो आपाँ खावा-पीवाँ, काँके काले आपाँने भी मरणोइस हे।”

33धोको मती खाज्यो, “काँके बुरी संगती हव आदत ने भी बगाड़ देवे हे।”

34थाँ होस में आन ज्यो सई हे, वींका बारा होचो अन पाप करणो छोड़ दो। काँके थाँकामूँ नरई तो अस्या हे ज्यो परमेसर का बारा में कई ने ने जाणे हे, मूँ यो थाँकी हरम का वाते केरियो हूँ।

35कुई मनक तो ओ पूछे हे के “मरिया केड़े पाच्छा कस्यान जीव सके हे? अन वाँने पाच्छी कस्यी देह मली?”

36थाँ तो बेण्डा हो। थाँ ओ जाणो हो के, जद्याँ थाँ बीज वायो हो वो बीज जद्याँ तईं मरी ने जावे जीवतो ने वेवे हे।

37अन जिंने थाँ वायो हे वो उगबावाळो पोदो कोयने पण वो तो दाणो हे पलई वो गऊँ को वे कन ओरी किंको भी दाणो वे।

38पण परमेसर वींने आपणी मरजी के जस्यो पोदो बणावे हे अन हाराई दाणा ने एक खास पोदो बणावे हे।

39जतरा भी जीव हे वाँकी हाराई की देह एक जस्यान की ने वेवे हे, मनकाँ की एक तरियाँ देह हे, जनावराँ की दूजी तरियाँ की, उड़बावाळा जनावराँ की अन माछळ्याँ की अलग तरियाँ की देह हे।

40काँके कुई देह तो हरग की वेवे हे अन कुई धरती की, पण हरग की देह को तेज अलग वेवे हे अन धरती की देह को अलग वेवे हे

41जस्यान के सुरज, चाँद अन तारा का तेज में फरक वेवे हे अन अटा तईं के, एक ताराऊँ दूजाँ तारा का तेज में भी फरक वेवे हे।

42ईं वाते जद्याँ मरिया तका पाच्छा जीवता वेई तो भी अस्यान वेई अन जणी देह ने ईं धरती पे गाड़ीगी हे, वाँ नास वेबावाळी हे, पण जणी देह ने मरिया केड़े पाच्छी मेली वाँ अमर हे।

43अन जणी देह ने ईं धरती में गाड़ी जावे हे, वाँ कमजोर अन बना आदर की देह हे अन जद्याँ वाँ देह पाच्छी जीवती वेई तो वाँ मेमावान अन जोरावर वेई।

44अन जणी देह ने ईं धरती में गाड़ीगी हे वाँ देह गारा की हे, पण जद्याँ वीं देह ने पाच्छी जीवती किदी गी हे, तो वाँ देह आत्मिक हे। यद्याँ गारा की देह वेवे, तो आत्मिक देह भी वेवे हे।

45सास्तर में लिक्यो तको हे के, “पेलो मनक आदम हे ज्यो जीवतो प्राणी हे”, पण आकरी मनक मसी हे, ज्यो जीवन देबावाळी आत्मा हे।

46काँके पेल्या आत्मिक जीवन ने आवे पण देह को जीवन आवे हे अन वाँका केड़ेईस आत्मिक जीवन आवे हे।

47पेलो मनक धरती का गाराऊँ बणायो ग्यो हो पण दूज्यो मनक ज्यो मसी हे, वो हरगऊँ आयो हो।

48ज्यो मनक धरती पे हे वाँकी देह पेला मनक के जस्यान गारा की हे अन हरग में हारई का नके आत्मिक देह वेई जस्यी हरगऊँ आबावाळा मसी का नके ही।

49अन जस्यान आपाँ गारावाळा मनक को रूप धारण करा हाँ, वस्यानीस आपाँ हरगवाळा मनक को रूप भी धारण कराँ।

50हो भायाँ, मूँ थाँने बताऊँ हूँ के, आपणी आ देह ज्यो माँस अन लुईऊँ बणी तकी हे परमेसर का राज में भेळी ने वे सके हे अन ने ज्यो नास वेबावाळी या देह हे, वाँ ज्यो अमर हे वींमें भेळी वे सके हे।

51थाँ ध्यान देन हुणो मूँ थाँने एक भेद की बात बताऊँ हूँ के, आपाँ हाराई मरा कोयने, पण आपणो रूप बदल्यो जाई।

52जद्याँ आकरी रणभेरी बजाई जाई वीं दाण आँक झपकाताँ तईं एकीस दाण में अस्यान वे जाई। जद्याँ रणभेरी बजाई जाई तो मरिया तका जीवता वेन अमर वे जाई अन आपाँ ज्यो जीवता हाँ बदल्या जावा।

53काँके ईं नास वेबावाळी देह को नास ने वेबावाळी देह में बदलणो जरूरी हे अन आ मरबावाळी देह ने ने मरबावाळी देह में बदलणो जरूरी हे।

54अन जद्याँ आ नास वेबावाळी देह बना नास की जोळी ने पेर लेई अन आ मरबावाळी देह ने मरबावाळी देह की जोळी पेर लेई जदी सास्तर में लिक्यो तको ओ बचन पूरो वेई के, “जीत मोत ने निगळगी हे”,

55“हे मोत थाँरी जीत कटे हे? अन थाँरो डंक कटे हे?”

56पाप एक डंक का जस्यान हे जणीऊँ आपाँ मरा हाँ अन आपणाँ नके नेम हे, जणीऊँ आपाँ जाणा हाँ के, आपीं पाप किदो हे।

57पण परमेसर को धन्नेवाद वे के, वणा आपाँने परबू ईसू मसीऊँ मोत पे जीत देवाड़ी हे।

58ईं वाते हो विस्वासी भायाँ विस्वास में बना आगा-पाछा व्या गाटा बण्या तका रेवो अन परबू को काम करबा वाते खुद ने त्यार राको, काँके थाँ तो जाणो हो के, परबू वाते किदो ग्यो काम बेकार ने वे जावे।

← Chapter 14 Jump to: Chapter 16 →