1 John 2

mewari

← Chapter 1 Jump to: Chapter 3 →

1हो मारा प्यारा बाळकाँ, मूँ थाँने ईं बाताँ ईं वाते लिकूँ हूँ के, थाँ पाप ने करो। पण ज्यो मनक गलतीऊँ पाप कर नाके हे, वाँका पाप धोवा का वाते आपणी मदत करबा का वाते धरमी ईसू मसी, बापू परमेसर का हाते बेट्या तका हे।

2वीं एक बलीदान का रूप में बेस आपणाँइस ने, पण हाराई मनकाँ का पाप ने धोवे हे।

3परमेसर ने हाँची में जाणबा का वाते एकीस गेलो हे के, आपाँ वींका आदेस ने मानाँ अन जद्याँ आपाँ अस्यान करा हाँ, तो वींने हाँची में जाण लेवा हाँ।

4पण यद्याँ कुई मनक अस्यान केवे हे के, “मूँ परमेसर ने जाणूँ हूँ” पण वींका आदेस ने, ने माने, तद्याँ वो मनक जूटो हे अन वींका मन में हाँच कोयने हे।

5पण ज्यो भी मनक परमेसर का बचना ने माने हे, तद्याँ वींका में परमेसर को परेम रेवे हे, काँके योईस एक गेलो हे, जणीऊँ आपाँ परमेसर में कल्डा बण्या तका रे सका हा।

6ज्यो कुई भी मनक ओ केवे हे के, वो परमेसर में पाको हे, तद्याँ वींने ईसू मसी का जस्यान जीवन जीवणो छावे।

7हो मारा प्यारा भायाँ, मूँ थाँने कस्योई नुवो आदेस ने देरियो हूँ, पण ज्यो मूँ थाँने बतऊँ हूँ वो दनियाँ की सरुवातऊँ थाँने हुणायो ग्यो हो। ओ वोईस पुराणो हव हमच्यार हे जिंने थाँ हुण चुक्या हो।

8मूँ थाँने एक ओरुँ नुवो आदेस लिकूँ हूँ। ईंको हाँच मसी का जीवन में अन थाँका जीवन में परगट व्यो हे, काँके अंदारो खतम वेरियो हे अन हाँचा को उजितो चमकणो सरू वेग्यो हे।

9ज्यो भी मनक अस्यान केवे के, वो परमेसर का उजिता में चाले हे, पण आपणाँ विस्वासी भई-बेनाऊँ दसमणी राके हे, तद्याँ वो अबाणू भी अंदारा मेंईस चालरियो हे।

10ज्यो भी मनक आपणाँ विस्वासी भई-बेनाऊँ परेम करे हे, वो परमेसर का उजिता में चाले हे। अन वींके जीवन में अस्यान की कुई भी बात ने वेई, जणीऊँ वो पाप करे।

11पण ज्यो भी मनक आपणाँ विस्वासी भईऊँ दसमणी राके हे, वो अबाणू भी अंदारा मेंईस भटकतो रेवे हे अन अंदारा मेंईस जीवन जीवे हे। वो यो भी ने जाणे के, ईं अंदारा का मयने कटे जारियो हे। काँके अंदारे वींने आंदो कर दिदो हे।

12हो मारा प्यारा बाळकाँ, मूँ थाँने ईं वाते लिकूँ हूँ, काँके ईसू मसी का नाम की वजेऊँ थाँका पाप धोया ग्या हे।

13हो मारा बापू का जस्यान का मनकाँ, मूँ थाँने ईं वाते लिकूँ हूँ, काँके थाँ परमेसर ने जाणो हो, ज्यो सरुवातऊँ हे। हो मोठ्याराँ, मूँ थाँने ईं वाते लिकूँ हूँ, काँके थाँ बुरई ने भी छेटी कररिया हो। हो मारा प्यारा बाळकाँ, मूँ थाँने ईं वाते लिकूँ हूँ, काँके थाँ बापू परमेसर ने जाण लिदा हे।

14हो भूण्डा मनकाँ, मूँ थाँने ईं वाते लिकूँ हूँ, काँके थाँ परमेसर ने जाण लिदा हे, जीं सरुवातऊँ हे। हो मोठ्याराँ, मूँ थाँने ईं वाते लिकूँ हूँ, काँके थाँ जोरावर हो, थाँ परबू का बचन ने मानो हो अन बुरई ने भी छेटी कररिया हो।

15थाँ ने तो ईं दनियाऊँ अन ने ईं दनियाँ की चिजाँऊँ परेम करज्यो, काँके ज्यो भी ईं दनियाऊँ परेम करे हे। वींके मन में बापू परमेसर को परेम कोयने हे।

16काँके ईं दनियाँ में मन की बुरी मरजी, जीवन को मेपणो, देह की बुरी मनसा हे ईं बाताँ बापू परमेसर का आड़ीऊँ कोयने, पण ईं दनियाँ का आड़ीऊँ हे।

17या दनियाँ अन ईंकी हारी बुरी मरजी को नास वेई, पण ज्यो भी मनक परमेसर की मरजी पे चाले हे, वींको कदी नास ने वेई।

18हो मारा प्यारा बाळकाँ, जस्यान थाँ जाणो हो के, आकरी टेम आगी हे अन मसी को दसमण भी आबावाळो हे। ईं वाते वींकी जस्यान नरई मसी का दसमण बणग्या हे, ईं वजेऊँ आपाँ जाण सका हाँ के, आकरी टेम नके हे।

19मसी का दसमण आपणाँ मेंऊँस बण्या हा, पण हाँची में वीं आपणाँ हाते कोयने हे, काँके यद्याँ वीं आपणाँ हाते वेता, तो आपाँने छोड़ता कोयने। पण वणा आपाँने छोड़ दिदा जणीऊँ वीं आपाँने ओ बता सके के, वीं हाँची में आपणाँ मेंऊँ कोयने।

20पण थाँको तो पुवितर मसी अभिसेक किदा हे। ईं वाते थाँ हाँच ने जाणो हो।

21कई थाँने अस्यान लाग के, मूँ ओ कागद ईं वाते लिकूँ हूँ के, थाँ हाँच ने, ने जाणो? पण थाँ तो हाँच ने जाणो हो अन यो भी जाणो हो के, हाँच में जूट ने वेवे हे।

22जूटो वो हे, ज्यो अस्यान केवे हे के, ईसू, मसी कोयने हे। अस्यान केबावाळो मनक मसी को दसमण हे। वो बापू अन बेटा दुयाँ ने नकार हे।

23ज्यो बेटा ने नकारे हे वींके नके बापू भी कोयने रेवे, यद्याँ कुई बेटा ने अपणावे हे, तो वो बापू ने भी अपणावे हे।

24थाँ ज्यो बाताँ सरुआत में हूणी ही, वाँने मानता रेज्यो, अगर थाँ अस्यान करता रेवो, तो हमेस्या बेटो अन बापू भी थाँकामें वास करिया करी।

25खुद मसी आपाँने अनंत जीवन देबा को वादो किदो हे।

26में ईं बाताँ थाँने वणा मनकाँ का बारा में लिकरियो हूँ, जीं थाँने भटकावा की कोसीस करे हे।

27जद्याँ तईं थाँकी बात हे, थाँको अभिसेक वणीऊँ हे ज्या पुवितर आत्मा थाँकामें वास करे हे, ईं वाते थाँने तो ओ जरूत कोयने के, कुई उपदेस देवे, पण थाँने तो ज्यो आत्मा दिदी गी हे, वाँ यो हारोई हिकावे हे। आद राको आत्मा जो हिकावे हे, वो हाँच हे जूट कोयने हे। आत्मा की हिकावण ने मानो अन मसी में बण्या तका रेवो।

28हो मारा प्यारा बाळकाँ, ईं वाते थाँ ईसू मसी में बण्या तका रेवो, जणीऊँ जद्याँ वो परगट वेई तद्याँ थाँ हिम्मतऊँ भर जावो अन वींका पाच्छा आबा पे आपाँने वींका हामें हरमा ने मरणो पड़े।

29अन जद्याँ थाँ ओ जाणो हो के, ईसू मसी धरमी हे, तद्याँ थाँ यो भी जाण लो के, ज्यो मनक धरम का काम करे हे, वींइस परमेसर का बेटा-बेटी हे।

← Chapter 1 Jump to: Chapter 3 →