1 Thessalonians 2

mewari

← Chapter 1 Jump to: Chapter 3 →

1हो भायाँ-बेना, आ बात थाँ खुदई जाणो हो के, माँको थाँका नके आणो बेकार ने ग्यो।

2थाँ ओ भी जाणो हो के, थिस्सुलुनिक्यों आबाऊँ पेल्याँ फिलिप्पी नगर में माँ दुक उटायो अन बेजत व्या, पछे भी माँने परमेसर का आड़ीऊँ अस्यान की हिम्मत मली के, थाँने हव हमच्यार हूणावाँ।

3काँके माँको उपदेस जूटो, धोको देबावाळो अन छळ-कपट करबावाळो ने हे।

4पण जस्यान परमेसर माँने ईं जोगा जाणन हव हमच्यार ने हुणाबा को काम हूँप्यो हे। माँ ईंने वस्यानीस हुणावा हा अन अस्यान करन माँ मनकाँने ने, पण परमेसर ने जीं हरदा ने परके हे वाँने राजी कराँ हाँ।

5थाँ ईं बात ने हव तरियाऊँ जाणो हो के, माँ कदी फोगट की बड़ाई की बाताँ ने किदी अन नेई लोब-लाळच का वाते कस्यो बानो बणायो। ईं बात का परमेसर भी गवा हे।

6अन माँ ओ ने छावाँ के, थाँ अन मनक अन कुई दूजाँ माँने आदर-मान देवे।

7पण जस्यान बई आपणाँ बाळकाँ को पालण करे हे वस्यानीस नरमाई को वेवार माँ थाँका हाते राक्यो हे, ने तो माँ मसी का काम का वाते थरप्या तका को हक लगान थाँका पे बोज नाक सका हाँ।

8पण थाँका परेम में, माँ थाँने खाली हव-हमच्यारइस ने हुणायो, पण ईंका हाते माँ थाँका वाते जान देबा ने भी राजी हाँ, काँके थाँ माकाँ खास भई बणग्या हा।

9हो भायाँ-बेना, थाँ माँकी मेनत अन दुक ने आद राको हो ज्यो थाँका बचमें व्यो हो अन माँ रात-दन काम धन्धो करन थाँने परमेसर को हव हमच्यार हुणायो जणीऊँ थाँका पे कई बोज ने पड़े।

10थाँ अन परमेसर ईं बात का गवा हो के, थाँ विस्वास्याँ का बचमें माँको वेवार कस्यो पुवितर, धारमिक अन बना दोस को हो।

11थाँ जाणो हो के, जस्यान बापू आपणाँ बाळक का हाते वेवार करे हे वस्यानीस माँ भी थाँने हरेक ने उपदेस देन, सान्ती देन अन हमजाता हाँ।

12जणीऊँ थाँको चालचलन परमेसर जोगो वेवे, जीं थाँने आपणाँ राज अन मेमा में बलावे हे।

13एक ओरी वजेऊँ माँ थाँका वाते परमेसर को धन्नेवाद करा हाँ के, जद्याँ माँ थाँने परमेसर को हव हमच्यार हुणायो हो जद्याँ थाँ ईंने मनकाँ का आड़ीऊँ ने जाण्यो पण परमेसर को जाणन ईंने मान्यो अन हाँच भी योईस हे, ईं वजेऊँ परमेसर थाँकामें जद्याँ विस्वास करो हो तो काम करे हे।

14हो भायाँ-बेना, थाँका हाते भी वस्यानीस व्यो जस्यान यहूदियाँ परदेस में परमेसर की मण्डली का हाते व्यो हो, काँके वीं भी ईसू मसी ने मानता हाँ। थाँने भी थाँका मनकाँऊँ वस्योईस दुक मल्यो जस्यान वाँने यहूदी लोगाऊँ मल्यो हो।

15जणा मनकाँ परबू ईसू ने अन परमेसर का आड़ीऊँ बोलबावाळा ने मारिया अन आपाँने हताया हाँ, अणीऊँ परमेसर घणा नाराज हे, काँके वीं हाराई का विरोद में हे।

16वीं मनक जी यहूदी ने हे, वाँने बंचाबा को हव हमच्यार हुणाबा का वाते आपाँने रोके हे। अस्यान करबाऊँ वाँका पाप को घड़ो भरियो हे अन परमेसर को परकोप वाँका पे आग्यो हे।

17हो विस्वासी भायाँ, जद्याँ माँ थाँका हरदाऊँ ने पण देहऊँ थोड़ीक देर का वाते छेटी व्या हा, तो माँने थाँकी घणी आद अई हे अन थाँकाऊँ पाच्छा मलबा की माँ घणी कोसीस कररिया हाँ।

18ईं वाते माँ थाँका नके पाच्छा आणो छारिया, मूँ खुद पोलुस दो दाण थाँका नके आबा की कोसीस किदी, पण सेतान माँने ठामी राक्यो।

19थाँईस बतावो, माकाँ वाते माँकी आस, खुसी अन बड़ई को मुकट कूण हे? कई आपणाँ परबू ईसू का हामे वाँका आबा की टेम में थाँईस ने वेवो?

20हाँची में बड़ई अन खुसी थाँईस हो।

← Chapter 1 Jump to: Chapter 3 →