2 Peter 2

mewari

← Chapter 1 Jump to: Chapter 3 →

1जस्यान वीं टेम में वणा लोगाँ में परमेसर का आड़ीऊँ जूटा बोलबावाळा हा, वस्यानीस थाँका मयने भी परमेसर की आड़ीऊँ जूटा बोलबावाळा वेई, वीं छानेऊँ नास करबावाळा कामाँ ने करी अन वीं वणी मालिक को मान ने करी, जणी वाँने आजाद किदा हा, अस्यान करन वीं खुद को फटाकऊँ नास कर देई।

2घणा मनक वाँकी बाताँ मानन हूँगला काम करी, जिंकी वजेऊँ हाँच का गेला की बदनामी किदी जाई।

3वीं लाळच की वजेऊँ थाँने दिकावटी बाताँ बोलन थाँकाऊँ धन कमाई। वाँको दण्ड तो पेल्याँऊँ परमेसर ते कर मेल्यो हे अन वाँको नास वाँकी वाट नाळरियो हे।

4काँके परमेसर वणा हरग दुताँ ने जी पाप करिया हा, वाँने भी ने छोड़्या अन वाँने पाताळ में अंदारा की कोटड़ी में नाक दिदा हे, ताँके वीं न्याववाळा दन तईं वटे पड़्या रे।

5परमेसर वीं पुराणी दनियाँ ने भी कोयने छोड़ी, पण वो नूह ज्यो धारमिकता को परच्यार करिया करतो हो, वींने अन हात ओर मनकाँ ने जद्याँ तईं बंचातो रियो, तद्याँ तईं पापी मनकाँ की दनियाँ को बाड़ऊँ नास ने वेग्यो।

6परमेसर सदोम अन अमोरा जस्या नगरा ने दण्ड देन वानी का ढंगळा बणा दिदा ग्या हा, जणीऊँ पापी मनकाँ का वाते सबक बण सके के, वणा पापी मनकाँ का हाते कई व्यो हो।

7पण लुत धरमी मनक हो, ईं वाते परमेसर वींने बंचा लिदो हो, काँके वो पापी मनकाँ का पाप करबा की वजेऊँ दकी वेतो हो

8काँके वो धरमी मनक वणा पापी मनकाँ का हाते रेतो तको वाँके बुरा कामाँ ने देकन अन वाँके बुरा काम का बारा में हुणन रोज वींको मन घणो दकी वेतो हो।

9ईं तरियाँ परबू जाणे हे भगताँ ने न्याववाळे दन तईं कस्यान बंचान राक्या जावे हे अन पाप्याँ ने दण्ड का वाते कस्यान राक्या जावे हे।

10अन परमेसर खासकर वणा मनकाँ ने दण्ड देई, जीं बुरी मनसा का गेले चालन देह का जस्यान चाले हे अन परमेसर की माहनताऊँ नपरत करे हे। अस्यान का मनक बेकार अन टगीला हे अन ईं हरग की ताकता को भी अपमान करबाऊँ भी ने दरपे हे।

11जद्याँ के हरग-दुत तागत अन सामरत में अणा मनकाँऊँ भी मोटा हे, तद्याँ भी वीं परमेसर का हामे अणापे कई दोस ने लगावे हे।

12पण ईं मनक जनावर के जस्यान हे, ज्याको जनम ईं वाते व्यो हे के, वीं पकड़्या जावे अन मारिया जावे। ईं मनक जीं बाताँ का बारा में जाणेई कोयने वाँके बारा में दूजाँ ने भलो-बुरो केवे हे। ईं वाते जस्यान जनावर मारिया जावे हे वस्यानीस ईं मनक भी मारिया जाई।

13अणाने बुरई का बदले बुरईईस मली। वाँने दन का उजिता में कुकरम करणो हव लागे हे। ईं तो मनकाँ के नाम पे कळंक हे। ईं मनक थाँका हाते तेवाराँ पे भेळा वेवे हे, तो ईं मनक अणी ताक में रेवे हे के, अणाने अस्यान की कुई लुगई मल जावे जिंका हाते ईं कुकरम कर सके। अस्यान करबाऊँ वाँकी आक्याँ पाप करबाऊँ रके कोयने। ईं मनक भोळा-भाळा मनकाँ ने पाप करबा का वाते हिकावे हे। अणाको मन पुरी तरियाऊँ लाळचऊँ भरियो तको हे। ईं मनक हराप की ओलाद हे।

15ईं हुदा गेला ने छोड़न भटग्या हे। ईं मनक बओर का बेटा बिलाम का गेला पे चालरिया हे, जिंने हराम की कमई घणी हव लागी ही।

16पण वींका बुरा काम के वजेऊँ एक गदेड़ी, जो मनकाँ की बोली ने बोल पावे हे वाँ मनकाँ की बोली में बोली अन वींने तापड़्यो अन वीं परमेसर का आड़ीऊँ बोलबावाळा ने बुरो काम करबाऊँ रोक्यो।

17ईं धोको देबावाळा हुक्याँ तका कूण्ड़ा अन डूँज मूँ उड़बावाळा वादळा के जस्यान हे। अणा वाते जुग-जुग को अदंकार ठेरायो ग्यो हे।

18ईं मनक बेकार में मेपणा की बाताँ करन कुकरम की कामाँ के वजेऊँ वणा मनकाँ ने जीं अबे भटक्या तका मनक मेंऊँ निकाळणो छारियो हे वाँने देह की मनसा में फसा लेवे हे।

19ईं जूटा हिकबावाळा, वाँने आजाद करबा को वादो तो करी, पण खुद केद में हे, काँके जो मनक कणीऊँ हार जावे हे, तो वो वींको गुलाम बण जावे हे।

20अन जद्याँ ईं मनक छुटकारो देबावाळा परबू ईसू मसी का बारा में जाणबा का केड़े भी अन ईं दनियाँ की बुरई मेंऊँ निकळबा का केड़े पाच्छा वीं बुरई में जावे हे तो वणा मनकाँ के दसा पेलाँ की दसाऊँ भी हेली बुरी वेई।

21अणीऊँ हव तो ओ वेतो के, वीं धारमिकता की गेला ने जाणता कोयने अन वाँने जो पुवितर आग्या दिदी गी ही, वींने जाणन वणीऊँ मुण्डो फेर लेता।

22वाँके हाते तो वस्यानीस घटी जाई जस्यान के, वणा हाँची केवता में क्यो ग्या हो के “गण्डकड़ो आपणी उल्टी का नकेईस पाछो आवे हे” अन “अस्यानीस हापड़्यो तको हूर पाच्छा कादा में लोटबा का वाते कादा में जावे हे।”

← Chapter 1 Jump to: Chapter 3 →