3 John 1

mewari

Jump to:

1मूँ मण्डली को मुक्यो यहुन्नो, यो कागद गयुस ने लिकरियो हूँ। जणीऊँ मूँ हाँच पे चालबा की वजेऊँ घणो परेम करूँ हूँ।

2मारा प्यारा भई, मूँ परातना करूँ हूँ के, जस्यान थूँ आत्मिक बाताँ में आगे बड़रियो हे वस्यानीस हारी बाताँ में आगे बड़तो रे अन ताकड़े रे।

3जद्याँ थाँरा बारा में आपणाँ भायाँ मेंऊँ थोड़ाक जणा मने बतायो के, थूँ हाँच पे चाले हे अन हाँच ने माने हे, तद्याँ मूँ ओ हुणन घणो राजी व्यो।

4मने अणीऊँ हेली खुसी कणी भी बातऊँ ने वेवे के, मारा बाळक हाँच पे चाले हे।

5हे मारा प्यारा भई, थूँ आपणाँ विस्वासी भायाँ का नफा का वाते घणो करो हे। पलई वीं थाँरा वाते अणजाण काँ ने वेवे।

6ईं वाते तो वणा मण्डली का हामे थाँरा बारा में आ गवई दिदी हे के, थूँ वाँकाऊँ कस्यान को परेम राके हे। ईं वाते जद्याँ थूँ वाँने हिक देवे, तद्याँ अस्यान मदत करज्ये जस्यान परमेसर का मनक का हाते किदी जावे हे।

7काँके वीं मसी की सेवा करबा का वाते जारिया हे अन वणा जो विस्वास ने करे हे, वणा मनकाँऊँ मदत ने लिदी हे।

8ईं वाते आपाँ जी विस्वासी हाँ, आपाँने वाँकी मदत करणी छावे। जणीऊँ आपाँ भी वाँका हाते हाँच ने फेलाबा में भेळा वे सका।

9में एक कागद मण्डली ने भी लिक्यो भी हो, पण दियुत्रिफेस ज्यो नेतो बणणो छावे हे, वो माँ ज्यो कई केवा हाँ, वींने ने माने।

10ईं वाते जद्याँ मूँ आऊँ तद्याँ बताऊँ के, वो कई-कई करे हे। वो जूट बोल बोलन आपणाँ पे जूटा दोस लगावे हे अन वो योईस ने करे, पण भायाँ की आवभगत भी ने करे अन ज्यो कुई वाँकी आवभगत करणो भी छावे हे, तो वाँने वो करबा भी ने देवे अन वो वाँने मण्डली का बारणे काड़ देवे हे।

11हे मारा भई, थूँ तो बुरई का ने पण भलई का गेले चालज्ये, काँके ज्यो भी मनक भलई करे हे, वो परमेसर को हे अन ज्यो बुरई करे हे, वो परमेसर ने कोयने जाणे हे।

12दिमेत्रियुस का बारा में जाणबावाळा हाराई वींका बारा में हव गवई दिदी हे अन ओ हाँच भी हे। माँ खुद भी वींकी गवई देवाँ हा। थाँ तो जाणोइस हो, मारी गवई हाँची हे।

13थने लिकबा का वाते तो मारा नके घणी बाताँ हे पण मूँ सई अन कलमऊँ ईं बाताँ ने लिकणो छावूँ हूँ।

14पण मने तो आस हे के, मूँ थाँराऊँ वेगोई मलूँ अन आपाँ आमे-हामे बेटन बाताँ करा।

15थने सक सान्ती मलती रेवे। थाँरा हाराई विस्वासी भई थने नमस्कार केवे हे अन थूँ भी वटा का हाराई विस्वासी भायाँ ने नाम ले लेन नमस्कार केज्ये।

Jump to: