bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Mewari
/
mewari
/
Colossians 3
Colossians 3
mewari
← Chapter 2
Jump to:
Chapter 1
Chapter 2
Chapter 3
Chapter 4
Chapter 4 →
1
जदी थाँ हंगळा मसी के हाते आत्मा में पाच्छा जीवता व्या हो, तो थाँको मन हरग की चिजाँ पे लगावो। जटे ईसू मसी परमेसर का जीमणी पाड़े बेटा तका हे।
2
धरती की चिजाँ का बारा में मती होचो पण हरग की चिजाँ का बारा में होचो।
3
काँके थाँको पुराणो मनकपणो तो मरग्यो हे अन थाँको नुवो जीवन ईसू मसी का हाते परमेसर का नके हे।
4
थाँको जीवन मसी हे। जद्याँ वो मेमा का हाते परगट वेई, तद्याँ थाँ भी वींका मेमा में हाते परगट वेवो।
5
ईं वाते थाँ कुकरम, हूँगला पणो, बुरी वासना, हुगली मरजी, लोब-लाळच ज्यो मूरत पुजा का जस्यान को हे, अस्यान का दनियादारी का गुण ने आपणाँ मेंऊँ मार दो।
6
अणा हाराई कामाँ मस, परमेसर को कोप वींने ने मानबावाळा पे भड़के हे।
7
पेल्याँ जद्याँ अस्यी चिजाँ थाँका पे हावी ही, वीं दाण थाँ भी अस्या बुरा कामाँ मेंईस जीवन विताता हा।
8
पण थाँ अणा हारी चिजाँ का हाते अबे गुस्सो अन रीस, रिस्याँ बेळणो, गाळा काड़णी, हुगली बाताँ ने परी छोड़ दो।
9
एक-दूजाऊँ जूट मती बोलो, काँके थाँ थाँका जूना मनकपणा ने वींकी आदत का हाते छोड़ दिदो हे,
10
अन थाँ नुवा मनकपणा ने पेर लिदो हे, जणीऊँ थाँ आपणाँ बणाबावाळा परमेसर का जस्यान अन वाँके पाका ग्यान में हमेस्यान नुवा बणता जावो हो।
11
ईं वाते अबे मसी में ने कुई युनानी कन यहूदी, खतनावाळा कन बना खतनावाळा, ने जंगली हाव-भाव, ने बना अकल अन ने गुलाम कन आजाद, रियो हे। अणामें कई फरक ने रियो हे बेस मसीइस हारोई हे अन अणा हाराई में भी वींइस हे।
12
काँके थाँ परमेसर का चुण्या तका लाड़ला अन पवितर मनक हो, ईं वाते दया, भलई, नरमाई, सेण करणो अन हुदापणा ने धारण करो।
13
किंका पे थाँको ओळमो वे तो एक-दूँजा ने सेण करता तका अन एक-दूँजा ने माप कर दो। जस्यान परमेसर थाँने माप करे हे वस्यानीस थाँने भी एक-दूँजा ने माप करणा छावे।
14
अणा हारी बाताँ का ऊपरे परेम ने धारण करलो, काँके परेमईस हे ज्यो यो अणा हारी बाताँ ने हव तरियाऊँ भेळी करन राके हे।
15
अन मसीऊँ मली तकी सान्ती ने थाँका हरदा में राज करबा दो। परमेसर थाँने एक हाते एकीस देह में अणीस सान्ती में रेवा का वाते बलाया हे। अन हरदाण परमेसर को धन्नेवाद करता रेवो।
16
मसी का बचना ने आपणाँ हरदा में नराऊँ-नरा वसबा दो अन हाराई ग्यानऊँ एक दूजाँ ने हिकावो अन हेंचेत करता रेवो। थाँका हरदाऊँ परमेसर को धन्नेवाद करता तका भजन, बड़ई का गीत अन आत्मिक गीत गाता रेवो।
17
परमपिता परमेसर को धन्नेवाद करता तका ज्यो कई थाँ केवो कन करो हारोई परबू ईसू का नामऊँ करिया करो।
18
ओ लुगायाँ, आपणाँ-आपणाँ धणी का केवाँ में रो। काँके परबू में ओ सई हे।
19
ओ धण्या, आपणी-आपणी लुगायाऊँ लाड़ राको, अन वाँकाऊँ कल्डा वेवार मती राको।
20
ओ छोरा-छोरियाँ आपणाँ-आपणाँ बई-बापू को हारी बाताँ में केणो मानो, काँके परबू अणीऊँ राजी वेवे हे।
21
ओ बई-बापू आपणाँ-आपणाँ छोरा-छोरी ने तंग मती करो के, वाँको मन टूट जावे।
22
ओ हाळयाँ, ज्यो दनियादारी में थाँका मालिक हे, वाँकी हारई बाताँ ने मान्याँ करो, मनकाँ ने खुस करबा वाते वींका हामेईस ने, पण हाँचा मनऊँ अन परमेसर की दरपणी का हाते मान्याँ करो।
23
ज्यो कई थाँ करो हो, तन-मनऊँ करो, ओ हमजन के मनकाँ का वाते ने पण परबू का वाते कररिया हो।
24
आद राको के, परबू आपणाँ लोगाँ का वाते ज्यो ईनाम ते कर मेल्यो हे, वो थाँने देई, काँके थाँको हाँचो मालिक मसी हे।
25
काँके ज्यो बुरो करे हे, वो आपणी बुरई को फळ पाई अन वटे परमेसर किंकोई पकसपात ने करी।
← Chapter 2
Jump to:
Chapter 1
Chapter 2
Chapter 3
Chapter 4
Chapter 4 →
All chapters:
1
2
3
4
Recommended Reading
Commentary
Colossians Commentaries
→
Devotional
Colossians Devotional Guide
→
Get This Bible
mewari Study Bible
→