Hebrews 1

mewari

Jump to: Chapter 2 →

1परमेसर पुराणा टेम में आपणाँ आड़ीऊँ बोलबावाळा का जरिये नरई मोका पे नरी तरेऊँ आपणाँ बड़ाबाऊँ बाताँ किदी ही।

2पण अबे अणा आकरी दनाँ में परमेसर आपणाँ बेटा का जरिये आपाऊँ बाताँ किदी, अन वणीऊँस वणा ईं बरमाण्ड की रचना किदी। अन पछे वींने हारी चिजाँ पे अदिकारी बणायो।

3वो बेटो परमेसर की मेमा को उजितो हे अन जस्यान परमेसर का लकण हे, वस्यानीस वींका भी लकण हे। वो हारी चिजाँ ने आपणाँ जबरा बचनाऊँ हमाळी राके हे। मनकाँ का पापाँ ने माप करन वो हरग में जान मेमामय परमेसर का जीमणे पाल्डे बेटग्यो हे।

4वो ईं तरियाँ हरग-दुताँ मेंऊँ मोटो बणग्यो, जतरो वो वाँका नामऊँ मोटो हे, ज्यो वणी बापोती में पायो हे।

5काँके परमेसर हरग-दुताँ मेंऊँ किंने भी कदी अस्यान ने क्यो के, “थूँ मारो बेटो हे, आज मूँ थाँरो बाप बण्यो हूँ।” अन ने कदी वणी कस्या हरग-दुतऊँ यो क्यो के, “मूँ वींको बापू वेऊँ, अन वो मारो बेटो वेई।”

6अन पछे जदी परमेसर आपणी एकलोती ओलाद ने दनियाँ में खन्दावे तो वीं केवे हे के, “परमेसर का हाराई हरग-दुत वींकी भगती करे।”

7अन हरग-दुताँ का बारा में वीं अस्यान केवे हे के, “वीं आपणाँ हरग-दुताँ ने आत्मा अन आपणाँ दासा ने हगलती तकी वादी बणावे हे।”

8पण आपणाँ बेटा का बारा में केवे हे के, “हो परमेसर, थाँकी गादी हमेस्यान रेई, थाँ थाँका राज का मनकाँ पे न्याव का हाते राज करो।

9थूँ धरमीऊँ परेम अन आग्याने कोयने मानबावाळाऊँ दसमणी राकी। ईं वाते परमेसर, थाँरा परमेसर थने चुण्यो हे अन थने मान-समान को खुब आणन्द दिदो। थने थाँरा हण्डाळ्याऊँ घणो हेलो दिदो।”

10परमेसर यो भी केवे हे, “हो परबू, जद्याँ दनियाँ की सरुवात वेरी ही, तो थाँ धरती की नीम नाकी, अन हरग थाँका हाताँ की कारीगरी हे।

11वी तो नास वे जाई, पण थूँ हमेस्यान बण्यो तको रेई। अन वीं हाराई गाबा के जस्यान जूना वे जाई।

12अन थूँ वाँने चादरा के जस्यान लपेटी, अन वी गाबा के जस्यान बदल जाई, पण थूँ जस्यो हे, वोईस हमेस्यान रेई, अन थाँरा जीवन को अन्त कदी ने वेई।”

13परमेसर कदी भी कणी हरग-दुत ने अस्यान ने क्यो के, “थूँ मारे जीमणे पाल्डे बेट जा, जद्याँ तईं मूँ थाँरा दसमणा ने, थाँरा पगाँ का बाजोट ने कर दूँ।”

14तो पछे हरग-दुत कई हे? कई वीं हाराई हरग-दुत छुटकारो पाबावाळा मनकाँ की सेवा करबा का वाते खन्दई तकी आत्मा ने हे?

Jump to: Chapter 2 →