Jude 1

mewari

Jump to:

1यहूदो ज्यो ईसू मसी को दास अन याकूब को भई हो, वींका आड़ीऊँ ओ कागद वणा मनकाँ का नाम ज्याँने परमेसर बलाया हे अन वीं ज्याकाँऊँ परमेसर परेम राके हे अन ज्याँने ईसू मसी बंचान राक्या हे।

2थाँने दया, सान्ती अन परेम खुब मलतो रेवे।

3हो लाड़ला भायाँ, मूँ तो घणो छावतो हो के, थाँने वीं छूटकारा का बारा में लिकूँ, जिंका आपाँ पांतीदार हा। मने अस्यान भी लागे हे के, मूँ थाँने ईं बाताँ लिकन हिम्मत देऊँ जणीऊँ थाँ विस्वास में बड़ता रेवो, ज्यो विस्वास परमेसर का पुवितर मनकाँ ने दिदो ग्यो हो।

4पण थाँकी मण्डली में छानेऊँ अस्यान का मनक आग्या हे, ज्याँका बारा में सास्तर में पेल्याँई लिक्यो हे के, वाँने दण्ड मली, काँके वीं परमेसर ने कोयने जाणे हे। अणा मनकाँ परमेसर की दया ने खुद का वाते कुकरम करबा की छुट मान लिदी हे अन आपणाँ परबू जीं आपणाँ मालिक ईसू मसी हे वाँने मानबा का वाते नट जावे हे।

5थाँ तो अणा बाताँ ने जाणोइस हो, पण मूँ थाँने पाच्छी आद अवाड़णो छारियो हूँ के, परमेसर आपणाँ मनकाँ ने मिसर देसऊँ निकाळ बंचान लाया हो। पण वणा मनकाँ मेंऊँ थोड़ाक विस्वासऊँ फरग्या, ईं वाते वोईस परमेसर वणा मनकाँ ने ज्यो विस्वासऊँ फरग्या हा, वाँने नास कर दिदा हा।

6वो वणा दुताँ ने जीं आपणो पद ने हमाळन राक सक्या, वाँने परमेसर हमेस्यान का वाते वादी की सुल में न्याव का दन तईं न्याव वेबा का वाते बन्द कर दिदा हे।

7यो भी आद अवाड़ूँ हूँ के, सदोम अन अमोरा नगर ने अन वाँके नके का नगराँ का मनकाँ ने जीं कुकरम करता हा अन बुरा काम का गेले चालता हा। परमेसर वाँने कदी ने बजबा वाळी वादी में नाकन वाँने दण्ड दिदो अन या बात आपणाँ वाते हिक बणी।

8अस्यानीस वीं मनक जी थाँकी मण्डळ्याँ में आग्या हे, जीं हूँगला काम करता रेवे हे अन आपणी देह ने बगाड़रिया हे अन केवे हे अस्यान करबा का वाते परमेसर माने हपना में क्यो हे। वीं परमेसर की तागत ने बेकार हमजे अन हरग-दुताँ का विरोद में बोले हे।

9जद्याँ के हरग-दुत मीकाईल ज्यो दुताँ को मुक्यो हो, वो मूसा की लास का वाते सेतानऊँ वाद-विवाद कररियो हो, तो भी वो वींके हामे सेतान ने कई बुरी बात बोलबा की हिम्मत ने किदी, पण अतरोक बोल्यो के, “परबू थने तापड़ी।” काँके वींका नके भी न्याव करबा को अदिकार ने हो।

10पण ईं मनक तो जणा बाताँ का बारा में जाणी कोयने वाँका बारा में भलो-बुरो केवे हे। ईं तो बना हमजवाळा जनावराँ का जस्यान हे, जीं आपणी मरजी का जस्यान करे हे। अस्यान करन ईं खुद को नास कररिया हे।

11अणा मनक का वाते यो हराप वेई अन ईं केन के जस्यान वींके गेले चाले हे अन ईं बिलाम के जस्यान धन कमावा का वाते वींके जस्यान गलती करे हे। ईं वाते जस्यान कोरह का हाते जीं मनक विरोद कररिया हा, वाँको नास वेग्यो हे वस्यानीस अणाको भी नास वेई।

12ईं मनक थाँका हाते परेम को दिकावो करे हे अन थाँका हाते खावे पिवे हे, पण ईं तो समन्द का मयने हपी तकी मंगरी का जस्यान हे। ईं वणा गवाळ्याँ का जस्यान हे, ज्याँने गाराऊँ कई मतलब ने हे, वीं तो आपणो पेट भरणो जाणे हे। ईं वीं बना पाणीवाळा वादळा का जस्यान हे जिंने बईरो उड़ान ले जावे हे, ईं जंगल का वाँ रूँकड़ा का जस्यान हे, ज्याँके फळ ने लागे हे अन ज्याँने जड़ हमेत उकाड़ नाक्या वेवे।

13ईं मनक आपणाँ बुरा का जस्यान फेलाई, जस्यान तोफान की लेराऊँ समन्द जाग फेके हे। ईं अस्यान का तारा हे जी एक जस्यान ने चाले हे, ज्याँका वाते जुग-जुग तईं बळबा वाते वादी बणईगी हे।

14अणा मनकाँ का वाते हनोक ज्यो आदम की हातवी पीड़ी मेंऊँ हो, वो परमेसर का आड़ीऊँ बोल्यो हो के, “देको, परबू आपणाँ हजारो हजारो हरग-दुताँ का हाते आन,

15हाराई मनकाँ को न्याव करी अन जणा मनकाँ बुरा काम किदा हा अन परबू का विरोद में बोल्याँ हाँ, वाँने दण्ड देई।”

16काँके ईं मनक बड़बड़ाबावाळा, दूजाँ मनकाँ पे दोस लगाबावाळा, आपणी मरजी पुरी करबावाळा, मोटी-मोटी बाताँ करबावाळा अन आपणाँ नफो करबा का वाते दूजाँ की चमचागीरी करबावाळा हे।

17हो लाड़ला भायाँ, थाँ वणा बाताँ ने आद राकज्यो, ज्याँने थाँका नके परबू ईसू मसी का थरप्या तका चेला पेल्याँई बता दिदी ही।

18वणा थाँने क्यो हो के, “आकरी का दनाँ में अस्यान का मनक भी आई, जी परबू अन वाँका मनकाँ की मजाक उड़ाई अन वीं आपणी बुरी मरजी का जस्यान चाली।”

19ईं मनक वींइस हे, जी थाँकामें फुट नाके हे, ईं बेस अणी देह का जीवन का बारा मेंईस होचे हे अन अणामें परमेसर की आत्माने हे।

20पण हो भायाँ, थाँ एक-दूँजा ने आत्मिक रूपऊँ पुवितर विस्वास का हाते आगे बड़ता रेज्यो अन पुवितर आत्मा का हाते परातना करतो रेज्यो।

21आपणाँ परबू ईसू मसी की वाट नाळता रेज्यो काँके वोईस थाँने जुग-जुग को जीवन देई। ईं वाते परमेसर की भगती करबा में मन लगाज्यो।

22ज्यो मनक आगा-पाछा हे वाँका ऊपरे दया करज्यो।

23थाँ आगे बड़न वणा मनकाँ ने बंचा लिज्यो, जीं बंचाणा छारिया। वाँने वादी की लपटा में पड़्या तका ने बचावो हो वस्यानीस वाँने बंचा लिज्यो, वाँका पे दया बापू परबू की दरपणी राकन करज्यो। पण वाँका वणा गाबाऊँ जणापे वाँका पाप का भाव का धबा लागरिया हे, वाँकाऊँ छेटी रेज्यो, मारा केबा को मतलब ओ हे के, वाँका बुरा कामाँऊँ अलग रेज्यो।

24परमेसर थाँने पापऊँ बंचान आपणाँ हामे निरदोस साबत करन अन राजी करन आपणी मेमा करबा का वाते ऊबो कर सके हे।

25वोईस एकीस परमेसर ज्यो परबू ईसू मसी की वजेऊँ छुटकारो देबावाळो हे, वींकी मेमा, पराकरम, वेभव अन अदिकार दनियाँ की रचनाऊँ पेल्याऊँ अन अबाणूऊँ लेन जुग-जुग वाते वेती रेवे। अस्यानीस वेवे।

Jump to: