Romans 11

mewari

← Chapter 10 Jump to: Chapter 12 →

1तो मूँ पूँछू हूँ के, “कई परमेसर आपणी इजराएली मनकाँ ने नकार दिदा?” ने अस्यान कोयने हे। काँके मूँ भी अबराम का वंस को अन बिन्यामीन के गोत को इजराएली हूँ।

2परमेसर आपणाँ इजराएली मनकाँने ने नकारिया हे, ज्याँने वीं पेल्याँई जाणता हा। कई थाँ ने जाणो हो के, एलिया का बारा में सास्तर कई केवे हे, जद्याँ एलियो इजराएल का मनकाँ का विरोद में अरज कररियो हो?

3“ओ परबू, वणा थाँका आड़ीऊँ बोलबावाळा ने मार नाक्या अन थाँकी वेद्‍या ने तोड़ नाकी। अन मने छोड़न थाँरा आड़ीऊँ बोलबावाळा में कुई भी ने बच्यो अन वीं मने भी मारबा की ताक में हे।”

4पण परमेसरऊँ वींने कई जवाब मल्यो, “में मारा वाते हात हजार मनकाँ ने बंचा मेल्या हे, ज्यो जूटा देवता बाल का आगे गोडा ने टेकी।”

5अस्यान अबाणू भी थोड़ाक इजराएली मनक हे ज्यो परमेसर करपा की वजेऊँ चुण्या तका हे।

6यद्याँ ओ परमेसर की करपा को नतीजो हे, तो ओ मनकाँ का करमा को नतीजो ने हे। ने तो करपा ने केवाती।

7तो ईंको कई मतलब? इजराएल का मनकाँने वो ने मल्यो, जिंने वीं होदरिया हा, पण चुण्या तका ने वो मलग्यो। अन बाकी हाराई का मन ने गाटा कर दिदा ग्या।

8सास्तर में लिक्यो तको हे, “परमेसर वाँने बना चेता की आत्मा दिदी। ‘अस्यान की आक्याँ दिदी ज्याँने दिके कोयने। अन अस्यान का कान्दड़ा दिदो ज्यो हुण ने सके।’ अन आ दसा अबाणू तईं बणी तकी हे।”

9दाऊद केवे हे, “वाँके खुद का खाणो वाँका वाते फंदो, जाळ, ठोकर अन दण्ड को मस बण जावे।

10वाँकी आक्याँ धूधळी वे जावे, जणीऊँ वीं देक ने सके अन वाँकी कमर हमेस्यान वाँकी नमी रेवे।”

11तो पछे मूँ पूँछू हूँ के, कई वणा ईं वाते ठोकर खादी के, वीं नास वे जाई? अस्यान कोयने। पण वाँका गलती करबाऊँ ज्यो यहूदी ने हा, वाँ मनकाँ ने छुटकारो मल्यो, ताँके यहूदी मनकाँ में होड़ा-होड़ पेदा वेवे।

12अस्यान यद्याँ वाँका गलती करबा को मतलब दनियाँ की भरपुरी हे अन वाँका नाकाम वेबाऊँ ज्यो यहूदी ने हा, वाँ मनकाँ की भरपुरी हे, तो वणा हाराई के एक हाते वेबाऊँ तो कतरी ओरी भरपुरी वेई।

13अबे मूँ थाँ ज्यो यहूदी ने हो, थाँकाऊँ केरियो हूँ। काँके जस्यान खासतोर मूँ ज्यो यहूदी ने हे वाँ मनकाँ का वाते थरप्यो तको चेलो हूँ, अन मने मारा काम में गुमान हे काँके में मारा काम में पूरो मन लगा राक्यो हे।

14अस्यानीस मूँ छावूँ हूँ के, कस्यान भी मारा मनकाँ में होड़ा-होड़ ला सकूँ, जणीऊँ वाँका मूँ थोड़ागणा ने बचा लूँ।

15काँके यद्याँ परमेसरऊँ वाँको नकारियो जाणो दनियाँ में मेल-मिलाप लावे, तो वाँने अपणायो जाणो मरिया तकाऊँ जिवाया जणो कोनी वे सके हे कई?

16यद्याँ आपणाँ भेंट को भोग पुवितर हे तो वा हारोई पुवितर हे? यद्याँ रूँकड़ा की जड़ा पुवितर हे, तो वींकी डाळ्याँ भी पुवितर हे।

17पण जद्याँ थोड़ीक डाळ्याँ तोड़न फेंक दिदी जावे अन थाँ ज्यो एक जंगल का जेतुन रूँकड़ा का जस्यान हो अन थाँने वणा फेंकी तकी डाळ्याँ की जगाँ कलम किदा जावे, तो थाँ वीं रूँकड़ा ने जड़ाऊँ मलबावाळी चिजाँ में भागेदारी लेवो।

18तद्याँ थाँने वाँ डाळ्याँ का हामे जीं तोड़न फेंकी गी हे, मेपणो ने करणो छावे। अन जद्याँ मेपणो करो, तद्याँ ध्यान राको के, ईं थाँ कोयने हो ज्यो जड़ा ने पाळरिया हो, या तो वाँ जड़ हे ज्यो थाँने पाळरी हे।

19अबे थूँ बोली, “हा, पण डाळ्याँ ईं वाते तोड़ी गी, ताँके मूँ वींमें कलम चड़ायो जऊँ।”

20आ बात हाँची हे। पण वीं आपणाँ विस्वास ने करबा की वजेऊँ तोड़ी गी, पण थाँ थाँका विस्वास की वजेऊँ थाँकी जगाँ टक्या तका रेवो। तो ईंको मेपणो मती करो, पण दरपता रेवो।

21जद्याँ परमेसर असली डाळ्याई ने छोड़ी, तो वो थाँने भी ने छोड़ी।

22तो थूँ परमेसर की दया ने देक अन वींका गाटापणा पे ध्यान दे। ओ गाटापणा वाँका वाते हे ज्यो रेटे पड़ग्या हा, पण वाँकी दया थाँरा वाते हे। यद्याँ थूँ खुद पे वींकी दया बणी तकी रेवा देई। ने तो थने भी काटन फेंक दिदो जाई।

23अन जद्याँ वीं अविस्वासी ने रेई, तद्याँ वाँने वीं रूँकड़ा में जोड़ दिदा जाई, काँके परमेसर वाँने पाच्छा जोड़बा का वाते तागतवार हे।

24जद्याँ थने जनमऊँ जंगल का जेतुन का रूँकड़ाऊँ एक डाळी की तरियाँ काटन नेमा का विरोद में एक हव जेतुन का रूँकड़ाऊँ जोड़ दिदो ग्यो, तो ईं ज्यो वीं रूँकड़ा के खुद की डाळ्याँ हे खुद का रूँकड़ा में पाच्छी काँ ने जोड़ी जाई?

25हो मारा भायाँ, कटे अस्यान ने वे के, थाँ खुद ने घणा हूँस्यार हमजबा लागो, ईं वाते मूँ थाँने ईं छाने का हाँचऊँ अणजाण ने राकणा छावूँ हूँ, काँके इजराएल का मनक अस्यानीस गाटा बणा दिदा ग्या हे अन अस्यानीस तद्याँ तईं गाटा बण्या रेई जद्याँ तईं जी यहूदी ने हे वाँ मनकाँ मेंऊँ जीं चुण्या तका हे, वीं हाराई परमेसर का नके ने आ जावे।

26अन अस्यान हाराई इजराएली बंचाया जाई। जस्यान के सास्तर केवे हे, “बंचाबावाळो सिय्योनऊँ आई, वो याकूब का घराणा मेंऊँ हाराई अधरम छेटी करी।

27वाँका वाते मारो वादो योईस हे के, मूँ वींका पाप ने छेटी कर देऊँ।”

28जद्याँ तईं हव हमच्यार को सवाल हे वीं थाँका नफा में परमेसर का दसमण हे, पण जद्याँ तईं परमेसर का हाताऊँ चुण्या जाबा की बात हे, तद्याँ वीं वाँका बड़ाबा का वजेऊँ परमेसर का लाड़ला हे।

29काँके परमेसर बलायो जाणो अन वींका वरदान कदी ने बदल्या जा सके हे।

30काँके जस्यान पेल्याँ थाँ ज्यो यहूदी ने हो, थाँ परमेसर की आग्याने ने मानता हा, पण अबे यहूदी मनकाँ के आग्याने ने मानबा की वजेऊँ थाँने परमेसर के दया मली हे।

31वस्यानीस अबे वीं वींकी आग्याने ने माने, काँके परमेसर की दया थाँका पे हे। ताँके वाँने भी अबे परमेसर की दया मले।

32काँके परमेसर हाराई मनकाँ ने आग्या ने मानबा की कोटड़ी में गेर मेल्या हे के, वीं वाँका पे दया करे।

33परमेसर की भरपुरी, अकल अन ग्यान को कई पार ने हे। वींको न्याव कतरो गेरो अन वींका गेला कतरा भेदऊँ भरिया हे।

34जस्यान सास्तर लिक्यो तको हे के, “परबू का मन ने कूण जाणे हे? अन वींने सला देबावाळो कूण वे सके हे?”

35“परमेसर ने कणी कई दिदो? के वो वींने पाछो देवे।”

36काँके हाराई ने रचबावाळो वोईस हे। वणीऊँस हाराई हे अन वीं वींका वातेईस हे। वींकी मेमा हमेस्यान वेती रेवे! आमीन।

← Chapter 10 Jump to: Chapter 12 →