Titus 3

mewari

← Chapter 2 Jump to:

1थूँ मनकाँ ने आद अवाड़ के, राज करबावाळा अन अदिकारी को क्यो माने। अन हरेक तरियाँ का भला काम करबा का वाते त्यार रेवो।

2वाँने केज्ये के, वीं किंकई का बारा में बुरो ने बोले, पण हाराई का हाते हव वेवार राकन हली-मलीन सान्तीऊँ रेवे।

3काँके मसी ने मानबाऊँ पेल्याँ आपाँ भी बना ग्यान का, केणो ने मानबावाळा, भटक्या तका अन हरेक तरियाँ की मो-माया का गुलाम हाँ। आपणो जीवन बुरई अन मेपणाऊँ भरियो हे। अन आपाँ एक-दूजाऊँ दसमणी राकता हाँ।

4पण आपाँने बंचाबावाळा परमेसर की करपा अन परेम मनक का वाते परगट करियो ग्यो,

5यो ईं वाते ने व्यो के, आपाँ धरम का काम कररिया हा, पण आ वाँकी करपाइस ही के, वो आपाँने पुवितर आत्मा का आड़ीऊँ बंचावे, ज्या आपाँने धोन नुवो जनम अन नुवो जीवन देवे हे।

6परमेसर आपाँने छुड़ाबावाळा ईसू मसी का आड़ीऊँ आपणाँ पे भरपुरीऊँ पुवितर आत्मा देवे हे।

7वीं करपाऊँईस आपाँ परमेसर का हामे सई ठेरा हा, जणीऊँ कदी ने खतम वेबावाळा जीवन का वारिस वेवा, जिंकी आपाँ आस राका हाँ।

8आ हाँची बात हे। मूँ छावूँ हूँ के, अणी मामला में थूँ खासतोर जोर देन के, जणीऊँ परमेसर पे विस्वास करबावाळा भला काम करता रेवे। ईं बाताँ मनकाँ का वाते हव अन नफा की हे।

9बेकार की बाताँऊँ, वंसावल्या की गणतीऊँ, लड़ई-जगड़ाऊँ अन नेमा का बारा में लड़बाऊँ बंचन रेवो, काँके ईं बाताँ बेकार अन बना मतलब की हे।

10फुट नाकबावाळा मनकाँ ने चेता अन जद्याँ वो एक दाण में ने माने तो वाँने दूजी दाण का चेता तद्याँ वीं दूजी दाण भी ने माने, तो वाँकाऊँ अलग वेजा।

11थूँ ओ जाणे हे के, अस्यान का मनक हाँचऊँ भटकग्या हे अन वाँका पाप वाँने गलत साबत करे हे।

12जद्याँ मूँ अरतिमास कन तुखिकुस ने थाँरा नके खन्दाऊँ। अन वाँके पूगताई थूँ फटाकऊँ मारा नके निकुपुलिस नगर में अई जाज्ये, काँके हियाळा-हियाळा में वटेईस रेवा की मनसा किदी हे।

13थूँ वकील जेनास अन अपुलोस का हाते वाँका यातरा का वाते जरूत की चिजाँ बांद दिज्ये, जणीऊँ वाँने कणी भी बात की गटी-कमी ने वेवे।

14आपणाँ मनकाँ ने दूजाँ की जरूत पुरी करबा का वाते, पूरा मनऊँ हव काम करबा में टेम बिताणो छावे, अन वाँने बेकार को जीवन ने जीवणो छावे।

15मारा हण्डाळ्याँ का आड़ीऊँ थने नमस्कार लिकूँ हूँ। विस्वास में वेबाऊँ जीं भई आपणाँऊँ परेम राके हे, वाँने माँकी आड़ीऊँ नमस्कार केज्ये। परमेसर की दया थाँ हाराई पे बणी तकी रेवे।

← Chapter 2 Jump to: