3 John 1

Marwari Bible

Jump to:

1आ चिठ्ठी कलीसिया रौ अगुवो म्हैं यूहन्‍ना री तरफ ऊं प्यारै भाई गयुस रै नाम, जिण ऊं म्हैं साचौ परैम राखूं हूं।

2हे प्यारै भाई, म्हारी आ पराथना है की ज्यौ थूं आत्मिक बढ़ोतरी कर रियौ है, व्यौंही थूं सगळी बातां मे बढ़ोतरी करै अर चंगो भलौ रैवै।

3क्यूंकै जद कईक विसवासी भाइयो नै आयनै थारै उण सचाई री गवाई दी, जिण हकीगत माथै थूं चालै है, तो म्हैं घणौ ही खुस होयौ।

4म्हनै इण ऊं बढ़नै और कोई आंणंद कोनीं की म्हैं सुणूं, की म्हारा टाबर सचाई माथै चालै है।

5हे प्यारै भाई, बड़िया है की थूं विसवासी भाइयो री मदद करै है। थूं उण विसवासी भाइयो री भी मदद करै है, जिकौ परदेसी है।

6उणौनै कलीसिया रै सांमै थारै परैम री गवाई दीनी है। जे थूं उणौनै उण तरैह विदा करैला जिण तरैह परमेसर रै लोगां रै लियै वाजिब है तो बड़िया करैला।

7क्यूंकै वे मसीह नाम रै लियै निकळिया है, अर अविसवासी लोगां ऊं कीं मदद कोनीं लेवे।

8इण वास्तै ऐड़ौ री मदद करणी चाहीजै, ताकी म्हौ भी सचाई री सेवा री घोसणा मे सहयोगी बण सकौ।

9म्हैं कलीसिया नै एक चिठ्ठी लिखी ही, बल्कि दियुत्रिफेस जिकौ उणमे अगुवो बणणौ चावै हो, वो म्हौरी बातां नै स्वीकार कोनीं करै।

10इण वास्तै जद म्हैं आऊंला तो उणरै कांमां रौ जिकौ वो कर रियौ है, याद दिलाऊंला, की वो म्हौरै बारै मे भूंडी भूंडी बातां बक रियौ है। उणरै लियै ओहीज काफी नीं है। क्यूंकै वो भाइयो नै स्वीकार कोनीं करै अर उणौनै जिकौ स्वीकार करणै चावै है मना करै है अर कलीसिया ऊं निकाळ दैवै है।

11हे प्यारै भाई, भूंडाई रै नीं बल्कि भलाई रौ अनुकरण करौ। जिकौ भलाई करै है, वो परमेसर री तरफ ऊं है, बल्कि जिकौ भूंडाई करै है, उणै परमेसर नै कोनीं देख्यौ।

12दिमेत्रियुस रै बारै मे सगळौ नै बड़िया गवाई दी है, अर वो साची भी है। अर म्हौ भी गवाई देवो हो, अर थूं जांणै है की म्हौरी गवाई साची है।

13म्हैं थनै लिखणौ तो घणौ कीं हो, बल्कि स्याही अर पेन ऊं लिखणौ कोनीं चावूं।

14पर म्हनै आसा है की थारै ऊं जल्दी मिळूंला, तद म्हौ खनै बैठनै बातचीत करौला।

15सानति थनै मिळती रैवै। एठै रा दोसत थनै नमस्कार कैवै है। उठै रा हरैक दोसतो ऊं नाम ले लैयनै नमस्कार कैह दैणौ।

Jump to:

Recommended Reading

Commentary 3 John Commentaries → Devotional 3 John Devotional Guide → Get This Bible Marwari Bible Study Bible →