1 John 2

Mazanderani GMB (گیله ماز)

← Chapter 1 Jump to: Chapter 3 →

1می کوچِ وَچِه هان، اینه شِمِره نِویسِنَم تا گُنا نَکُنین. وَلی اَگه کَسی گُناهی هَکُردِه، ایتا مُدافع پیَرهِ وَرجه داریم، یَعنی عیسیِ مَسیحِ صالِح.

2عیسی اَمیِ گُناهانِ کَفّارِئِه، وَ نه فقط اَمیِ گُناهِان، بلکه تمام عالَمِ گُناهان.

3ایجه یه جی دانیم اونه اِشناسِنیم اگِه اونه احکامِ بِجا بیاریم.

4هر کی که گونِه ”اونِه اِشناسِنِه“، وَلی اونه احکامِ بِجا نیارنِه، دُروزَنِ و حقیقَت اونه دِلِه دَنیِه.

5وَلی هر کی که اونه کَلامِ بِجا هارنه، راس راسی خُدایِ مُحبت اونه دِلِه کامِل هَبا. اینجوری اَما دانیم که اونه دِلِه دَریم:

6هر کی که گونِه اونه دِلِه ماندِنِه، بایسّی هَمونجور زندگی هَکونه که اون زندگی کانِبا.

7اِی عَزیزِان، مَن ایتا تازِه حُکم شِمِره نَنویسِنَم، بلکه ایتا قَدیمی حُکم نِویسِنِم که شِروعِ جی داشتِین. این قَدیمی حُکم، همون پِیغامِ که بِشنَوِسّین.

8با این حال، ایتا تازِه حُکم شِمِره نِویسِنَم که اونه حقیقَت اونه دِلِه و شِیمی دِلِه هَم آشکارِ، چون ظُلَمات گُذَرنِه و حَقیقی نور هَمین اَلآن هَم دَرِه تابِنِه.

9هر کی که گونِه نورِ دِلِه دَرِه وَلی خودشه اَداشِ جی بیزارِه، هَلَه ظُلَمات دِلِه به سَر بَرنهِ.

10هر کی که خودشه اَداشِ دوس دارِه نورِ دِلِه ماندِنهِ، وَ اونه دِلِه هیچ‌ دَلیلی لَغزِشِ وَسین دَنیِه.

11وَلی هر کی که خودشه اَداشِ جی بیزارِه، ظُلَمات دِلِه دَرِه و ظُلَمات دِلِه قَدَم زَنه. وَ اون نِدانه کوجهِ شونِه، چون ظُلَمات اونه چِشمِ کُور هَکُردِه.

12شِمِره نِویسِنِم، اِی کوچِ وَچِه هان، چون شیمی گُناهان اونه اِسمِ خاطری بَخشیدِه هَبا.

13شِمِره نِویسِنَم، اِی پیَران، چون اونیکه شروعِ جی دَبا رِه، بِشناختین. شِمِره نِویسِنَم، اِی جَوانان، چون اون شَریرِ حَریف هَبَین. شِمِره نِویسِنَم، اِی وَچِه هان، چون پیَرِ بِشناختین.

14شِمِره نِویسِنَم، اِی پیَرِان، چون اون که شروعِ جی دَبا رِه، بِشناختین. شِمِره نِویسِنَم، اِی جَوانان، چون رَسدارِین و خُدای کَلام شِیمی دِلِه ماندِنهِ، وَ اون شَریرِ حریف هَبَین.

15دُنیا و اونچه که اونه دِلِه دَرِه رِه، دوس نِدارید. اَگه کَسی دُنیا رِه دوس دارِه، پیَرهِ مُحبت اونه دِلِه دَنیِه.

16چون هر چی دُنیایِ دِلِه دَرِه، یَعنی جِسمِ هَوا و هَوَسِشان، چِشمِ هَوا و هَوَسِشان، زندگی یه غُرور، نه پیَرهِ جی بلکه دُنیایِ جی یه.

17دُنیا و اونه هَوا و هَوَسِشان گُذَرنِه، وَلی اونیکه خُدایِ اِرادِه رِه بِجا هارنه، تا اَبد بِجا ماندِنه.

18وَچِه هان، این آخرین ساعَتِ و هَمونجور که بِشنَوِسِّین ’ضِدِّ مسیح‘ هَنه، اَلآن هَم خِیلی ضِدِّ مَسیحِان بومَن، ایجه یه جی فَهمِنَم که آخرین ساعتِ.

19اوشان اَمیی میَن جی دِرگا بَشَن، وَلی اَمیی جی نَبان؛ چون اَگه اَمیی جی بان، اَمیی هَمرَه مانِدِنه بان. وَلی اوشان رَفتَن نِشان هَدَه که اوشان هیچکِدام اَمیی جی نَبان.

20وَلی شُما اون قُدّوسِ طریقِ جی مَسح هَبَین، وَ تمام شُما همه چیرِه دانید.

21مَن شِمِره نِویسِنَم، نه اینِه وَسین که حَقیقَتِ نِدانین، بلکه اینِه وَسین که اونِه دانید، وَ اینِه وَسین که هیچ دُرویی حَقیقَتِ دِلِه دَنیِه.

22دُروزَن کیِه، جز اون آدَمی حَشا کانه عیسی، مَسیحِ موعودِه؟ اینجور آدَم هَمون ’ضِدِّ مسیحِ‘ که هم پیر و هم ریکا رِه حَشا کانه.

23هر کی ریکا رِه حَشا هَکونه، پیر رِه هَم نِداره، وَ هر کی ریکا رِه اعتراف هَکونه، پیر رِه هَم دارِه.

24بَنین اونچه که شروعِ جی بِشنَوِسّین شِیمی دِلِه بُمانه؛ اگه اونچه که شروعِ جی بِشنَوِسّین شِیمی دِلِه بُمانه، ایما شُما هَم پیَر و ریکایِ دِلِه ماندِنید.

25وَ این اونچیِه که اون اَمَرِه وَعدِه هَدَه، یَعنی اَبَدی زندگی.

26مَن اوشانه بارِه شیمی وَسین این چیزانِ بَنویشتَم که تَقَّلا کانَن شِمِرِه گُمراه هَکُنَن.

27وَلی شِیمی بارِه باید باگوُم اون مَسحی که اونه جی بِیتین، شِیمی دِلِه ماندِنه و نیازی نِدارید کَسی شِمِرِه تَعلیم هَدِه، بلکه اونه مَسح هَمِه چیز بارِه شِمِرِه تعلیم دَنه. اون مَسح راس راسیه، نه دُرو. پَس هَمونجور که شِمِرِه تعلیم هَدَه اونه دِلِه بُمانید.

28اَسِه، اِی وَچِه هان، اونه دِلِه بُمانید تا موقِه ایی که اون ظهور هَکونه مُطمَئِن هَبیم و اونه بموئَنِ موقِه اونه جی شَرمَندِه نَبیم.

29اَگه شُما بِفَهمِسّین که او صالِحِ، شُما دانید اونیکه صالِحی رِه بِجا هارنه، اونه جی دُنیا بوما.

← Chapter 1 Jump to: Chapter 3 →