1 Thessalonians 1

Mazanderani GMB (گیله ماز)

Jump to: Chapter 2 →

1پولُس و سیلاس و تیموتائوسِ طرفِ جی، تِسالونیکی یه شهرِ کلیسایِ وَسین که خُدای پیَر و خُداوند عیسی مَسیح دِلهِ دَرِین: فیض و صُلح و سلامتی شِمِرِه بیه.

2اَما هَمَش خُدا رِه شِیمی خاطری شُکر کانیم و اَمی دُعاهای دِلهِ یِکسره شیمی جی یاد کانیم،

3شیمی کار که ایمان راهِ جی هیسه و زحمتی که مُحبتِ راه دِلِه کَشِنِین و شِیمی اُمیدِ پایداری که اَمیی خُداوند عیسیِ مسیحِ دِلِئه، خُدا و اَمیِ آسمانی پیَرهِ پِیش هَمَش اَمی یاد هارنیم.

4چون اِی اَداشان که خُدایِ عزیزِانید، اَما دانیم که خُدا شِمِره انتخاب هَکُردِه.

5چون اَمیی اِنجیل فقط گَبِ هَمرَه شِمِره نَرسییَه، بلکه قُوّتِ دِلهِ و روح القدسِ دِلِه و اطمینانِ کاملِ هَمرَه شِمِره بَرِسییَه؛ هَمونجور که خوب دانید شِیمی خاطِری چِطور شِیمی میَن رفتار هَکُردیم.

6شُما اَمیی جی و خُداوَندِ جی سَرمَخش بِیتین، چون خیلی مُصیبت دِلهِ، خُدایِ کلامِ اون خُشحالی یه هَمرَه که روح القدس دَنهِ، قبول هَکُردین.

7اینجوری شُما تمام مقدونیِه و اَخائیه یه ایماندارانِ وَسین سَرمخش هَبَین،

8چون نه فقط خُداوَندِ کَلام شیمی طریق مقدونیه و اَخائیه یه منطقه های دِلهِ دَپیتِه، بلکه شیمی ایمان داشتَن خُدا رِه، تُکِ سَر دَکِته، جوریکه دِ لازم نیِه اَما یِچی باگوییم.

9چون اوشان، خودِشان، اینه جی که چِطور شُما گرمی یه هَمرَه اَمیی پیشواز بومَین گَب زَنَن، و اینکه چِطور بُتِشانِ جی دَس بَکشییَین و خُدایِ سَمت وَگَرِسَّین تا زندهِ و حقیقی خُدا رِه خِدمَت هَکُنید

10وَ تا آسِمانِ جی خُدایِ ریکایِ بموئَنِ انتظارِ بَکِشین، که خُدا مُردگانِ جی اونه زندهِ هَکُردِه، یَعنی عیسی، که اَمَرِه اون غَضَبِ جی که ایما هَنه آزاد کانه.

Jump to: Chapter 2 →