2 Corinthians 13

Mazanderani GMB (گیله ماز)

← Chapter 12 Jump to:

1این سوّمین دَفِه که شیمی بَدییَنِ وَسین هَنَم. «هر گَبی دو یا سِه تا شاهدِ هَمرَه ثابت بونه.»

2مَن می دوّمین دیدارِ دِلِه که اوجِه دَبام، اوشانی رِه که پیشتر گُناه هَکُرده بان، و بَقیِه رِه هَم هُشدار هَدَم و اَلان هَم که اوجِه دَنییَم باز هم هُشدار دَنَم که اگه یِدَفِه دیگه شیمی وَرجه بییَم، اوشانِ رحم نُکانَم.

3چون شُما ایتا دلیلِ دُمّال دَرین که ثابت هَکُنید که مَسیح می طریقِ جی گَب زَنِه. مسیح شیمی پیش ضعیف نیِه، بَلکه شیمی میِن رَسدارِه.

4چون هرچَن ضَعفِ دِلهِ مَصلوب هَبا، وَلی خدایِ قوّت هَمرَه زندگی کانه. چون اَما هَم اونه دِلهِ ضعیفیم، وَلی شیمی پیش اونه هَمرَه خُدایِ قوَّتِ هَمرَه زندگی کانیم.

5شِمِرِه آزمون هَکنید تا بَینین ایمان دِلهِ دَرِین یا نه. شِمِرِه مَحَک بَزِنین. یا مَگِه اینه شیمی باره نِفَهمِنین که عیسی مَسیح شِیمی دِلهِ دَرِه؟ مَگِه اینکه این آزمونِ دِلهِ رَد هَبین!

6و امیدوارَم اینه بِفَهمین اَما این آزمون دِلِه رَد نَبَیم.

7ولی اَمی دُعا خُدایِ وَر اینه که خطا نَکُنین؛ نه تا معلوم هَبو که اَما آزمونِ جی سَر بُلَند دِرگا بومَیم، بلکه تا شُما اونچه که دُرس هیسِه رِه، هَکُنید، حتی اَگِه اینجوری نشان هَدِه که اَما رَد هَبَیم.

8چون نَتّنیم حقیقَت علیه هیچ کاری هَکُنیم، بَلکِه هر چی کانَیم حَقیقَتِ وَسین هیسِه.

9چون هر وخت اَما ضعیف هَبیم و شُما رَسدار، اَمی خوشحالی یه باعِث بونه، و اَمیِ دُعا این که شُما باز هَم جان هَگیرین.

10اینِ وَسین، این چیزان رِه وقتی شیمی وَر دَنییَم شِمِرِه نِویسِنَم تا وَختی شِیمی وَرجه بومَم، مَجبور نَبوم می اقتدارِ جی تُندی یه هَمرَه رفتار هَکُنَم، اون اقتدارِی که خداوند نه ویران هَکُردَن وَسین، بَلکِه بَنا هَکُردَن وَسین مَرِه هَدَه.

11سَر آخَر، اِی اَداشان، خوشحال هَبین؛ شیمی فِکر این هَبو که باز هَم جان هَگیرین؛ و همدیگرِ تسلّی هَدین، همدیگرِ هَمره هم نظر هَبین، صُلح و سلامتی یه دِلِه زندگی هَکُنی؛ که خدایِ مُحبت و صُلح و سلامتی شِیمی هَمرَه ماندِنِه.

12هَمدِیگَرِ مُقَدَّس خُوشِ هَمرَه سَلام هَکُنید.

13تمام مُقَدَسین، شِمِرِه سِلام رِساندِنَن.

14خداوند عیسی مَسیحِ فِیض، خُدایِ مُحَبَت و روح القدوسِ رِفاقت شِیمی هَمرَه دَبو.

← Chapter 12 Jump to: