Philemon 1

Mazanderani GMB (گیله ماز)

Jump to:

1پولُس طرفِ جی، مسیحْ عیسی یِه زِندانِی، وَ تیموتائوس، اَمیی اَداش، اَمیی عزیزِ رَفیق وهمکار فیلیمونِ وَسین،

2اَمیی خاخُر آپْفیا و اَمیی همرزم آرخیپوس، وَ کلیسایِ وَسین که تی سِرِه یه دِلِئه:

3فیض و صُلح و سلامتی اَمیی پیَر، خُدا، وَ خُداوند عیسی مَسیح طرفِ جی شِمِرِه بیِه.

4مَن تی یاد بیاردَنِ هَمرَه می دُعاهایِ دِلِه هَمَش خُدا رِه شُکر کانَم

5چون مَن تی مُحبت و ایمان بارِه که خُداوند عیسی و تمام مُقَدَسین وَسین داری رِه اِشنَوِنَم،

6و دُعا کانَم که تی ایمان شریک هَبوسَّن کُمک هَکونه که مسیحِ خاطری هر خُجیرِ چی یه بارِه که اَمیی دِلِه دَرِه، ایتا کامِلِ شناختِ ثمر بیارِه.

7تی مُحبتِ مَرِه خیلی خوشحال هَکوردِه و تسلّی بِیتَم، چون مُقَدَسینِ دِل تی خاطری باز هم جان بِیتِه.

8اینه وَسین، هر چَن مَسیح دِلهِ این جُرأتِ دارَم که تِرِه حُکم هَکونَم اونچه که لازِمِ رِه هَکُنی،

9با این وجود مُحبتِ خاطری صلاح دانَم تی جی خواهِش هَکُنَم، مَن پولُس که ایتا پیر مَردایَم، و اَسِه هَم مسیحْ عیسی یِه زِندانییَم،

10می وَچِه اونیسیموسِ بارِه که زِندانِ دِلِه اونه روحانی پیَر هَبام، تی جی ایتا خواهش دارَم.

11اون قدیمان تِرِه فایده ایی نِداشتَه، وَلی اَسِه، هم تِرِه و هم مَرِه فایدِه داره.

12مَن می جیگر گوشِه رِه تی ور وَگِرداندِنَم

13مَن خَسَّم تا این مُدَّتی که اِنجیلِ خاطری زِندانِ دِلِه دَرِم اونه می ورجه بِدارَم، تا اون تی عوض مَرِه خِدمت هَکونه

14ولی نَخَسَّم بدون تی رضایت کاری هَکورده بوم، تا تی خوبی هَکُردَن زور هَمره نَبو بلکه تی میلِ سَر هَبو.

15شاید اینه خاطِری با که، یه مُدّتی تی جی سیفا هَبا تا هَمیشه یه وَسین تی وَرجه وَگِرده،

16ولی دِ، نه ایتا پاکارِ مِثان، بلکه پاکاری جی بالاتر، ایتا عزیزِ اَداشِ مِثان. بِخصوص می وَسین، وَلی چَنّی بیشتر تی وَسین، هم جِسمِ دِلهِ هم خُداوندِ دِلِه.

17پَس اَگِه مَرِه تیِ رَفیق دانی، اونه هَمونجور قَبول هَکُن که مَرِه قبول کانی.

18اَگِه تِرِه بَدی هَکُردِه یا یِچی تِرِه بدهکارِ، اونِه می حِساب بَنی.

19مَن، پولُس، می دَس هَمرَه نِویسِنِم: که اونِه تلافی کانَم - اَلبَتَر لازم نیِه باگوم که تو تیِ جانَم می مَدیونی.

20آرِه اِی اَداش، خَنَم که خُداوندِ دِلهِ تی جی ایتا نَفع مَرِه بَرِسِه. می جان مسیحِ دِلهِ تازِه هَکُن.

21اینه نِویسِنَم چون تی اِطاعَت هکُردنِ جی مُطمئنم، و دانَم حتّی بیشتر اَز اونچه که گونَم، کانی.

22ضِمناً، ایتا اُتاق هَم مَرِه حاضر هَکُن، چون اُمید دارَم که خُدا شِیمی دُعاها رِه مُستجاب کانه مَرِه شِیمی ورجه وَگِرداندِنِه.

23اِپافْراس، که مسیحْ عیسی یِه خاطری می هَمرَه زِندانِ دِلِه دَرِه، تِرِه سلام رِساندِنِه.

24هَمینجور می همکارِان، مَرقُس، آریستارخوس، دیماس و لوقا، تِرِه سلام رِساندِنَن.

25خُداوند عیسیِ مَسیح فیض شِیمی روحِ هَمرَه دَبو.

Jump to: