1 Peter 3

ndau

← Chapter 2 Jump to: Chapter 4 →

1Ngokudaro, imwimwi vakadzi, pfairai vamuna venyu, kuti kunyazwi varipo vamweni vavo vasikapurutani izwi, vangakokwawo pasina izwi ngenjira yevanopona ndiyo vakadzi vavo,

2apo pevanoona kucheneswa nokuremeredza mukupona kwenyu.

3Musadzinemesa pachenyu ngokunemeswa kwokubanze, kwokuruka bvudzi nokusimira zvinemeso zvomukore nokuti zvokusimira zvakanakisisa;

4asi ngakuite kwomunhu wakafishika womumwoyo, ngezvinemeso zvisikaori zvomweya wakapfaa wakanyarara, uwo unemutengo mukuru mukuona kwaMwari.

5Ngokuti ngokudarowo karetu vakadzi vakacheneswa, avo vakagonda kunaMwari, vakadzinemesa ngokupfaira vamuna vavo.

6Kudai ndiSara wakapurutana Abrahama, echimudaidza kuti mambo. Mwaita vana vake, apo mwechiita zvakanaka, musikatendi kuti kutyisa kumukarudze.

7Ngokudaro imwimwi vamuna, garai nevakadzi venyu kudai ngezvinosisira mwechiremeredza vakadzi kudai ngechidziyo chakarembedzeka, kudaizve ngavanogara nhaka imweyo yenyasha dzokupona, kuti mikumbiro yenyu isazopingaidzwa.

8Pakupedzisira, imwimwi mweshe itai vano mwoyo umwewo, vanozwirana urombo, dananai kudai ngehama umwe kunoumweni, mune mwoyo inenyasha nemipinimidzo yakapfaa.

9Musaunzidzira zvakashata ngezvakashata nokuti kutuka ngokutuka; asi ngenjira imweni unzidzirai ngechifumiso, ngokuti mwakadaidzwa kuneizvo kuti mugare nhaka yokufumiswa.

10Ngokuti, “Uwo unozoda kupona nokuda kuona mazuva akanaka, ngaarambidze rurumi rwake kubva kunezvakashata, nomuromo wake kubva mukuereketa zvinochengedzera;

11ngaafuratire kubva kunezvakashata, aite zvakanaka; ngaatsvake kunyarara akuteere.

12Ngokuti madziso aMambo Mwari anoringira padera pevakarurama, nenzee dzake dzinopurutana kumikumbiro yavo. Asi hope yaMambo Mwari inorwa navo vanoita zvakashata.”

13Zvino ndiani ungazomuremadza kudai mwechitsamwirira kuita izvo zvakanaka?

14Asi kunyazwi mwechitambudzika ngokuita zvakarurama, munofumiswa. Musatya zvevanotya, zve, musatyisidzirwa,

15asi mumwoyo yenyu remeredzai Kristu aite Mambo. Mugare mwakanasirira kupingura munhu weshe unomubvunza ngendaa yegonda riri mukati mwenyu;

16asi muite ngokupfaa nokuremeredza, munemwoyo isina ndaa, kuti pane izvo zvevanomureya ndizvo, vangatsverudzwa avo vanotuka njira yenyu yakanaka yokupona munaKristu.

17Ngokuti kwakapinda kunaka kutambudzika ngokuita zvakanaka, kudai kutambudzika kuri kuda kwaMwari, pane kutambudzika ngokuita zvakashata.

18Ngokuti Kristu wakatambudzikawo kamwe mhera nariini ngendaa yezvishaishi, ari wakarurama ngendaa yevasikazi kururama kuti amuunze kunaMwari. Wakaurawa munyama, asi wakaitwa unopona mumweya,

19mwouri wakaenda, akachumairawo kumweya yaiya mutirongo,

20iyo karetu yaiya isikapurutani, apo Mwari ngokusengerera paakavagarira ngemazuva aNoa, panguva yokuakwa kwengarava, mukati mwayo vashomani, kuronza, vanhu vasere, vakaponeswa kubudikidza ngemvura.

21Ndiwo muedzaniso worubhabhatidzo runomuponesa, andirwopi runobvisa tsvina kubva panyama, asi chigondiso chakaitwa chomwoyo isina ndaa kunaMwari, kubudikidza ngokumuka kwaJesu Kristu kubva kwevakafa.

22Uwo wakaenda mudenga, uri ngokumudyo kwaMwari, nengirosi, vatongi nevane simba vanomupfaira.

← Chapter 2 Jump to: Chapter 4 →