Nehemiah 9

ndau

← Chapter 8 Jump to: Chapter 10 →

1Zvino ngezuva remakumi mairi nemarongomuna romwedzi uyu, vanhu vaIsuraeri vakaungana vechiera kudya, vechisimira machira emasaka, vechiisa mavhu padera pemasoro avo.

2Zvino avo vedzinza raIsuraeri vakadziparadzanisa pachavo kubva kunevapara veshe, navo vakaema vechitenderuka zvishaishi zvavo, nezvinyangadzo zvemadzibaba avo.

3Navo vakamiruka vakaema mundau yavo, vakadzidza kubva mubhuku romupango waMambo Mwari, Mwari wavo, kupedza rupande rwechirongomuna rwezuva; norupande rumweni rwechirongomuna vakatenderuka, vakadira Mambo Mwari, Mwari wavo.

4Zvino Jeshua, Bhani, Kadhimieri, Shebhania, Bhuni, Sherebhia, Bhani naKhenani vakaema pakaturama pevaRevhi, vakadaidzira ngeizwi guru kunaMambo Mwari, Mwari wavo.

5Zvino vaRevhi, Jeshua, Kadhimieri, Bhani, Hashabhineia, Sherebhia, Hodhia, Shebhania naPhethahia vakati, “Mirukai, mukudze Mambo Mwari, Mwari wenyu, mhera nariini kumhera nariini. Ngarikudzwe zina rake rinouthende, rakamirudzwa padera pezvifumiso zveshe nokukudzwa kweshe.”

6NaEzura wakati, “Iwewe, ndiwe Mambo Mwari, iwewe wega; wakasika denga, denga rematenga, nehondo dzawo dzeshe, nyika nazvo zveshe zviri padera payo, noruandhle nazvo zveshe zvirimwo. Kwezviri zveshe munozvipa kupona, nehondo dzomudenga dzinodira iwewe.

7Iwewe ndiwe Mambo Mwari, Mwari uwo wakatsanangura Abrama, wakamubudisa kubva kunyika yaUri yevaKharadhea, wakamududza zina rokuti Abrahama;

8newe wakaona mwoyo wake kuti unogondeka pamberi pako, ukaita chitenderano naye kuti uchapa mibarirwana yake nyika yevaKhenani, yevaHiti, yevaAmori, yevaPherizi, yevaJebhusi neyevaGirigashi; newe wakazadzisa chigondiso chako, ngokuti wakarurama.

9“Newe wakaona kutambudzika kwemadzibaba edu munyika yeEgipite, wakazwa kuchema kwavo paRuandhle Rwakatsvuka.

10Wakaita zvioniso nemishamiso kurwisana naFaro nevaranda vake veshe, nevanhu venyika yake, ngokuti wakazia kuti avo vakaita ngokudzikudza kunemadzibaba edu. Wakadziitira zina rinembiri pachako, iro rinogara rakadaro metsa nanyamashi.

11Newe wakaparadzanisa ruandhle pamberi pavo, ndizvo vakahamba pakati parwo pamavhu akaoma; asi wakakandira vaivarumbirira vavo muruandhle rwakadzama, kudai ngebuwe mumvura inesimba.

12Zve, wakavatungamirira masikati ngemvumi yegore, nousiku ngemvumi yomuriro, kuvajekisira njira yevanosisira kuhamba ndiyo.

13Wakadzakazve pashi paMutunhu weSinai, ukaereketa navo kubva ngomudenga, ukavapa zvitongero zvakanaka, nezvironzo zvegwinyiso, nezviemeso zvakanaka, nemipango yakanaka.

14Wakavaziisa ngeSabatha rako rakachena, ukavapa mipango, zviemeso, nomutemo, kubudikidza ndiMosi muranda wako.

15Wakavapa chingwa chinobva mudenga kuvagutisa panzara yavo, wakavabudisira mvura kubva pabuwe kupedza nyota yavo, newe wakavaronzera kuti vanozopotera kuti vagare nhaka yenyika iyo yewakagondisa kuvapa.

16“Asi ivo nemadzibaba edu vakaita ngokudzikudza nokuomesa mitsipa yavo, navo avazi kupurutana kumipango yako.

17Vakaramba kupurutana, navo avazi kukarakadza ngemishamiso yowakaita pakati pavo; asi vakaomesa mitsipa yavo, vakadziemesera kuti vahwirire kuuhloko hwavo muEgipite. Asi iwewe uri Mwari wakanasirira kurekerera, unenyasha norudo, usikakasiri kutseneka, wakazara ngorudo rwakakura, newe auzi kuvasiya.

18Kunyazwi naapo pevakadziitira muedzaniso wakanyunguruswa wekonyana, vakati, ‘Uyu ndiye Mwari wenyu wakamubudisa kubva kunyika yeEgipite,’ navo vakaita kushata kwakakura,

19iwewe ngenyasha dzako huru auzi kuvarasha mushango; mvumi yegore aizi kuvasiya yaivatungamirira munjira masikati, nokuti mvumi yomuriro usiku, yaivajekisira nokuvaonesa njira yevaisisira kuti vahambe ndiyo.

20Wakavapa Mweya wako wakanaka kuvadzidzisa, auzi kuvanyima mana yako kubva kumiromo yavo, wakavapa mvura yokudzima nyota yavo.

21Makore makumi marongomuna wakavaponesa mushango, kwokuti avazi kutama chiro nachimwe; zvokusimira zvavo azvizi kutsakara, netsoka dzavo adzizi kuzvimba.

22Wakavapa umambo nevanhu, wakavakoanisira ndau dzavo; ndizvo vakagara nhaka yenyika yamambo Sihoni weHeshibhoni, nenyika yaOgi mambo weBhashani.

23Wakawandisa mibarirwana yavo ikawanda kudai ngenyeredzi dzomudenga, wakavapotedza munyika yowakaronzera madzibaba avo, kuti vapoteremwo vagare nhaka yayo.

24Ndizvo mibarirwana yakapoteramwo ikagara nhaka yenyika, newe wakanyisa vagari vomunyika iyo pamberi pavo, vaKhenani, wakavapira munyara dzavo, pamwepo nemadzimambo avo nevanhu venyika, kuti vaite kwevari kudai ngezvevaida.

25Navo vakatora madhorobha akashosherwa nenyika yakavhundira, vakatora nhaka yemhatso dzaiya noupfumi hweshe, nezvinyuka zvemvura yakatsiwa, minda yemivhini, yemiorivhi, nemiti yemichero yakawanda; ndizvo vakadya vakaguta vakakora, vakadakara ngounaku hwako hukuru.

26“Zvakanyadaro avazi kupurutana, vakakumukira, vakafuratira mishana yavo kumipango yako, vakauraya vaprofeti vako, avo vaivanyowedza, kuti vavatenderudzire kwouri, navo vakaita zvinyangadzo zvakakura.

27Ndizvo wakavapira munyara dzemagaa avo, avo akavatambudza. Zvino ngomukuwo wokutambudzika kwavo, vakachema kwouri newe wakavazwa uri mudenga; kudai ngenyasha dzako dzakawanda wakavapa vaponesi, avo vakavaponesa kubva munyara dzemagaa avo.

28Asi apo vaiya vazorodzwa, vakaitazve zvakashata pamberi pako, newe wakavasiya munyara dzemagaa avo, kuti atonge padera pavo; asi apo pevakatenderuka, vakachema kwouri, iwewe ukazwa uri mudenga; wakavasunhura mikuwo yakawanda kudai ngenyasha dzako.

29Newe wakavanyowedza kuitira kuti vapetuke kumipango yako. Asi ivo vakaita manyau vakadzikudza, avazi kupurutana mipango yako, asi vakashaisha ngokugura zvitongero zvako izvo zvinoita kuti munhu akazviita uchapona ndizvo. Vakafuratira makhadza avo akaoma, vakaomesa mitsipa yavo, vakaramba kupurutana.

30Makore mazhinji wakavaitira nyasha, ukavanyowedza ngoMweya wako kubudikidza ngevaprofeti vako; asi vakaramba kupurutana. Ndizvo wakavapira munyara dzevanhu venyika idzo.

31Zvakanyadaro munyasha dzako huru auzi kuvapedza yaamho, nokuti kuvasiya, ngokuti iwewe uri Mwari unorudo rwakakura nenyasha.

32“Ndizvo zvino, Mwari wedu, mukuru, unesimba, naMwari unotyisa, unongwarira chitenderano norudo rukuru, usikaringiri kutambudzika kweshe kudai ngechiro chidoodoko mukuona kwako, ukwo kwauya padera pedu, padera pemadzimambo edu, pevakuru vedu, padera pevapristi vedu, padera pevaprofeti vedu, pemadzibaba edu nepevanhu veshe vako, kubvira ngomukuwo wemadzimambo eAsiria metsa nyamashi.

33Wakaita wakarurama munazvo zveshe zvakatigumira, ngokuti iwewe wakaita ngokugondeka nesu takaita ngokushata.

34Madzimambo edu, vakuru vedu, vapristi vedu, madzibaba edu, avazi kungwarira nokuti kupurutana mipango yako, nenyowedzo dzako, dzewakaita kwevari.

35Kunyazwi nomukati mwoumambo hwavo, nomuunaku hukuru hwewakaisa padera pavo, nomunyika huru yakavhundira yewakaemesa pamberi pavo, avazi kukushandira navo avazi kutenderuka kubva kumishando yavo yakashata.

36Ringirai isusu, tiri hloko metsa nyamashi, hloko munyika yowakapa madzibaba edu kuti vadye michero yayo nezvipo zvayo zvakanaka.

37Michero yeinobara yakapinda kunaka inoenda kumadzimambo owakaisa padera pedu ngendaa yezvishaishi zvedu; vanotongazve nepadera pemiiri yedu, nepadera pezvifuyo zvedu, kudai ngokuda kwavo, nesu tiri munhamo huru.”

38Ngendaa yeizvi zveshe tinoita chitenderano chakagwinya, ngokunyora patsamba iyo ineruphau pakanyorwa mazina evakuru vedu, evaRevhi vedu, neevapristi vedu.

← Chapter 8 Jump to: Chapter 10 →