2 John 1

Dutch Frisian

Jump to:

1De Ellteste aun dee üterwälde Frü Harrin en äare Tjinja, dee etj leew enn de Woahrheit; en nijch etj auleen, sonda uck aule, dee de Woahrheit ertjant ha,

2omm de Woahrheit haulwe, dee enn ons blift en met ons senne woat enn Eewijchtjeit.

3Daut woat met jünt senne Jnod, Erboarme, Fräd von Gott, däm Voda, en von däm Harrn Jesus Tjristus, däm Sän vom Voda, enn Woahrheit en Leew.

4Etj freid mie sea, daut etj eenje von diene Tjinja enn de Woahrheit waundle jefunge ha, aus wie vom däm Voda een Jeboot emfange ha.

5En nü bedd etj die, Frü, nijch aus wann etj een niejet Jeboot die schriew, sonda daut, waut wie von Aunfank jehaut ha; daut wie eenaunda leewe selle.

6En dit es de Leew, daut wie no siene Jeboote waundle. Dit es daut Jeboot, aus jie vom Aunfank jeheat ha, daut jie doarenn waundle selle.

7Dan väl Vefeahra send enn de Welt ütjegohne, dee nijch Jesus Tjristus em Fleesch jekohme betjanne; dit es de Vefeahra en de Auntitjrist.

8Tjitjt opp jünt selfst, daut wie jie nijch veleare, waut wie bewirtjt jeschaufe ha, sonda vollen Loon emfange.

9Jiedra, dee wieda jeit en nijch blift enn de Leah Tjristi, haft Gott nijch; wäa enn de Leah blift, disa haft soo aus dän Voda aus uck dän Sän.

10Wann wäa no jünt tjemmt en dise Leah nijch brinjt, soo nämt am nijch enn jünem Hüs opp en jreest am nijch.

11Dan wäa am jreest, nehmt deel aun siene beese Woatje.

12Doa etj jünt välet too schriewe ha, etj wull daut nijch met Papia en Tint doone, sonda etj hop, no jünt too kohme en mintlijch met jünt too räde, doamet onse Freid vollkohme es.

13Daut jreese die de Tjinja von diene üterwälde Sesta.

Jump to: