Philemon 1

Dutch Frisian

Jump to:

1Paulus, een Jefangna Tjristus Jesus, en Timotäus, de Brooda, aun Filemon, dän Jeleeften en onsem Metoabeida,

2en Afia, de Sesta, en Archipus, onsem Mettjampfa, en de Jemeende, dee en dienem Hüs es:

3Jnod jünt en Fräd von Gott, onsem Voda, en däm Harrn Jesus Tjristus!

4Etj dank mienem Gott, enn däm etj aule Tiet aun die dentj enn miene Jebäde,

5doa etj hea von diene Leew en von däm Gloowe, dän dü aun däm Harrn Jesus en too aule Heilje hast,

6daut de Jemeenschoft enn dienem Gloowe wirtjsaum woat enn de Ertjantnis von aulem Gooden, daut enn ons es jäajenäwa Tjristus [Jesus].

7Dan wie etj ha väl Freid en Troost wäajen diene Leew, wiel de Hoate de Heilje derjch die, Brooda, send ermuntat worde.

8Doawäajen, wann etj uck väl Friemootijchtjeit enn Tjristus habe mott, die too befäle, waut sich jeziemt,

9wäajen de Leew välmea bedd etj die, doa etj nü soo eena sie, aus Paulus, een oola Maun, oba nü uck een Jefangna Jesus Tjristus.

10Etj bedd die fe mienen Sän, däm etj enn de Fassle Jefentjniss jebuare ha, Onesimus,

11dee die verhäa eenst nutzloos wea, oba nü die en mie nutzlijch es,

12dem etj die tridj jeschetjt ha, am, daut es mien Hoat;

13däm etj bie mie behoole wull, doamet hee enn diene Städ mie deent, enn de Fassle, wäajen de froohe Botschoft.

14Oba ohne dienen Welle wull etj nuscht doone, doamet dien Gootsdoone nijch üt Dwank wea, sonda üt friehem Welle.

15Dan fleijcht es hee doawäajen fe eene korte Tiet von die jetrannt worde, doamet dü am fe emma opp eewijch behelst,

16nijch mea aus eenen Sklowe, sonda mea aus eenen Sklowe, aus eenen leewen Brooda, besondasch fe mie, oba woo väl mea fe die, soo aus em Fleesch aus uck em Harrn.

17Aulsoo, wann dü mie aus Frind Poatna helst, soo neem am opp aus mie.

18Oba wann hee die irjent een Onnrajcht jedohne haft, oda die waut schuldijch es, soo räatjen daut mie aun.

19Etj, Paulus, ha dit met miene Haund jeschräwe, etj well woa betohle; doamet etj nijch saj, daut dü uck die selfst mie schuldijch best.

20Jo, Brooda, etj mucht aun die Freid ha, emm Harrn; ermunta ertjwitj mien Hoat enn Tjristus.

21Doa etj dienem Jehuarsom vetrüe, soo ha etj die jeschräwe, enn däm etj weet, daut dü noch mea doone woascht, aus etj saj.

22Oba toojlitj moak mie uck ne Gauststow reed, dan etj hop, daut etj derjch jüne Jebäde jünt woa jeschentjt woare.

23Daut jreest die Epafras, mien Metjefangna enn Tjristus Jesus,

24Markus, Aristarchus, Deemas, Lukas, miene Metoabeida.

25De Jnod vom onsem Harrn Jesus Tjristus es met jünem Jeist!

Jump to: