3 John 1

Norwegian 2011 (Bibelen 2011 Nynorsk)

Jump to:

1Den eldste helsar den kjære Gaius, som eg i sanning elskar.

2Kjære deg, eg ønskjer at du må få vera frisk og ha det godt på alle vis, liksom du òg har det godt åndeleg.

3Eg vart inderleg glad då nokre av syskena våre kom og fortalde kor trufast du er mot sanninga, korleis du lever i henne.

4Ikkje noko gleder meg meir enn å høyra at borna mine lever i sanninga.

5Kjære deg, du er trufast i all di gjerning for syskena våre, ja, til og med for dei som er framande.

6I forsamlinga her har dei vitna om kjærleiken din. Du gjer vel om du hjelper dei vidare på reisa. Det er rett for Gud.

7Det var då for å forkynna Namnet dei drog ut, og dei tek ikkje imot hjelp frå heidningane.

8Difor skyldar vi å ta oss av dei, så vi kan vera medarbeidarar for sanninga.

9Eg har skrive nokre ord til forsamlinga. Men Diotrefes, som gjerne vil vera den fremste der, vil ikkje ha noko med oss å gjera.

10Når eg kjem, skal eg minna han om det han har gjort. For det vonde han seier om oss, er tåpeleg. Men han nøyer seg ikkje med det. Sjølv nektar han å ta imot syskena våre, og når andre vil gjera det, hindrar han dei og støyter dei ut av forsamlinga.

11Kjære deg, du må ikkje etterlikna det vonde, men det gode! Den som gjer det gode, er av Gud. Den som gjer det vonde, har ikkje sett Gud.

12Alle gjev Demetrios dei beste vitnemål, ja, sanninga sjølv vitnar for han. Det same gjer vi, og du veit at vårt vitnemål er sant.

13Eg har enno mykje å skriva til deg, men eg vil ikkje skriva det med papir og blekk.

14For eg håpar å sjå deg snart, så vi kan tala saman, andlet til andlet.

15Fred vere med deg! Venene her helsar deg. Du må sjølv helsa venene, kvar einskild med namn.

Jump to: