Ezra 5

Ndebele Bible (SND) 2012 (IsiNdebele 2012 Translation)

← Chapter 4 Jump to: Chapter 6 →

1Abaphorofidi, uZakariya osizukulwana saka-Ido noHagayi, baphorofida ebizweni lakaZimu wakwa-Israyeli ngokujamelana namaJuda agade akwaJuda neJerusalema.

2Nje-ke uZerubhabheli umsa kaTjheyaltiyeli noJetjhuwa umsa kaJotsadakhi basikima bathoma ukuvuselela ithempeli lakaZimu eliseJerusalema. Abaphorofidi bakaZimu bebakanye nabo babasiza.

3Ngesikhatheso uTatenayi umbusi wesifunda sangetjingalanga yomlambo iYufrathe akanye noTjhetari-Bhozenayi nabasebenzisani babo beze kibo bafese bakhulumisana nabo bunje: “Niyithethephi imvumo yokwakha ithempeleli nokubeka iphahla lalo na?”

4Godu bababuza bathi: “Bobani amabizo wamadoda akha isakhiwesi?”

5Kodwana ilihlo lakaZimu belibelusile abaphathi bamaJuda. Nje-ke akhange bakghone ukuwajamisa ukufika lapha kubikwa khona kuDariyasi bekufunyanwe nomyalwakhe otloliweko mayelana nendaba le.

6UTatenayi umbusi wesifunda sangetjingalanga yomlambo iYufrathe akanye noTjhetari-Bhozenayi nabasebenzisani babo abagade bangesifundeneso, bathumela incwadi kuDariyasi

7inombiko otlolwe bunje: Akwande ukuthula kuDariyasi ikosi!

8Besithi akwazeke ekosini bonyana siyile esifundeni sakwaJuda, ethempelini lakaZimu omkhulu. Lona-ke lakhiwe ngamatje acoziweko begodu neengodo sezibekiwe emabodeni. Umsebenzi lowo wenziwa ngokukhuthala okukhulu kanti godu uragela phambili.

9Nje-ke thina sibuze abaphathabo sathi kibo: “Niyithethephi imvumo yokwakha ithempeleli nokubeka iphahla lalo na?”

10Begodu sibabuze namabizwabo kobana siwatlole phasi ukuze sazise ikosi amabizo wabarholi babo.

11Yeke nasi ipendulwabo abasiphe yona: “Thina siziinceku zakaZimu wezulu nephasi begodu sivuselela ithempeli elalakhiwe yikosi edumileko yakwa-Israyeli laphela iminyaka eminengi eyadlulako.

12Kodwana ngenca yokobana abobamkhulu batjhijila uZimu wezulwini, wabanikela ezandleni zakaNebukhadinetsari ikosi yeBhabheli emKasidi yabhubhisa ithempeleli beyathumba abantu yabasa eBhabheli.

13Nokho-ke ngomnyaka wokuthoma wokubusa kwakaKoretjhi ikosi yeBhabheli, wakhupha umyalo bonyana ithempeli lakaZimeli kufuze livuselelwe.

14Ngitjho nezitja zegolide nezesiliva zethempeli lakaZimu egade zithethwe nguNebukhadinetsari eJerusalema wazisa eBhabheli, ikosi uKoretjhi wazikhupha eBhabheli zalethwa kiloyo ibizo lakhe ebekunguTjhetjhibhatsari, okunguye agade amenze umbusi,

15wathi kuye, ‘Thatha izitjezi ukhambe nazo. Wenze bona ithempeli lakaZimu liyavuselelwa endawenalo eJerusalema bese uzifake khona.’

16Nje-ke, uTjhetjhibhatsari loyo weza wafese wabeka isisekelo sethempeli lakaZimu eJerusalema. Ukusukela ngesikhatheso bekube kunjesi, liyakhiwa begodu alikabi ukuphela.”

17Nangabe kubonakala kukuhle ekosini, akwenziwe iphenyo endlini yokubulunga imilando yesigodlo khonapho eBhabheli, kubonwe bonyana mbala umyalo loyo wakhutjhwa yikosi uKoretjhi kobana kuvuselelwe ithempeli lakaZimu eJerusalema na. Nje-ke besibawa bona ikosi isazise isiphetho sayo ngendaba le.

← Chapter 4 Jump to: Chapter 6 →