Acts 27

Nuer Bible © Bible Society in South Sudan 1998,2012

← Chapter 26 Jump to: Chapter 28 →

1Kä mëë ca jɛ lat ɛn ɣöö bakɔ wä kä I-ta-li kɛ murkäb, cukɛ Puɔl kɛnɛ tha̱a̱ŋ nɛɛni kɔ̱kiɛn ti ca yian kuëŋ tetdä kua̱r bunä lathkëëri A-gäth-teth mi cɔal i̱ Ju-liäth.

2Kä cuakɔ wä rɛy ria̱a̱y mi bëë kä A-dra-mi-tum mi go̱r wä wi̱i̱ni E-cia ti te wi̱c bar, cuakɔ wä bar, a te A-rith-tar-keth raan Ma-tha-do-nia kä Thɛ-tha-lo-ni-ka kɛ kɔ kɛɛl.

3Kä mëë ruɔ̱ndɛ cuakɔ yiën kä Dhi-don, kä cu Ju-liäth Puɔl ciɛŋ agɔaa, kä cua jɛ nhök ɣöö bɛ wä kä mäthnikɛ kɛ ɣöö ba jɛ wä ka̱m min go̱o̱rɛ.

4Kä mëë cakɔ wä bar ɛn wi̱ni kɛ murkäb cuakɔ wä kɛ gëk Ki-ti-yim kui̱c mi thil jiɔam kɛ ɣöö luɔrkɔ ni jiɔam.

5Mëë cakɔ wä kui̱ bar mi thia̱k kɛ Thi-li-cia kɛnɛ Pam-pi-lia, cuakɔ ben kä May-ra rɛy rööl Li-cia.

6Ɛn wi̱ni cu kuäär lathkëëri murkäb ji̱ A-lek-dhan-dri-ya mi di̱i̱t mi wä kä I-ta-li jek, kä cuɛ kɔ kuëŋ thi̱n.

7Cakɔ ja̱l a mäth kɛ ni̱n, kä cuakɔ cop a bɛc kä Kä-ni-däth, kä mëë /ken jiɔam kɔ nhök wä nhiam, cuakɔ wä kɛ gëk Thal-mo-ni kui̱c Ku-riit mi thil jiɔam.

8Mëë ca̱kɔ thia̱k kɛ gëëkdɛ kɛ cuɔ̱p mi bɛc, cuakɔ ben guäth mi cɔal i̱ “Thok Waath mi Gɔaa”, mi thia̱k kɛ wec La-thia.

9Kɛ ɣöö ci gua̱a̱th mi bäär thuuk baaŋ, kɛnɛ ɣöö ci ja̱l ku bɛ̈c, kä ci cäŋ ti̱mä mi̱eth ku thuŋ wä. Cu Puɔl kɛ luek,

10wee i̱, “Kuäär, guɛcä jɛ ɛn ɣöö bi ja̱lan bɛ̈c ɛlɔ̱ŋ kɛnɛ bath ŋɔaani mi di̱i̱t, kä /ciɛ kuak kɛnɛ murkäb kärɔ̱, amäni tëkdan bä.”

11Kä duundɛ ɣöö cu kuäär lathkëëri liŋ ni ruac kua̱r gëëri murkäbä kɛnɛ gua̱n murkäbä kä min ca la̱tdɛ ɛ Puɔl.

12Kä kɛ ɣöö /ci thok waath ɛmɔ gɔaa kɛ ɣöö dee naath jiɔam thi̱n, cu ri̱w nath nhɔk ni ɣöö bikɛ wä rɛy bar ɛn wi̱ni, kɛ ca̱r kä ɣöö dee kɛ Pi-nik cop, gua̱a̱th in deekɛ jiɔam thuk thi̱n. Jɛn Pi-nik ɛ thok waath Ku-riit mi lot ni kui̱c cuëëc konyä ca̱ŋ kɛnɛ kui̱ caam konyä ca̱ŋ.

13Kä mëë ci jiɔam kuec cuëëc ɣɔaa ɛ tok kɛ puɔ̱t, cukɛ ŋa̱c ni ɣöö bikɛ cop guäth in görkɛ. Inɔ cukɛ löc murkäbä lueey raar kä cukɛ rɔ̱ ruɛc kɛ pöm bar Ku-riit.

14Kɛ gua̱a̱th mi tɔt cu thul mi di̱i̱t, min cɔal i̱ “Jiɔam kuec caam känyä ca̱ŋ” puɔ̱t, putdɛ raar kä dhuɔ̱ɔ̱l.

15Kä mëë cɛ murkäb käp, a /cɛ jiɔam dee lor, cuakɔ jɛ päl, kä cuɛ kɔ lɔk.

16Kä mëë cakɔ cop kui̱ dhuulä mi cɔal i̱ Kɔda cuakɔ riey in tɔt yɔ̱a̱c rɛc a bum.

17Kä kɛ kɔr kä mëë ca riey nööŋ rɛc, cukɛ puɔ̱ny murkäbä yiɛn kɛ dep. Kä kɛ ɣöö dualkɛ kɛ ɣöö bikɛ do̱o̱t rɛy litdä Thir-tith, cukɛ tin jäl kɛ murkäb lony, kä cuɛ murkäb lɔk kɛ jiɔam.

18Kä mëë ci ɛ muaŋ kɔ ciɛŋ a jiäk, mëë ruɔ̱ndɛ cukɛ jɛ tok kɛ mi yuɔrkɛ kuak yieer.

19Kɛ cäŋ in diɔ̱ɔ̱kdiɛn cukɛ tin la yiankɛ ni murkäb yuɔr yieer kɛ tetkiɛn.

20Kä mëë /ken cäŋ kiɛ kuɛl jɔɔc kɛ ni̱n ti ŋuan, kä put jiɔam mi di̱i̱t, kä cu ŋa̱thda kɛ ɣöö bakɔ kään thil.

21Kä kɛ ɣöö cikɛ tey a /cikɛ mi̱th kɛ gua̱a̱th mi bäär, cu Puɔl rɔ jiɛc rɛydiɛn, kä cuɛ kɛ jiök i̱, “Wutni, dee gɔaa ni mi cia ɣä liŋ, mëë /ka̱nɛ jiɛɛn kä Ku-riit, kä /canɛ däk ɛmɛ kɛnɛ bath ŋɔaani dee lɛ tuɔɔk.

22Kä täämɛ cuɔmä yɛ ka̱nɛ buɔ̱m lɔaac, kɛ ɣöö thil tëk raam kɛl mi bi bath rɛydun, kä ɛ ni murkäb kärɔa bi bath ɔ.

23Kɛ ɣöö min wa̱r cuɛ tekɛ jääk Kuɔth mi ci cuɔ̱ŋ gekädä, Kuoth in lapä raandɛ kä palä,

24cɛ ɣä jiök i̱, ‘/Cu dual, Puɔl, ji̱n bi rɔ dhil kɛ cuɔ̱p nhiam Thii-thɛr. Kä kɛ thuɔ̱k, Kuoth bɛ nɛy diaal tɔ̱ jäl kɛ ji̱ kɛɛl tɔ̱ kän.’

25Kä ɛnɔ, wutni, ka̱nɛ buɔ̱m lɔaac, kɛ ɣöö ta̱a̱ kɛ ŋa̱th kɛ Kuoth ɛn ɣöö bɛ a jɛn pa̱ny ɛn ni̱n cɛ lar ɣä.

26Kä duundɛ ɣöö banɛ dhil cop dhuulä kɛl.”

27Mëë ci wäär in wäl ŋuandiɛn cop, mëë lɔakɛ kɔ kui̱ bar A-dɛ-ria kɛ wädäär cu gëër murkäbä jɛ diw i̱ cikɛ thia̱k kɛ rar.

28Kä ɛnɔ cukɛ luëŋdɛ thɛm, kä cua jɛ jek ala mi̱ti̱ri ti jiɛn ŋuaan mëë cikɛ wä nhiam kä mi tɔt cukɛ jɛ nyɔk kɛ thëm, kä cua jɛ jek ala mi̱ti̱ri ti jiɛn diɔ̱k.

29Kä mëë dualkɔ kɛ ɣöö bakɔ rɔ̱ yiath kä pääm, cukɛ löc da̱ŋ ŋuan yuɔr piny thaar murkäbä, cukɛ pal kɛ ɣöö bi ɣɔw baak.

30Kä mëë go̱o̱r gëër ɣöö bikɛ rɔ̱ bar rɛy murkäbä, kä cukɛ riey in tɔt luay yieer, ce̱tkɛ mi luaykɛ ni löc nhiam murkäbä piny,

31kä cu Puɔl kuäär lathkëëri kɛnɛ nɛɛkɛ jiök i̱, “/Ca yɛ bi kän, ɛ ni mi te wutni ti̱ti̱ rɛy murkäbä.”

32Kä cu lathkëëri dep ria̱a̱y in tɔt tɛm, kä ca jɛ pa̱l wä.

33Kä a ŋot /ken ɣɔw ni baak, cu Puɔl nɛy diaal com kɛ ɣöö bikɛ mi̱th, wee i̱, “Wa̱lɛ ɛ jɛn cäŋ in wäl ŋuandiɛn in ta̱yɛ li̱pä baaŋ a thil mi̱eth, mi cia camɛ.

34Kɛ kui̱ ɛmɔ, ɣän la̱ŋä yɛ kɛ ɣöö bia mi̱th, kɛ ɣöö bia tëk. Kɛ ɣöö thilɛ mi̱em wec raam kɛl kä yɛ mi bɛ bath.”

35Mëë cɛ mɛmɛ lat, cuɛ juray ka̱n, kä cuɛ Kuoth la̱r tɛ̈th lɔaac nhiamdiɛn diaal, cuɛ jɛ puɔ̱ny kä cuɛ mi̱eth tok.

36Kä cu lo̱ckiɛn diaal buɔ̱m, kä cu kɛn diaal mi̱th.

37(Kɔn nɛy diaal tëë te rɛy murkäbä kɛ kɔn nɛy ti kur rɛw wi̱cdɛ jiɛn bärɔw wi̱cdɛ bäkɛl.)

38Kä mëë cikɛ ria̱ŋ, cukɛ murkäb jakä puɔl, kɛ yoriɛn kɛ bɛl yieer.

39Mëë ci ɣɔw baak, /kenkɛ rar ŋa̱c, kä cukɛ go̱r bar mi car car nɛn, kä cukɛ jɛ car ɛn ɣöö ba murkäb gɛ̈r raar, mi lotdɛ rɔ.

40Kä ɛnɔ cukɛ löc murkäbä luɔny yieer. Kä cua tin yiankɛ ri̱i̱tni lony. Kä cua bi̱i̱ in la jäl kɛ murkäb kuëŋ nhiam murkäbä kui̱c jiɔam, cukɛ cu wä go̱rä mi car car.

41Kä duundɛ ɣöö cu murkäb kɔ̱k röm yiëri mi jany jany. Kä cu nhiam murkäbä rɔ pi̱em, kä cuɛ do̱o̱t a /cɛ jäl, kä cua thar murkäbä töl ɛ muaŋ.

42Kä cu ca̱r lathkëëri a ɣöö, bikɛ mabuuthni näk, kɛ ɣöö thilɛ kɛl mi bi kɛt a bi rɔ leny.

43Kä kɛ ɣöö go̱o̱r kuäär lathkëëri ɣöö bɛ Puɔl kän, cuɛ kɛ pën ca̱pdiɛn in görkɛ la̱tdɛ ɛn ɣöö /ca bi la̱t. Kä cuɛ nɛy ti ŋa̱ckɛ kët la̱t ɣöö bikɛ rɔ̱ yuɔr yieer kɛ nhiam kä bikɛ kɛt thok waath.

44Kä bi duɔth nath wä kɛ jiɛn kɛnɛ tööl murkäbä. Kä cuɛ cua̱ jɛn min cup kɛ nɛy diaal raar.

← Chapter 26 Jump to: Chapter 28 →