Isaiah 58

Nuer Bible © Bible Society in South Sudan 1998,2012

← Chapter 57 Jump to: Chapter 59 →

1Cu Kuoth Nhial wee i̱, “Wieeni kɛ jɔw mi di̱i̱t, /cu jɛ päl, kapni jɔwdu nhial ce̱tkɛ jɔw kaaŋä, lätni nɛɛkä dueerkiɛn, lätni dhɔr Je-kɔb dueerkiɛn.

2Bi kɛn ɣä go̱r ni ciaŋ, bikɛ dupkä go̱r kɛ ɣöö bakɛ ŋa̱c ɛgɔaa, ce̱tkɛ do̱r mi ci la̱t ni ti gɔw, ti /ka̱n ŋuɔ̱t Kuɔthdiɛn pa̱l ruëëc, ti la thiëckɛ ɣä kɛ ŋuk luɔ̱k mi gɔaa, ti görkɛ Kuoth kä bɛ te gekädiɛn.

3Cukɛ wee i̱, ‘Ɛŋu thek kɛ nɛy ɔ, kä /ci jɛ nɛn? Kä ɛŋu jak nɛy rɔ̱ kä kɔ̱c ɔ kä /ci jɛ ŋäc ɔ?’ Nɛnɛ jɛ, kɛ ni̱n thëkdun, la yɛnɛ a lät ce̱tkɛ min nhɔakɛ, kä la yɛn la̱a̱tkun a mac.

4Kä la thëkdun a thuk nikɛ gak kɛnɛ ko̱r, la yɛn rɔ̱ cua̱ duääc kɛ jiäkun. /Ci yɛn dëë thɛɛk kɛ thëk mi ce̱tkɛ nɛ walɛ mi, ɛn nɔmɔ /cɛ palun dëë jak kä liɛŋkɛ nhial.

5Ɛn nɔmɔ derɛ a jɛn thëk in cä mɛk, derɛ a jɛn cäŋ in dëë raan rɔ jak kä kɔ̱cɛ thi̱n? Derɛ a ɣöö bi raan wi̱cdɛ goŋ ce̱tkɛ guɔ̱t, kɛnɛ tɔ̱ɔ̱c rɛy cuali kɛnɛ rɛy ŋɛthä? Dëë yɛn nɔmɔ cɔl i̱ thëk, kä ɛ cäŋ mi nhɔk Kuoth Nhial ɛ?

6“Kä thëk in cä mɛk, /ciɛ ɣöö bi kuatni jiäkni lony, kä bi dep gäkä lony, bi ram in ciaŋkɛ ɛ jiäk lony ɛ lɔr, kä bi gäkni diaal töl?

7Kä /ciɛ ɣöö bi mi̱eth nyuak kɛ nɛy tin näk buɔthkɛ, kä bi can in thil dhɔr nööŋ dhɔru, kä bi ram mi te juutdä kum, ɛ /ci bi tɛ̱̈ɛ̱̈ ni rɔ kä puɔ̱nydu?

8Inɔ bi buaydu cu ben ce̱tnikɛ bak ɣɔaa, kä bi gɔɔydu jɔɔc kɛ pɛ̈th, kä bi lät cuŋniku cu wä nhiamdu, kä bi buay Kuɔth Nhial a gääŋ jɔakdu.

9Kä ji̱n bi ciöt kä bi Kuoth ji̱ loc, bi ciöt go̱o̱ri luäk, kä bɛ wee i̱, ‘Ɣän ɛn’. “Mi ci yɛn gäk woc rɛydun, kɛnɛ nyuɔ̱th yiɛtädun kɛ ruac luɔm,

10kɛnɛ mi ci rɔ la̱th guäth raam mi näk buɔthɛ, kä bi ram mi ciaŋkɛ a jiäk ka̱m min go̱o̱rɛ, inɔ bi buaydu päl rɛy muɔ̱th, kä bi wääru ce̱tnikɛ cäŋ däär.

11Bi Kuoth Nhial ji̱ gaŋ ni ciaŋ, kä bɛ tin go̱o̱ri ro̱ŋ kɛ ti gɔw, kä bɛ puɔ̱nydu jak kä bum, bi ce̱tnikɛ kak wal mi ca wac kɛ pi̱w, bi ce̱tnikɛ wa̱t pi̱i̱ni, mi /ci pi̱kɛ dëë met thuuk.

12Kä bi nɛɛku ti̱ec tin ci da̱k nyɔk kɛ ta̱th, biakɛ nyɔk kɛ ta̱th ni guäth ti̱ecni tëë wal, ba ji̱ cɔl ni nyio̱o̱k ta̱thni pa̱nyni, läät duɔ̱pni tin ciaŋkɛ.”

13“Kä mi ci cio̱o̱kdu tit kä to̱l ca̱ŋ lɔ̱ŋä, kä /ci bi la̱t ni min nhɔki kɛ cäŋ lɔ̱ŋädä, ɛ bi cɔl ni jɛ cäŋ mi gɔaa, ɛ bi cäŋ lɔ̱ŋä Kuɔth Nhial luɔ̱th, mi wi̱i̱ jɛ luɔ̱th ɛ /ci bi wä kɛ duɔ̱ɔ̱pdu, kä /ci bi go̱r ni min nhɔki kiɛ bi lat ni rieet ti jiäk,

14kä bi jek ni tɛ̈th lɔaac kä Kuoth Nhial, ɣän bä ji̱ jak kä te ni nhial wi̱i̱ muɔ̱ɔ̱n, ɣän bä ji̱ jak kä cami ni mi̱th muɔ̱ɔ̱n guur ni Je-kɔb,” ruac ni ɣän Kuoth Nhial.

← Chapter 57 Jump to: Chapter 59 →