Job 29

Nuer Bible © Bible Society in South Sudan 1998,2012

← Chapter 28 Jump to: Chapter 30 →

1Kä cu I-yob rɔ nyɔk kɛ mi buumɛ rɔ wëë i̱,

2“Ɣän göörä ni mi luɔcä ciɛŋädä mëë wal, ni̱n tëë tiit Kuoth ɣä thi̱n,

3mëë la te buay Kuɔth kɛɛl kɛ ɣä, kä la ja̱lä rɛy muɔ̱th kɛ buaydɛ,

4kɛ gua̱a̱th ëë ŋuɔtdä kɛ ŋuɛɛt, gua̱a̱th ëë te puɔ̱th Kuɔth dhɔrä.

5Mëë ŋot Kuoth kɛɛl kɛ ɣä, mëë te gaatkä gekädä,

6mëë ta̱a̱ kɛ ria̱ŋ mi di̱i̱t, cak ti ŋuan kɛnɛ liɛɛth mi di̱i̱t!

7Mɔ cä wä raar ɔ guäth in ci di̱t wec mat thi̱n ɔ, mɔ cä ku nyuur wi̱c kɔaamdä mɔ,

8mi ci ŋuɛ̈tni ɣä nɛn la jiɛc kɛ, kä la dɔŋ rɔ̱ a jiec ni cuɔ̱ŋ,

9kä la ruëëc ruac a päl la nhiatkɛ ni thukiɛn kɛ tetkiɛn,

10kä la bit nɛy tin luɔ̱thkɛ, la pek ni thukiɛn ɣo̱o̱ŋä.

11Kä ram mi ci ɣä liŋ, ruacɛ agɔaa kɛ kui̱dä, kä ram mi ci ɣä nɛn latdɛ ni mi gɔaa kɛ ɣä,

12kɛ ɣöö la lua̱kä can mi go̱o̱r luäk, kɛnɛ rɛɛt mi thil ram luäk jɛ.

13Kä la puɔthkɛ ɣä ɛ ram mi go̱o̱r lia̱a̱, kä la jakä lɔc ciek jɔkä tɛth.

14Kä cua̱ cuŋ la̱th puɔ̱ɔ̱nydä ce̱tkɛ bi̱i̱, kä thuɔ̱k ɛ jɛn la luɔ̱tdä mɔ kä ɛ kumdä.

15Ɣän lapä taŋ kä cɔr, kä ɛ ɣän cio̱o̱k kä duääny.

16Ɣän la ca̱tdä kɛ gua̱n raam mi can, kä la ka̱nä riɛk raam mi juɔ̱r.

17Ɣän la da̱kä nɛy tin jiäk, kä la lua̱kä nɛy tin cikɛn kɛ miɛt.

18Kä cua̱ ca̱r i̱, ‘Ɣän bä li̱w dhɔrä, kä bä ni̱n teekädä jak kä ŋuan ce̱tnikɛ waŋ litdä,

19ɣän ca̱tdä nikɛ jiath mi te ciökɛ rɛy pi̱i̱ni, kä te karkɛ kɛ thäc kɛ wäär kɛɛliw.

20Kä te wuɔ̱tdä thi̱n ni ciaŋ, kä /ken buɔ̱mdä met jiɛɛn kä ɣä.’

21“Kä la liip naath ruacdä a bitdä, la bit kɛ mi la̱tdä kɛ ruac.

22Kä mi cä ruac, /ci kɛ la ruac, kɛ ɣöö la cup ruacdä lɔɔcdiɛn.

23La liip kɛn ruacdä ce̱tkɛ mi liɛpkɛ ni nhiaal, la ro̱ŋɛ lɔɔcdiɛn ce̱tnikɛ nhiaal ruëël.

24La duɔ̱thä kɛ duɔɔth mi thilɛ kɛ mi ŋa̱thkɛ, la gɔɔy nhiamdä kɛ a jak kä bum.

25Kä cua̱ kɛ rialikä ce̱tnikɛ bo̱o̱thdiɛn, kä cua̱ cieŋ ce̱tkɛ kuäär mi te rɛy rɛ̈mdɛ, cua̱ ce̱tnikɛ ram mi buum nɛy ti jiɛth lo̱ckiɛn.

← Chapter 28 Jump to: Chapter 30 →