Joel 1

Nuer Bible © Bible Society in South Sudan 1998,2012

Jump to: Chapter 2 →

1Nɛmɛ ɛ jɛn ruac Kuɔth Nhial ëë ci ben kä Yo-el gat Pɛth-wel.

2Liɛŋɛ nɛmɛ yɛn di̱t, liɛŋɛ jɛ yɛn tin diaal tin cieŋ wi̱i̱ muɔ̱ɔ̱n. Tëë kɛ mi ce̱tkɛ nɛmɛ mi ci kɔn tuɔ̱k kä yɛ, kiɛ kä guurikun?

3Ɛn mɛmɛ la̱tdɛ jɛ gaatkun, kä bi gaatkun ɛ lɛ wä la̱t gaatkiɛn, kä bi gaatkiɛn ɛ lɛ wä la̱t ri̱c ɔ bi ben ɔ.

4Ɛ jɛn ɣöö kɛn kɔaryɔamni bäkɛ bua̱a̱ni, buɔ̱n guurkɛ jɛ ɛ buɔ̱n ɔ, mi wä duɔth kä buɔ̱n in nhiam, ba ben dup ɛ buɔ̱n in dɔ̱ŋ.

5Jiacɛ rɔ̱ kä wiee ɛ yɛn yɔ̱a̱ŋ kɔaaŋni, kä rötdɛ yɛn ma̱a̱th kɔaaŋni diaal, kɛ ɣöö ca kɔaŋ in kɛc ben poc ni thokdun.

6Kɛ ɣöö ci döör mundä ben mac, kɛ ɣöö bumkɛ kä ŋuankɛ /ca kɛ dee luäŋ kɛ kuen. Kä moth lɛckiɛn ce̱tkɛ lɛc luɔny, kä te ka̱a̱p ti ce̱tkɛ ka̱a̱p luɔny.

7Cikɛ bɛlkä dup, kä cikɛ köm jiɛn ŋɔ̱a̱pnikä kuɛ̈k piny, a cikɛ cua bo̱o̱r kɛ karkiɛn kɛɛl.

8Rötdɛ, yɛn naath ce̱tkɛ nyam mi paar lia̱a̱ wutdä mi dee jɛ wä kuɛn.

9Ca muc bɛɛl kɛnɛ kɔaŋ ŋok rɛy luaak Kuɔth Nhial. Kɛ kui̱c ɛmɔ, ci bööth palä tin la ji̱ la̱t Kuɔth Nhial lo̱ckiɛn jiath.

10Ci ka̱a̱k diaal guaw, kä pär mun, kɛ ɣöö ci bɛl rɔɔl, kä ci kɔaŋ cu thil amäni liɛth bä.

11Yɛn puɔ̱ɔ̱r ka̱a̱kni kɛ yɛn pi̱eth a lo̱ckun jiɛth. Wiee ɛ kä parɛ bɛlkun kɛnɛ bua̱ckun, kɛ ɣöö thilɛ ti ba ŋɛr.

12Rɔɔl bɛl kɛnɛ jiɛn diaal tin tekɛ dɛy, a thilɛ mi kuiir kɛnɛ ci kɛ li̱w. Kä thilɛ tɛ̈th lɔaac kä naath bä.

13Yɛn bööth palä tin lät wi̱i̱ yi̱kä, bia la̱thɛ bieyni jiɛthä lɔaac kä rötdɛ, kä thuɔ̱kɛ wäär kɛ bieyni jiɛthä lɔaac. Yɛn nɛy tin la la̱a̱t Kuɔthdä. Kɛ ɣöö /ca muc bɛɛl kɛnɛ kɔaŋ ŋok, rɛy luaak Kuɔthdun.

14La̱tdɛ thëk mi thuɔ̱k, kä cɔalɛ duɔl matdä nath mi rɛl rɔ. A di̱t kɛnɛ ji̱ wec diaal matkɛ rɔ̱ luaak Kuɔth Nhial Kuothdun, kä la̱ŋɛ jɛ.

15Ɛn cäŋ ɛmɔ! Bi bɛ̈cdɛ ku lɛ ce̱tkɛ ŋu, kɛ ɣöö cɛ thia̱k ɛn cäŋ Kuɔth Nhial ɛmɔ, kä bɛ ben ce̱tnikɛ cäŋ däkä Kuɔth in leny buɔ̱mdɛ ti diaal.

16/Ciɛ mi̱th ɛn nëë thuk ni nhiamdan? Kä /ciɛ tɛ̈th lɔaac ɛn nëë thuk rɛy luaak Kuɔthdan?

17Ci bɛl köt piny, thilɛ bɛl ti ba tɔ̱w, tëth tɔ̱wni bɛɛl kɛ ɣöö tekɛ baaŋ.

18Kä ley ku muaarikɛn! Bun ɣɔ̱ɔ̱k kɛnɛ det ku cuc ni kɛn. Kɛ ɣöö thilɛ wal ti laak kɛn kɛ.

19Ɣän la̱ŋä ni ji̱, lö Kuoth Nhial. Kɛ pɛ̈t mi ci pɛ̈t kɛ wal dɔaar, kɛ bo̱l maac mi ci jiɛn diaal waŋ.

20Amäni ley dɔaar guɛckɛ ni ji̱ bä. Kɛ ɣöö ci liɛl pi̱i̱ni kööt kä ci mac wal dɔaar waŋ.

Jump to: Chapter 2 →