1 Peter 4

nyankole

← Chapter 3 Jump to: Chapter 5 →

1Nk'oku Kristo yaabonabonesiibwe omu mubiri, naimwe mwegumye mwine omutima nk'ogwe. Manya weena obonabona omu mubiri aba atakikora bibi,

2ngu abone kumara ebiro bye ebitsigaire akiine omubiri, atakitegyekwa kwetenga okubi okw'abantu, kureka ebi Ruhanga akunda.

3Omu biro byahingwire mukamara omwanya muraingwa munonga nimukora ebi Abanyamahanga bakunda. Mukaba mwine emitwarize y'ebikwatiraine n'obushambani, n'okworobera okwetenga okubi okw'omubiri, n'obusinzi, n'okuraara enkyeera, n'okuramya ebishushani okurikuzira.

4Nikitangaaza abo Banyamahanga kureeba hati mutarikukwatanisa nabo omu by'okwetaanyagura kutyo, nikyo barikubajumira.

5Bo baryayetonganira ahari Ogwo oyeteekateekire kucwera abahuriire n'abafiire orubanja.

6Nikyo Amakuru Marungi gaarangiririirwe n'abaafiire, ngu nobu baacwereirwe orubanja omu mubiri nk'abantu, kwonka bagume bari abahuriire omu mutima nka Ruhanga.

7Emperu ya byona eri haihi. N'ahabw'ekyo mugume mwerinzire nimwebarira, mubone kubaasa kushaba Ruhanga.

8Okukira byona, mugume nimukundana mutarikuhararukana, ahabw'okuba rukundo eshwekyerera ebibi bingi.

9Mukunirane mutarikunyomwa.

10Nk'oku buri omwe yaahairwe ekiconco, mubihweresane nk'abaakwatsiibwe okugaba emigisha ya Ruhanga etari emwe.

11Weena oine eky'okugamba, agambe ebi Ruhanga amushuuruuriire. Weena orikuheereza, aheereze n'amaani agu Ruhanga amuhaire, omuri byona Ruhanga abone kuhimbisizibwa omuri Yesu Kristo, oheebwa ekitiinwa n'obutegyeki ebiro byona. Amiina.

12Abakundwa, mutatangaazibwa omuriro ogurikubagyeza, mukaba nk'abaagwerwa akagwe.

13Haakiri mushemererwe, ahabw'okuba mukwataniise na Kristo omu kubonabona kwe. Reero ekitiinisa kye ku kirishuuruurwa, nabwo mubone kushemererwa n'okunanuka.

14Ku muraajumwe ahabw'eiziina rya Kristo, mwine omugisha; ahabw'okuba Mutima ow'ekitiinwa, Mutima wa Ruhanga, ari ahariimwe.

15Kwonka hatarigira n'omwe omuriimwe owaabonabonesibwa ahabw'okwita, nari okwiba, nari okukora bibi, nainga okwetaasya omu by'abandi;

16kureka oraabonabonesibwe ahabw'okuba Omukristo, arekye kwitwa enshoni. Haakiri ahimbise Ruhanga, ahabw'okwetwa eryo iziina.

17Manya obunaku buhikire okucwa orubanja okutandikira aha b'omu nju ya Ruhanga. Mbwenu ku kuraabe niitwe kuraabandizeho, abo abatarikwikiriza Makuru Marungi ga Ruhanga baryashura ki?

18Nk'ekyahandiikirwe oku kirikugira kiti: Ohikiriire ku araabe naagumirwa okujunwa, otarikutiina Ruhanga n'omusiisi baryaba bata?

19N'ahabw'ekyo ababonabona nk'oku Ruhanga asiimire, bagume nibakora gye, kandi bakwatse amagara gaabo Omuhangi omwesigwa.

← Chapter 3 Jump to: Chapter 5 →