2 Corinthians 2

nyankole

← Chapter 1 Jump to: Chapter 3 →

1N'ahabw'ekyo nkamariirira kutagaruka okwo kubasaasa.

2Mbwenu nyowe ku ndaabasaase, n'oha orandeetere okushemererwa, kureka t'ogwo ou nsaasize?

3Ekyo nikyo naabahandiikiriire, ngu ku ndaije, ndekye kusaasa abaakubaire nibandeetera okushemererwa, ahabw'okuba nkagira obwesigye ahariimwe mwena, ngu ku ndaashemererwe, mwena mushemererwe.

4Manya nkabahandiikira nyine obusaasi bwingi n'obujune omu mutima kandi n'amarira maingi, ntarikwenda kubasaasa, kureka okubamanyisa ku mbainiire rukundo nyingi.

5Ku haraabe hariho owaareetsire obusaasi, tiinye yaasaasize nyenka, kwonka aha rundi rubaju ntarengyesereize mwena akabasaasa.

6Omuntu nk'ogwo ekifubiro eki yaahairwe abaingi nikimara.

7N'ahabw'ekyo mukaamusaasiire mumugumya, areka kwitwa obusaasi burengyesereize.

8Nikyo ndikubeeshengyerereza ngu mugarukye kumuhamiza ku murikumukunda.

9Nikyo naabahandiikiriire kureeba yaaba nimworoba omuri byona.

10Manya weena ou musaasira, naanye mmusaasira. Naanye eki naasaasiire, ku kiraabe kiriho, nkakisaasira ahabwanyu omu maisho ga Kristo,

11ngu Sitaane atakaatuhita; ahabw'okuba nitumanya gye amengye ge.

12Obu naaza Turoa kurangirira Amakuru Marungi ga Kristo, nkashanga orwigi ruunyiguriirwe kukorera Mukama.

13Kwonka tindagizire buhuumure mu mutima, ahabw'okuba tindashangireyo mwene waitu Tito. Ntyo naabaraga, naaza Makedoniya.

14Mbwenu Ruhanga naakasingye, otusinguriza obutoosha omuri Kristo. Akatubaasisa kutaamiranisa hoona omugaju gw'okumumanya.

15Ahabw'okuba itwe, omu barikujunwa n'omu barikuhwerekyerera, turi omugaju gwa Kristo ogurikutaamiranira Ruhanga.

16Aha barikuhwerekyerera, turi ekinuuko kya rufu ekireeta okufa; aha barikujunwa, turi omugaju gw'amagara ogureeta amagara. Mbwenu ebyo n'oha owaakubibaasa?

17Manya tituri nka baingi ababungiza eryo ekigambo kya Ruhanga; kwonka itwe ahabw'okutumwa Ruhanga tugamba tutaine buryarya omu maisho ge, turi abaheereza ba Kristo.

← Chapter 1 Jump to: Chapter 3 →